އަމިއްލަ ބާރާއި، އިހްތިޔާރާއި، މިނިވަންކަން ރައީސް އޮފީހުގެ ކުޑަކޮޓަރިއެއްގައި ތަޅުލައިގެން ތިބި ގަމާރު ރައްޔިތުންގެ މަޖިލީހެއް މި ނޫނީ ނުދެކެން - މީކާއިލް
މަޖިލިސް މެންބަރުންނަކީ އަމިއްލަ ބާރާއި އިޚްތިޔާރާއި މިނިވަންކަން އެހެން މީހަކާ ހަވާލުކޮށްގެން ތިބި ބައެއް
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް، ކުޑަހުވަދޫގައި ބޭއްވި ޖަލްސާގައި ވާހަކަ ދައްކަވަނީ
އަމިއްލަ ބާރާއި، އަމިއްލަ އިޚްތިޔާރާއި، އަމިއްލަ މިނިވަންކަން އެހެން މީހަކާ ހަވާލުކޮށްގެން ތިބި ގަމާރު ރައްޔިތުންގެ މަޖިލީހުގެ މެންބަރުންނެއް ހަޔާތުގައިވެސް މި ނޫނީ ނުދެކޭ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.
ދ. ކުޑަހުވަދޫގައި އެމްޑީޕީ އިން ބޭއްވި ޖަލްސާގައި ވާހަކަ ދައްކަވަމުން މީކާއިލް ވިދާޅުވީ އެނާ އަކީ ރައީސުލްޖުމްހޫރިއްޔާއަކު، ވެރިކަމުން ދުރުކުރަން ތާއީދުކުރާ މީހެއް ނޫން ކަމަށެވެ. އެހެންނަމަވެސް، ރައީސް މުޢިއްޒަށް އެންމެ ދުވަހެއް ވެސް އިތުރަށް ދީފިނަމަ، ދެން މި ޤައުމު ހޯދައިނުފެންނާނެ ކަމަށް މީކާއިލް ވިދާޅުވިއެވެ. އޭނާ ވިދާޅުވީ އެފަދައިން ދަންނަވަން ޖެހެނީ، ސަރުކާރެއް ބާއްވަން ބޭނުންވަނީ އަދި ސަރުކާރެއް ތަޙައްމަލުކުރަން ބޭނުންވަނީ، އެ ސަރުކާރަކީ ޖަވާބުދާރީކުރުވޭނެ ސަރުކާރަކަށް ވާނަމަ ކަމަށެވެ.
އެހެންނަމަވެސް، ރައީސް މުޢިއްޒުގެ ސަރުކާރަށް މި ވީ ކުޑަ ދުވަސްކޮޅުގައި ދިވެހިރާއްޖޭގައި ސަރުކާރެއް ޖަވާބުދާރީކުރުވޭނެ ދުސްތޫރީ ނިޒާމު އެއްކޮށް ފުނޑާލާފައިވާ ކަމަށެވެ.
