މީޑިއާ ކޮންޓްރޯލް ކުރާ ބިލު ފާސްކުރި ނަމަވެސް ރައްޔިތުންގެ ދުލުގައި ގޮށް ނުޖެހޭނެ ކަމަށްކުރީގެ ޑިފެންސް މިނިސްޓަރު އަދި އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ވިދާޅުވެއްޖެ އެވެ.

މީޑިއާ ކޮންޓްރޯލް ކުރާ ބިލާ ދެކޮޅަށް ރައްޔިތުންގެ މަޖިލިސް ސަރަހައްދަށް އެމްޑީޕީގެ ގިނަ މެންބަރުން ހިމެނޭ ގޮތަށް ގިނަ އަދަދެއްގެ އާއްމުން ވަނީ އެއްވަފަ އެވެ. އެސަރަހައްދުގައި ހުންނަވައި ރާއްޖެއެމްވީއަށް މާރިޔާ ވިދާޅުވީ ޕީއެންސީގެ މެންބަރުން މީޑިއާ ކޮންޓްރޯލް ކުރާ ބިލަށް ތާއީދުކޮށް ފާސްކުރި ނަމަވެސް ރައްޔިތުންގެ ދުލުގައި ގޮށް ނުޖެހޭނެ ކަމަށެވެ.

މިސަރުކާރަށް މިހާރު ތައީދު ނެތްކަން ފާހަގަކުރައްވައި މާރިޔާ ވިދާޅުވީ މިއީ ހަރާންކޯރު ސަރުކާރެއް ކަމަށާއި، ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވީ ވެސް ދޮގު ހައްދަވައިގެން ކަމަށެވެ.

މާރިޔާ ވިދާޅުވީ އެމްޑީޕީން އެއްވެސް އިރެއްގައި ދޮގާއި މަކަރު ހަދައިގެން ވެރިކަމަށް އައުމަށް މަސައްކަތް ނުކުރާ ކަމަށާއި، ނަމަވެސް މިސަރުކާރުގެ ބޭފުޅުންނަށް އެގޮތަށް ހީވާނެ ކަމަށެވެ. އެއީ އެބޭފުޅުން އަމަލު ކުރެއްވި ގޮތުން ކަމަށް އޭނާ ވިދާޅުވި އެވެ.

މާރިޔާ ވިދާޅުވީ ވެރިކަމަށް އައުމަށް މަސައްކަތް ކުރާނީ ވައުދުތަކާއެކުމ ހިސާބު ޖަހައިގެން ކަމަށާއި، ސިޔާސީ ހަރަކާތްތައް ހިންގަމުންދަނީ ރޭވިގެން ކަމަށެވެ.