ދުވާލަކު ބިހެއް ކާނަމަ ހިތުގެ ބަލިން ދުރުކޮށްދޭ: އައު ދިރާސާ

ދުވާލަކު ކުކުޅު ބިހެއް ކެއުމުން، ހިތުގެ ބަލިން ދުރުކޮށްދޭ ކަމަށް އައު ދިރާސާ އަކުން ހާމަ ވެއްޖެއެވެ.

ދިރާސާ އިން ފެންނަ ގޮތުގައި ދުވާލަކު ކުކުޅުބިހެއް ބޭނުން ކުރުމުން ހިތުގެ ބަލިތަކުގެ އިތުރުން ސްޓްރޯކް ޖެހުމުގެ ފުރުސަތު ކެއުމުގައި ކުކުޅުބިސް ނުހިމަނާ މީހުންނާ އަޅާ ބަލާއިރު ފާހަގަ ކުރެވޭ މިންވަރަކަށް ކުޑަވެއެވެ.

ޗައިނާގެ ޕީކިންގ ޔުނިވަރސިޓީގެ ހެލްތް ސައިންސަސް އިން ކުރިއަށް ގެންދިޔަ މި ދިރާސާގައި 416،213 މީހުންގެ މައުލޫމާތު ބޭނުން ކޮށްފައިވެއެވެ.

މި އެންމެންގެ ސިއްހީ މައްސަލަތައް ނުވަ އަހަރުގެ މުއްދަތަކަށް މި ދިރާސާގައި ބަލާފައިވެއެވެ.

ދިރާސާގެ ހޯދުންތަކާ ބެހޭ ގޮތުން ދިރާސާގައި ބައިވެރިވި ސައިންސްވެރިން ބުނެފައިވަނީ މިދިރާސާއިން ފެންނަ ގޮތުގައި އާދައިގެ މިންވަރަކަށް ކުކުޅުބިސް ބޭނުން ކުރުމުން (ދުވާލަކު އެކަތި) ހިތުގެ ބަލި ޖެހުމުން ދުރުކޮށްދޭ ކަމަށް ސާބިތު ކުރެވޭ ކަމުގައެވެ.

މީގެ ކުރީގެ ދިރާސާތަކަށް ބަލާއިރު ކުކުޅުބިސް ބޭނުން ކުރުމާއި ހިތުގެ ބައްޔާއި ހުރި ގުޅުމެއް މާރަނގަޅަށް ސާފުވެފައި ނެތްކަން ފާހަގަ ކުރެވެއެވެ.

ޗައިނާގެ ސައިންސްވެރިންގެ މި ދިރާސާއަށް ފާޑުކީ ބައެއް ތަޖުރިބާކާރުން ބުނެފައިވަނީ، ކުކުޅު ބިސް ބޭނުން ކުރުމުން ހިތުގެ ބައްޔާއި ސްޓްރޯކް ޖެހުމުން ދުރުކޮށްދޭ ކަމަށް ދިރާސާއިން ހާމަވި ނަމަވެސް، ކުކުޅު ބިހަކީ ހިތުގެ ބައްޔާއި ސްޓްރޯކް ޖެހުމުން ސަލާމަތް ކޮށްދޭ އެއްޗެއް ކަން މި ދިރާސާއިން ސާބިތު ނުވާ ކަމަށެވެ. ސައިންސްވެރިން ބުނާ ގޮތުގައި ހިތުގެ ބައްޔާއި ސްޓްރޯކް ފަދަ ބަލިތަކަކީ ކެއުން ބުއިން ބަހައްޓާ ގޮތުގެ އިތުރުން ދިރިއުޅުމުގެ އާދަތަކާއި ވެސް ގުޅުން ހުރި ބަލިތައް ކަމަށެވެ. އެހެން ކަމުން ވަކި ބާވަތެއްގެ ކާއެއްޗަކާ މިބާވަތުގެ ބައްޔާއި ހުންނަ ގުޅުން ދެނެގަތުމަކީ ފަސޭހައިން ކުރެވޭނެ ކަމެއް ނޫން ކަމަށެވެ.

ދުޅަހެޔޮ ކާނާގެ ތެރޭގައި ކުކުޅުބިސް ހިމެނުމަކީ އެންމެ ރަނގަޅު ކަމެއް ކަމަށް އިނގިރޭސި ސަރުކާރުގެ ކަމާބެހޭ އިދާރާއިން އެގައުމުގެ ރައްޔިތުންނަށް ދީފައިވާ އާއްމު ސިއްހީ އިރުޝާދުގެ ތެރޭގައި ހިމެނޭކަން ފާހަގަ ކުރެވެއެވެ.