މީޑިއާ ކޮންޓްރޯލް ކުރާ ބިލާ މެދު ކަންބޮޑުވުން ފާޅުކޮށް ބައިނަލްއަޤްވާމީ ޖަމްޢިއްޔާތަކުން ރައީސް މުޢިއްޒަށް ސިޓީ އެއް ފޮނުވައިފި
28 އޯގަސްޓު 2025 | ބުރާސްފަތި 18:2116 ބައިނަލްއަޤްވާމީ ޖަމްޢިއްޔާއަކުން މީޑިއާ ބިލާ ގުޅިގެން ރައީސް މުޢިއްޒަށް ވަނީ ސިޓީއެއް ފޮނުވާފަ
ސަރުކާރުން މީޑިއާ ތައް ކޮންޓްރޯލް ކުރަން މަސައްކަތް ކުރަމުން އަނަނާތީ ބައިނަލްއަޤުވާމީ ޖަމްޢިއްޔާތަކުން ކަންބޮޑުވުން ފާޅުކޮށް ރައީސް މުއިއްޒަށް ސިޓީއެއް ފޮނުވުން: މީޑިއާ ބިލް އަނބުރާ ގެންދިއުމަށް ވަނީ ގޮވާލާފަ
ރައްޔިތުންގެ މަޖިލީހަށް ހުށަހެޅިފައިވާ މީޑިއާ އަދި ބްރޯޑްކާސްޓިންގ ރެގިއުލޭޝަން ބިލަކީ ނޫސްވެރިކަމުގެ މިނިވަންކަމަށް ނުރައްކާވާނެ ބިލެއް ކަމަށް ބުނެ، ބައިނަލްއަޤްވާމީ ޖަމްޢިއްޔާތަކުން ރައީސް ޑރ. މުޙައްމަދު މުޢިއްޒަށް ސިޓީއެއް ފޮނުވައިފި އެވެ.
މި ބިލާއި މެދު ކަންބޮޑުވުން ފާޅުކޮށް 16 ޖަމްޢިއްޔާ އެއް އެކުވެގެން ސޮއިކޮށް ރައީސް މުއިއްޒަށް ފޮނުވި މި ސިޓީގައި، މެންބަރު ޢަބްދުލް ޙަންނާން އަބޫބަކުރު ހުށަހަޅުއްވާފައިވާ މި ބިލަކީ ދިވެހިރާއްޖޭގެ ނޫސްވެރިކަމުގެ މިނިވަންކަމަށް ބޮޑު ނުރައްކަލެއް ކަމުގައި ފާހަގަކޮށް، ވަގުތުން ބިލު އަނބުރާ ގެންދިއުމަށް ގޮވާލާފައިވެ އެވެ.
ސިޓީގައި ބުނެފައިވާ ގޮތުގައި، މި ބިލު ފާސްވެއްޖެނަމަ މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނަށް މީޑިއާ ދާއިރާގެ މައްޗަށް ބޮޑެތި ބާރުތަކެއް ލިބިގެންދާނެއެވެ. މީގެ ތެރޭގައި މީޑިއާ އައުޓްލެޓްތައް ހުއްޓުވުމާއި، ނޫސްތަކުގެ ވެބްސައިޓްތައް ބްލޮކްކުރުމާއި، ބްރޯޑްކާސްޓް ހުއްޓުވުމުގެ ބާރު ލިބިގެން ދިއުން ހިމެނެ އެވެ.
މީގެ އިތުރުން ބިލުގައި ހިމެނޭ ޖޫރިމަނާތަކުގެ ތެރޭގައި އަމިއްލަ ނޫސްވެރިންނަށް 5,000 އިން 25,000 ރުފިޔާއާ ހަމައަށް، އަދި މީޑިއާ އައުޓްލެޓްތަކަށް 100,000 ރުފިޔާއާ ހަމައަށް ޖޫރިމަނާ ކުރެވޭނެ ކަމަށް ބަޔާންކޮށްފައިވާކަން މި ސިޓީގައި ފާހަގަކޮށްފައިވެ އެވެ.
ސިޓީގައި ސޮއިކޮށްފައިވާ ޖަމްޢިއްޔާތަކުގެ ތެރޭގައި އިންޓަނޭޝަނަލް ފެޑެރޭޝަން އޮފް ޖަރނަލިސްޓްސް (އައިއެފްޖޭ)، ކޮމިޓީ ޓު ޕްރޮޓެކްޓް ޖަރނަލިސްޓްސް (ސީޕީޖޭ)، ހިއުމަން ރައިޓްސް ވޮޗް (އެޗްއާރްޑަބްލިއު) އަދި މޯލްޑިވްސް ޖަރނަލިސްޓްސް އެސޯސިއޭޝަން (އެމްޖޭއޭ) ހިމެނެ އެވެ.
ބައިނަލްއަޤުވާމީ ޖަމްޢިއްޔާތަކުން ރައީސް މުއިއްޒަށް ފޮނުވި މި ސިޓީގައި ފާހަގަކޮށްފައިވާ ގޮތުގައި، މި ބިލު އެކުލަވާލުމުގައި ނޫސްވެރިންނާއި، މީޑިއާ އައުޓްލެޓްތަކާއެކު އެކަށީގެންވާ މަޝްވަރާއެއް ކުރެވިފައި ނުވެއެވެ. އަދި މިފަދަ ބިލެއް ތައްޔާރުކުރުމުގައި މީޑިއާ ދާއިރާގެ ފަރާތްތަކާއެކު ފުޅާ ދާއިރާއެއްގައި މަޝްވަރާކުރުމަކީ މުހިންމު ކަމެއް ކަމުގައި ވެސް ސިޓީގައި ބަޔާންކޮށްފައިވެ އެވެ.
މި ސަރުކާރުން ހުށަހަޅާފައިވާ މީޑިއާތަށް ކޮންޓްރޯލް ކުރާ މި ބިލަކީ ދިވެހިރާއްޖޭގެ ޤާނޫނުއަސާސީގެ 27 ވަނަ މާއްދާއިން ކަށަވަރުކޮށްދީފައިވާ ޚިޔާލުފާޅުކުރުމުގެ މިނިވަންކަމާއި، 28 ވަނަ މާއްދާއިން ކަށަވަރުކޮށްދީފައިވާ ނޫސްވެރިކަމުގެ މިނިވަންކަމާ ޚިލާފު ބިލެއް ކަމަށް ވެސް މި ސިޓީގައި ބުނެފައިވެ އެވެ.
