ބިލުގެ މަސައްކަތް ކުރިއަށް ގެންދިއުން މުހިންމު, ކަމާ ގުޅުހުން ހުރި އިދާރާތަކާއި ނޫސްތަކުގެ ބޭފުޅުން ކޮމިޓީއަށް ހާޒިރުކުރުމަށް ނިންމައިފި
އެ ބޭފުޅުން ބޭނުންވާ އިސްލާހުތައް ވެސް ލިޔުމުން ހުށަހެޅުމަށް ފުރުސަތު ދިނުމަށް ވެސް ނިންމާފައިވޭ
މިނިވަން މީޑިއާގައި ތަޅުއަޅުވާ ބިލާ ދެކޮޅަށް ނޫސްވެރިން މުޒާހަރާ ކުރަނީ
މީޑިއާ ކޮންޓްރޯލް ކުރާ ބިލުގެ މަސައްކަތް ކުރިއަށް ގެންދިއުން މުހިންމުކަން ފާހަގަކޮށް، ކަމާ ގުޅުހުން ހުރި އިދާރާތަކާއި ނޫސްތަކުގެ ބޭފުޅުން ކޮމިޓީއަށް ހާޒިރުކުރުމަށް ނިންމައިފިއެވެ.
ބުރާސްފަތި ދުވަހު ގާތްގަނޑަކަށް 5 މިނެޓަށް ކުރިއަށް ގެންދިޔަ މިނވަން މުއައްސަސާތަކާ ބެހޭ ކޮމިޓީއިން ނިންމާފައިވަނީ ރަޖިސްޓަރޑް ނޫސްތަކާއި، ކަމާއި ގުޅުންހުރި އިދާރާތަކުގައި ތިއްބަވާ ބޭފުޅުންނާ ބައްދަލުކޮށް މި ބިލާ ގުޅޭގޮތުން ލަފަޔާ މަޝްވަރާ ހޯދުމަށެވެ. އެބޭފުޅުން ބޭނުންވާ އިސްލާހުތައް ވެސް ލިޔުމުން ހުށަހެޅުމަށް ފުރުސަތު ދިނުމަށް ވެސް ނިންމާފައިވެއެވެ.
މި މަސައްކަތްތައް އަންނަ ހަފުތާގައި ކުރިއަށް ގެންދިޔުމަށް ވެސް ކޮމިޓީން ވަނީ ނިންމާފައެވެ.
އާއްމުކޮށް މިފަދަ ބިލުތައް ހުށަހެޅުނީމަ ކަމާގުޅުންހުރި ހުރިހާ ފަރާތްތަކާ މަޝްވަރާ ކުރަން. އެހެންވީމަ އަޅުގަނޑު ގަސްތު ކުރަނީ އަންނަ ހަފްތާގެ އާދިއްތަ ދުވަހުން ފެށިގެން އާދިއްތަ، ހޯމަ، އަންގާރަ ތިން ދުވަސް. ދެން އަޅުގަނޑުމެން ކަނޑައަޅާ މިސާލަކަށް ރަޖިސްޓަރޑް ނޫސްތަކާއި، ނޫސްމަޖައްލާތަކާއި، އިތުރަށް މިކަމާ ގުޅުންހުރި އިދާރާތަކާއި ބައްދަލުކޮށް އެބޭފުޅުންގެ ލަފަޔާ މަޝްވަރާ މިކަމުގައި ހޯދުން. ހަމައެއާއެކު އެބޭފުޅުން ބޭނުންވާ އިސްލާހުތައް ވެސް ލިޔުމުން ހުށަހަޅާ ގޮތަށް.ކޮމެޓީގެ މުގައްރިރު، މާފުށި ދާއިރާގެ މެންބަރު ހުސެއިން ރިޒާ އާދަމް
ކޮމެޓީގައި ވާހަކަ ދައްކަވަމުން، ކެލާ ދާއިރާގެ މެންބަރު އަބްދުﷲ ޝަރީފް ވިދާޅުވީ މިއީ ވަރަށް މުހިންމު ބިލެއް ކަމަށާއި، މިވަގުތު މި މަސައްކަތް ކުރިއަށްގެންދަން ވަރަށް މުހިންމު ކަމަށެވެ.
މީޑިއާ ކޮންޓްރޯލް ކުރާ މި ބިލު ރައްޔިތުންގެ މަޖިލީހުން މި ބިލު ބަލައިގެންފައިވަނީ އެ ބިލާމެދު އެތައް ކަންްބޮޑުވުމެއް ނޫސްވެރިން ފާޅުކުރަމުން ދަނިކޮށް 27 އޮގަސްޓް 2025 ގައެވެ. އިދިކޮޅު މެންބަރުން އިހުތިޖާޖު ކުރަމުން ދަނިކޮށް ނެގި ވޯޓުގައި މި ބިލު ބަލައިގަތީ ސަރުކާރު ހިންގާ ޕީއެންސީގެ މެޖޯރިޓީ އާއެކު އެވެ. ބިލާ އެއްކޮޅަށް 49 މެންބަރުން ވޯޓު ދެއްވިއިރު ބިލު ބަލައިނުގަންނަން 12 މެންބަރުން ވޯޓު ދެއްވި އެވެ.
ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ހުށަހެޅުއްވި މީޑިއާ ނެތިކޮށްލާ ބިލު ފަރުމާކޮށްފައި އޮތީ މިނިވަންކަމާއެކު ނޫސްވެރިކަން ކުރެވޭނެ މަގު ބަންދު ކުރެވޭނެ ގޮތަށެވެ. އެ ބިލުގެ ދަށުން ކޮމިޝަނެއް އުފައްދައި، އެ ކޮމިޝަނުގެ ބާރު ރައީސް ޑރ.މުހައްމަދު މުއިއްޒަށް ނެގޭނެ މަގު ވެސް ބިލުން ފަހިވެ އެވެ.