ފެއްޓެވި ރައްޔިތުންގެ މަޖިލީހުން. ރައްޔިތުންގެ މަޖިލީހުގައި މިއަދު ރައްޔިތުންގެ މެންބަރުންނެއް ނެތް. ވަރަށް ހިތާމަޔާއެކު ދަންނަވާލަންޖެހޭ. އަޅުގަނޑު ވެސް ނިސްބަތްވާ ރައްޔިތުންގެ މަޖިލީހެއް. އެހެންނަމަވެސް، މިހާ ގަމާރު ރައްޔިތުންގެ މަޖިލީހެއް އަދި އަޅުގަނޑުގެ ހަޔާތަކު ވެސް މުޅި ދުނިޔެއިން ވެސް ނުދެކެން. އެއީ އަމިއްލަ ބާރާއި، އަމިއްލަ އިޚްތިޔާރާއި، އަމިއްލަ މިނިވަންކަން އެހެން މީހަކާ ހަވާލުކޮށްގެން، ހަމަ ހިނިއައިސް ތިރީސް ދެ ދަތް ދައްކައިގެން ކޮންމެ ދުވަހަކު ބަޓަނަށް އޮބަން ތިބޭ ބައެއް މިނޫނިއްޔާ އަޅުގަނޑެއް ނުދެކެން. އިންތިހާއަށް ގަމާރު، އިންތިހާއަށް ގަމާރު ރައްޔިތުންގެ މަޖިލީހެއް. ފެއްޓެވީ ރައްޔިތުންގެ މަޖިލީހުން. ނިޒާމު ހަލާކުކުރުމުގެ މަސައްކަތް ފެއްޓެވީ ރައްޔިތުންގެ މަޖިލީހުން.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މީކާއިލް ވިދާޅުވީ އެންމެ ފަހުން އޮތް ރައްޔިތުންގެ މަޖިލީހުގެ ޖަލްސާއަށް ލިބުނީ، ރައީސް މުޢިއްޒު އަނބުރާ ފޮނުއްވައިލެއްވި ތެލެސީމިއާ ބިލު ކަމަށެވެ. އަދި ހައިރާންވާ ކަމަކީ، މި ބިލަކީ އެންމެ ފުރަތަމައިނުންވެސް ރައީސް މުޢިއްޒުގެ ހެޔޮ ވިސްނުމާއި، ވަރުގަދަ އިރުޝާދުފުޅުގެ ދަށުން އެ މަނިކުފާނުގެ ބަންޑާރަ ނައިބު ރައްޔިތުންގެ މަޖިލީހަށް ފޮނުއްވެވި ތިން ސަފުހާގެ ވަރަށް ކުޑަކުޑަ ބިލެއް ކަމަށެވެ.
އަދި އެ ބިލު ފޮނުއްވިއިރު ވެސް އެމް.ޑީ.ޕީގެ ތިބި ބާރަ މެންބަރުން ބުނަމުންދިޔައީ، މި ބިލަށް އިޞްލާޙު ގެންނަން ޖެހޭ ވާހަކަ ކަމަށާއި، ތެލެސީމިއާ ކުދިންގެ ޢާއިލާތަކާ މަޝްވަރާކުރަން ޖެހޭ ކަމަށެވެ. އަދި އެ ކުދިންގެ އަޑު އަހަން އެބަޖެހޭ ކަމަށް ބުނަމުން ދިޔަ ނަމަވެސް، ޕީ.އެން.ސީގެ ބަދަހި އެކުވެރި ޕީ.ޖީ ގްރޫޕް ވިދާޅުވަމުން ގެންދެވީ، މިއީ ވަރަށް ފުރިހަމަ ބިލެއް ކަމަށެވެ.
