ނޫސްވެރިންގެ އިހުތިޖާޖަށް ހުރަސްއަޅައި، ހައްޔަރު ކުރުމުން ސީޕީޖޭއިން އެކަން ކުށްވެރިކޮށްފި

ނޫސްވެރިން ކޖުރަމުން ދިޔަ އިހުތިޖާޖަށް ހުރަސް އަޅައި ނޫސްވެރިން ހައްޔަރު ކުރި މައްސަލަ ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ކުށްވެރިކޮށްފި އެވެ.

ސޯޝަލް މީޑިއާގައި ކުރި ޕޯސްޓެއްގައި ސީޕީޖޭ އިން ބުނީ، ބިލާ ދެކޮޅަށް މުޒާހަރާ ކުރި ނޫސްވެރިން ހައްޔަރު ކުރުމުން ކަންބޮޑުވާ ކަމަށެވެ. އަދި ބިލާމެދު ނޫސްވެރިންގެ ހުރި ކަންބޮޑުވުންކަން ފާހަގަ ކުރުމުން ނޫސްވެރިންނަށް އަމާޒުކޮށް ފިޔަވަޅު އެޅުމަކީ ބޮޑު ގޯހެއް ކަމަށް ވެސް އެ ޖަމިއްޔާއިން ބުންޏެވެ.

މިނިވަން މީޑިއާ ނެތިކޮށްލާ ސަރުކާރުގެ ބާރުގެ ދަަށަށް މީޑިއާ ދާނެ ގޮތަށް ފަރުމާކޮށްފައި އޮތް ބިލު އަނބުރާ ގެންދަން ރައީސް [މުހައްމަދު] މުއިއްޒަށް ގޮވާލަން

ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ)

ނޫސްވެރިން ބުދަ ދުވަހު ރައީސް އޮފީސް ކައިރިއަށް މުޒާހަރާ ކުރަން ދިޔައީ ބިލު ބަލައިގަތުމަށް ރައްޔިތުންގެ މަޖިލީހުން ފާސް ކުރުމުންނެވެ. އިހުތިޖާޖު ކުރަމުން ދިއަ ނޫސްވެރިން ބުދަ ދުވަހު ހައްޔަރު ކުރި ނޫސްވެރިންގެ ތެރޭގައި ސިޓިޒެން ނޫހުގެ މޫސާ ރަޝީދު، އަދަދު ނޫހުގެ އަހުމަދު އާއިދު އަދި އެމްވީ ޕްލަސްގެ ލަމްޔާ އަބްދުލްހާދީ އަދި ދައުރު ނޫހުގެ މުޒައްޔިން ނާޒިމް ހިމެނެ އެވެ.

އެ ނޫސްވެރިން ހައްޔަރު ކުރުމަށްފަހު ޖިޕަށް އަރުވައި ހައްޔަރު ކުރިކަމުގެ ރަސްމީ ނޯޓިސް ވެސް އަނގަބަހުން ދިނެވެ. ޕޮލިސް ސްޓޭޝަނަށް ނުގެންގޮސް ނޫސްވެރިން ދޫކޮށްލީ މުޒާހަރާ ނުކުރާން ޝަރުތު ކުރުމަށްފަހު އެވެ.

ނޫސްވެރިން ހައްޔަރު ކުރުމުން އިދިކޮޅު މޯލްޑިވިއަން ޑިމޮކްރެޓިކް ޕާޓީ އިން ވެސް ވަނީ އެކަން ކުށްވެރިކޮށްފަ އެވެ. އެމްޑީޕީއިން ބުނީ މިނިވަން މީޑިއާ ނެތިކޮށްލާ ބިލަކީ ގާނޫނުއަސާސީއާ ހިލާފު ބިލެއް ކަމަށެވެ.

ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ހުށަހެޅުއްވި މީޑިއާ ނެތިކޮށްލާ ބިލު ފަރުމާކޮށްފައި އޮތީ މިނިވަންކަމާއެކު ނޫސްވެރިކަން ކުރެވޭނެ މަގު ބަންދު ކުރެވޭނެ ގޮތަށެވެ. އެ ބިލުގެ ދަށުން ކޮމިޝަނެއް އުފައްދައި، އެ ކޮމިޝަނުގެ ބާރު ރައީސް މުހައްމަދު މުއިއްޒަށް ނެގޭނެ މަގު ވެސް ބިލުން ފަހިވެ އެވެ.

އެ ބިލުގައި މިހާރު އޮތްގޮތުން ވަކިވަކި ނޫސްވެރިންނަށާއި ނޫސްތައް ޖޫޫރިމަނާކޮށް، ހުއްޓުވައި، ރެޖިސްޓްރޭޝަން ވެސް ބާތިލު ކުރެވޭނެ އެވެ.

އެ ބިލުގެ 60 ވަނަ މާއްދާގައި ބުނެފައިވާ ގޮތުން އެ ބިލުގެ ބާރު ސޯޝަލް މީޑިއާއަށް ވެސް ހިނގާނެ އެވެ. އެ މާއްދާގައި ބުނެފައި ވަނީ "މި ގާނޫނުގައި ނޫހާ ގުޅޭ ގޮތުން ބަޔާންކޮށްފައިވާ އުސޫލުތައް، އިލެކްޓްރޯނިކް މީޑިއާއަށް ވެސް އެ މީޑިއާއަކާ ގުޅޭ ނިސްބަތަކުން ހިނގާނެ" ކަމަށެވެ.

އެހެންކަމުން ސަރުކާރުން ބޭނުންވާ ގޮތަށް އެ ބިލު ފާސްވެއްޖެ ނަމަ، ސޯޝަލް މީޑިއާގައި ވެސް މިނިވަންކަމާއެކު ހިޔާލުފާޅު ކުރުމަށް ހުރަސްއެޅޭނެ އެވެ. ބިލުގެ 40 ވަނަ މާއްދާގެ ހ. ގައި ބުނެފައިވާ ގޮތުން، ދޮގަކަށް ވެދާނެ ފަދަ މައުލޫމާތެއް ވެސް ނޫހެއްގައި ޖެހުމަކީ ކުށެކެވެ.

އެ ބިލު ބޭރުކޮށްލުމަށް ރާއްޖޭގެ ނޫސްވެރިންނާއި ހައްގުތަކަށް ވަކާލާތު ކުރާ ބޭރުގެ ވަރަށް ގިނަ ޖަމިއްޔާތަކުން ވެސް ދަނީ ގޮވާލަމުންނެވެ.