އޭއައި ސްޓެތޮސްކޯޕުން ބޮޑެތި ހިތުގެ ބަލިތައް ސިކުންތުކޮޅެއްގެ ތެރޭގައި ދެނެގަނެވިދާނެ

އާޓިފިޝަލް އިންޓެލިޖެންސް (އޭ.އައި) ގެ އެހީގައި މަސައްކަތް ކުރާ ސްޓެތޮސްކޯޕް (ކަށިގަނޑު) އިން ތިން ވައްތަރެއްގެ ހިތުގެ ބަލިތައް ސިކުންތުތަކެއްގެ ތެރޭގައި ދެނެގަނެވިދާނެ ކަމަށް ދިރާސާކުރާ ފަރާތްތަކުން ބުނެފިއެވެ.

1816 ގައި އީޖާދުކުރެވުނު އަސްލު ސްޓެތޮސްކޯޕުން ޑޮކްޓަރުންނަށް ބަލިމީހާގެ ހަށިގަނޑުގެ އެތެރޭގެ އަޑުތައް އެހޭނެއެވެ. ނަމަވެސް މިހާރު އިނގިރޭސި ވިލާތުގެ ޓީމަކުން ފަރުމާކުރި އާދަޔާ ޚިލާފު ކަށިގަނޑުން ހިތް ހުއްޓުން، ހިތުގެ ވޭލްވްގެ ބަލިތައް އަދި އާދަޔާ ޚިލާފު ހިތުގެ ރިދަމްތައް ވަގުތުން ދެނެގަނެވޭ އެވެ.

މި އޭ.އައި ޓޫލަކީ "ހަގީގީ ގޭމް-ޗޭންޖަރެއް" ކަމަށާއި، މީގެ ސަބަބުން ބަލިމީހުންނަށް އަވަހަށް ފަރުވާ ލިބިގެންދާނެ ކަމަށް ދިރާސާކުރާ ފަރާތްތަކުން ބުނެފައިވެއެވެ. އަދި މި ވަސީލަތް އިނގިރޭސި ވިލާތުގެ އެކި ކަންކޮޅުތަކަށް ތަޢާރަފުކުރުމުގެ ޕްލޭން ވަނީ ކުރެވިފައެވެ.

އައު ވަސީލަތުގައި އާންމު ޑަކްޓަރު ކަށިގަނޑުގެ ބަދަލުގައި ތާސްބައިގެ ގަނޑެއްގެ ސައިޒުގެ އާލާތެއް ބޭނުންކުރެވެއެވެ. މީގައި މައިކްރޯފޯނެއް ބޭނުން ކޮށްގެން އިންސާނުންގެ ކަންފަތަށް ނީވޭ ހިތުގެ ވިންދާއި ލޭ ދައުރުވުމުގެ ކުދިކުދި ތަފާތުތައް ދެނެގަނެވެއެވެ.

އިމްޕީރިއަލް ކޮލެޖް ލަންޑަން އަދި އިމްޕީރިއަލް ކޮލެޖް ހެލްތް ކެއަރ އެން.އެޗް.އެސް ޓްރަސްޓުން ކުރި މި ދިރާސާ ގައި ލަންޑަންގެ 200 އަށްވުރެ ގިނަ ޖީ.ޕީ ކްލިނިކްތައް ހިމެނުނެވެ. 96 ކްލިނިކްގެ 12,000 އަށްވުރެ ގިނަ ބަލިމީހުން އޭ.އައި ސްޓެތޮސްކޯޕުން ޗެކްކުރެވި، މި ޓެކްނޮލޮޖީ ބޭނުން ނުކުރާ 109 ކްލިނިކްގެ ބަލިމީހުންނާ އަޅާކިޔުނެވެ.

މި ވަސީލަތުން ޗެކްކުރެވުނު ބަލިމީހުންގެ ތެރެއިން ޖެހިގެން އައި 12 މަސްދުވަހުގެ ތެރޭގައި ހިތް ހުއްޓުން ދެނެގަނެވުނު މިންވަރު 2.33 ގުނަ އިތުރުވިއެވެ. އަލާމާތެއް ނުފެންނަ ނަމަވެސް ސްޓްރޯކްގެ ރިސްކް އިތުރުކުރާ އާދަޔާ ޚިލާފު ހިތުގެ ވިންދު 3.5 ގުނަ އިތުރަށް ދެނެގަނެވުނެވެ. އަދި ހިތުގެ ވޭލްވްގެ ބަލިތައް 1.9 ގުނަ އިތުރަށް ދެނެގަނެވުނެވެ.

ބްރިޓިޝް ހާޓް ފައުންޑޭޝަން (ބީ.އެޗް.އެފް)ގެ ކްލިނިކަލް ޑައިރެކްޓަރ އަދި ކޮންސަލްޓަންޓް ކާޑިއޮލޮޖިސްޓް ޑރ. ސޯނިޔާ ބާބޫ-ނާރާޔަން ވިދާޅުވީ، "މިއީ 200 އަހަރަށް ވުރެ ކުރިން އީޖާދު ކުރެވުނު އާދައިގެ ސްޓެތޮސްކޯޕް 21 ވަނަ ގަރުނަށް އަޕްގްރޭޑް ކުރެވިދާނެ ގޮތުގެ ރީތި މިސާލެކެވެ."

މިފަދަ އައު އީޖާދުތައް ވަރަށް މުހިންމު ކަމަށާއި، ގިނަފަހަރަށް މި ބަލި ދެނެގަނެވެނީ ބަލިމީހުން އިމަޖެންސީ ގައި ހޮސްޕިޓަލަށް އަންނައިރު ވަރަށް ފަހުގެ މަރުހަލާއެއްގައި ކަމަށް އޭނާ ވިދާޅުވިއެވެ.

"އަވަހަށް ބަލި ދެނެގަނެވުމުން، މީހުންނަށް ދިގު މުއްދަތަކަށް ދުޅަހެޔޮކަމާއެކު ދިރިއުޅެވޭނެ ފަރުވާ ލިބިގެންދާނެ،" ކަމަށް އޭނާ ވިދާޅުވިއެވެ.

މި ހޯދުންތައް ދުނިޔޭގެ އެންމެ ބޮޑު ހިތުގެ ކޮންފަރެންސް ކަމުގައިވާ މެޑްރިޑްގައި ބޭއްވުނު ޔޫރަޕިއަން ސޮސައިޓީ އޮފް ކާޑިއޮލޮޖީގެ އަހަރީ ކޮންގްރެސްގައި އެތައް ހާސް ޑޮކްޓަރުންނާ ހިއްސާކުރެވުނެވެ.