މިއީ ވަރަށް ފުރިހަމަ ބިލެކޭ. މި ބިލަށް ހަމަ އެއްވެސް ބަދަލެއް ނުގެނެސް، މިހިނދުން މިހިނދަށް މި ބިލު އެބަ ފާސްކުރަންޖެހޭ، ތެލެސީމިއާ ކުދިންގެ ޙައްޤުގައި. އެހެންނަމަވެސް، އެއްކަލަ ރައީސުލްޖުމްހޫރިއްޔާ ފޮނުއްވެވި ބިލު، އެ ރައީސުލްޖުމްހޫރިއްޔާގެ މަންދޫބުން ފާސްކުރި އެ ބިލު އަނެއްކާވެސް އެ މަނިކުފާނަށް ކަމުނުގޮސްގެން އަޅުގަނޑުމެން މި ޖެހުނީ އެ ބިލު އަނެއްކާވެސް ރައްޔިތުންގެ މަޖިލީހުން ކޮމިޓީއަކުން ގޮތެއް ނިންމަން. އެ ދުވަހު ވިދާޅުވަމުން ގެންދެވި، މި ހާދަހާ ފުރިހަމަ ބިލެކޭ. ސަނާކީކީ ނޫން ގޮސް އަނގައިގައި ޚަބަރު އަހާލިއިރު ވެސް ސަނާކިޔައެއް ނުނިމޭ. އެހެންނަމަވެސް، މިއަދު އަނެއްކާވެސް ވިދާޅުވަމުން އެ ގެންދަވަނީ، މި ބިލަށް އިޞްލާޙު ހުށަހަޅަން އެބަޖެހެއޭ. ސިކުނޑި ވެސް ނެތް. ސިކުނޑިވެސް އެ ތިއްބެވީ ރައީސް ޑޮކްޓަރ މުޢިއްޒާ ހަވާލުކުރައްވައިގެން. އަމިއްލަ ސިކުނޑިވެސް މިހާރު އޮތީ ރައީސް އޮފީހުގެ ކުޑަކުޑަ ކޮޓަރިއެއްގެ ތެރޭގައި ތަޅުލާފަ. އެވަރުގެ ގަމާރު ރައްޔިތުންގެ މަޖިލީހެއް އަޅުގަނޑުމެންނަށް ބޭނުމެއް ނޫން. އެވަރުގެ ގަމާރު ރައްޔިތުންގެ މަޖިލީހުގެ މެންބަރުންނެއް މި ރާއްޖޭގެ ރައްޔިތުންނެއް ބޭނުމެއް ނޫން.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މީކާއިލް ވިދާޅުވީ ފަނޑިޔާރުގެއާ ކުޅުއްވި ބޭފުޅުންނަށް އެންމެ ފަހުން ބޭއްވުނު ރައްޔިތުންގެ މަޖިލީހުގެ ޖަލްސާގައި ދެއްވީ އިނާމު ކަމަށެވެ. މިހާރުވެސް ސިވިލް ސަރވިސް ކޮމިޝަންގެ ރައީސަކަށް ހުންނެވި ބޭފުޅާއަށް އަނެއްކާވެސް އެ ދެއްވީ އިތުރު ފަސް އަހަރު ކަމަށެވެ. އެކަން ކުރައްވަނީ ރައްޔިތުންގެ ފައިސާ އިން ކަމަށް މީކާއިލް ވިދާޅުވިއެވެ.
މީކާއިލް ވިދާޅުވީ ރައްޔިތުންގެ މަޖިލީހުގެ މެންބަރުންނަކަށް ވެސް، ސަރުކާރުގެ ވަޒީރަކަށް ވެސް އަދި ޚުދު ރައީސުލްޖުމްހޫރިއްޔާ އަކަށް ވެސް ސުޕްރީމް ކޯޓުން ވަކިކުރި ތިން ފަނޑިޔާރުންގެ މައްސަލައަކީ ކޮބައިކަމެއް ވިދާޅެއް ނުވާ ކަމަށެވެ. އަދި ޖުޑީޝަލް ސަރވިސް ކޮމިޝަނުގެ މެންބަރުންނަށް ލިބެނީ ކޮމިޓީ ބައްދަލުވުމުގައި ބައިވެރިވާން 7 މިނެޓް ކަމަށާއި، ދިވެހިރާއްޖޭގެ އެންމެ މަތީ ކޯޓުގެ ފަނޑިޔާރުން، ވަކިކުރީ ކޮން ސަބަބަކާ ހުރޭ ކަމެއް އަދި އަދާޖެހެންދެން ވެސް އެ ބޭފުޅުންނަށް ނާންގަވާ ކަމަށެވެ.
އެހެންކަމުން މިއީ އެންމެ ދުވަހަކަށް ވެސް އިތުރަށް ބާއްވަންޖެހޭވަރުގެ ސަރުކާރެއް ނޫން ކަމަށް މީކާއިލް ވިދާޅުވިއެވެ.
