މީޑިއާ ކޮންޓްރޯލް ބިލު ހުށަހެޅުމުގެ ކުރިން ޕީއެންސީގެ ބައެއް މެމްބަރުން ބިލުގެ ވާހަކަ ހިއްސާކުރި ކަމަށާއި ބިލަކީ ސަރުކާރުގެ ބިލެއް ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު ވިދާޅުވެއްޖެއެވެ.

އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުކީ ޕްރޮގްރާމްގައި ވާހަކަދައްކަވަމުންނެވެ.

އޭނާ ވިދާޅުވީ މީޑިއާ ރެގިއުލޭޓްރީ ބިލް މަޖިލީހަށް ހުށަހަޅާފައި ވަނީ އެންމެ ރަނގަޅަށް ކަމަށް ޤަބޫލު ނުކުރާ ކަމަށެވެ. އަދި އެ ބިލަކީ ހަގީގަތުގައި އެ ބިލު ހުށަހެޅުއްވި ތޮއްޑޫ ދާއިރާގެ މެމްބަރު ހަންނާނާއި ގުޅުން ހުރި ބިލެއް ނޫން ކަމަށް ޝަމްހީދު ވަނީ ވިދާޅުވެފައެވެ.

ސަބަބަކީ ބިލު ހުށަހެޅުމުގެ މާ ކުރިން ޕީއެންސީގެ ސީނިއާ ބައެއް މެމްބަރުން މި ބިލުގެ ވާހަކަ އެމްޑީޕީގެ ބައެއް މެމްބަރުންނާއި ހިއްސާކުރުން ކަމަށް ޝަމްހީދު ވަނީ ވިދާޅުވެފައެވެ. ނޫސްވެރިކަން ހަނިކޮށް ނޫސްވެރިންނަށް ބިރު ދައްކަން މި ބިލު ބޭނުން ކުރާ ކަމަށް އޭނާ ވަނީ ސިފަކުރައްވާފައެވެ.

"ވެދާނެ އޮޅިގެން ކަމަށް ވެސް އެ ބޭފުޅުން ބިލް ހުށަހެޅުމުގެ މާ ކުރިން އެ ވާހަކަ ހިއްސާ ކުރެއްވި. ބިލަކީ ހަގީގަތުގައި ހަންނާނުގެ ބިލެއް ނޫން. މި ބިލަކީ ސަރުކާރުގެ ތެރެއިން ޑްރާފްޓް ކުރެވިގެން އައި ބިލެއް. ބިލުގެ އެންމެ ބޮޑު އެއް ކަންބޮޑުވުމަކީ ޤާނޫނު އަސާސީން ލިބިދޭ ހައްގުތައް ހަނިކޮށް ޤާނޫނު އަސާސީން ބޭރަށް ބިލު ދިއުން. މީޑިއާގެ މިނިވަންކަމާއި މައުލޫމާތަކީ ކިހާވަރެއްގެ ކަމެއްކަން މި ބޭފުޅުންނަށް ހަމަ އަންޑަސްޓޭންޑް ނުވަނީ." ޝަމްހީދު ވިދާޅުވިއެވެ.

މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލުގެ މަސައްކަތް އަންނަ މަހުގެ 15ގެ ކުރިން ނިންމާނެ ކަމަށް މިނިވަން މުއައްސަސާތަކުގެ ކޮމެޓީން ވަނީ ނިންމާފައެވެ. މިނިވަން މީޑިއާ ނެތިކޮށްލުމަށް ފަރުވާ ކޮށްފައިވާ މި ބިލު ރައްޔިތުންގެ މަޖިލީހަށް ހުށަހަޅާފައިވަނީ 19 އޯގަސްޓް 2025 ގައެވެ. ދައުރުން ބޭރުގައި ޖަލްސާއެއް ބާއްވައި، މަޖިލީހުން މި ބިލު ބަލައިގަނެފައިވަނީ 27 އޯގަސްޓް 2025 ގައެވެ. ގިނަ އަދަދެއްގެ ނޫސްވެރިންނާއި، އިދިކޮޅު މެންބަރުން އިހުތިޖާޖު ކުރަމުން ދަނިކޮށް ނެގި ވޯޓުގައި މި ބިލު ބަލައިގަތީ ސަރުކާރު ހިންގާ ޕީއެންސީގެ މެޖޯރިޓީ އާއެކު އެވެ. ބިލާ އެއްކޮޅަށް 49 މެންބަރުން ވޯޓު ދެއްވިއިރު ބިލު ބަލައިނުގަންނަން 12 މެންބަރުން ވޯޓު ދެއްވި އެވެ.