ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނަށް އިއްޔެ އަމަލުކުރަން ފެށުމާއެކު، ނުހައްގު މުއްސަނދިކަމުގެ މައްސަލަތައް ބަލައި، ކުށްކޮށްގެން ހޯދާފައި ހުރި މުދާތައް ދައުލަތަށް ނެގުމުގެ މަސައްކަތް ފަށާފައިވާ ކަމަށް ފުލުހުން ހާމަކޮށްފި އެވެ.

ފުލުހުންގެ ހިދުމަތުން ބުރާސްފަތި ދުވަހު ނެރުނު ނޫސް ބަޔާނުގައި ބުނެފައިވަނީ، އައު ގާނޫނު ތަންފީޒުކުރުމުގެ މަސައްކަތް ޕްރޮސެކިއުޓާ ޖެނެރަލްގެ އޮފީހާ ގުޅިގެން ކުރިއަށް ގެންދާ ކަމަށެވެ. މި މަސައްކަތުގެ ދަށުން އެންމެ އިސްކަމެއް ދެނީ ނުހައްގު މުއްސަނދިކަން ހުއްޓުވައި، އެފަދަ މުދާ ދައުލަތަށް ނެގުމަށެވެ.

ގާނޫނުގެ ދަށުން ފުލުހުންނަށް ލިބިދޭ އިތުރު ބާރުތަކުގެ ތެރޭގައި، ހައި ކޯޓު މެދުވެރިކޮށް ގޭންގުތަކުގެ މެންބަރުން މޮނިޓަރ ކުރުމުގެ އަމުރުތައް ހޯދުމާއި، ގޭންގުތަކުގެ ހަރަކާތްތަކުގައި ކުޑަކުދިންގެ ބައިވެރިވުން ހުއްޓުވުމަށް އަމުރުތައް ނެރުން ހިމެނެ އެވެ. މީގެ އިތުރުން، ގޭންގުތައް އެއްވާ ސަރަހައްދުތަކުގައި ހަރަކާތްތެރިވާ ފުލުހުންގެ އަދަދު އިތުރުކޮށް، އެ ފަރާތްތަކުން ބޭނުންކުރާ ތަންތަން ބަލައި ފާސްކުރުމަށްވެސް ހާއްސަ އިސްކަމެއް ދޭނެ ކަމަށް ފުލުހުން ބުނެފައިވެ އެވެ.

އައު ގާނޫނުގެ ދަށުން ފުލުހުންނަށް ލިބިދޭ މުހިންމު ބާރުތަކުގެ ތެރޭގައި، ކޯޓު އަމުރަކާ ނުލައި މީހުން ބަލައި ފާސްކުރުމާއި ހައްޔަރުކުރުމުގެ އިތުރުން، އަމިއްލަ ތަނަކުން މީހަކު ހައްޔަރުކުރުމަށްފަހު އެ ތަނެއް ބަލައި ފާސްކުރުމުގެ ބާރު ހިމެނެއެވެ. އަދި އެއްގަމާއި ކަނޑުގައި ދުއްވާ އުޅަނދުފަހަރު ބަލައި ފާސްކުރުމާއި، އުޅަނދުގައިވާ މީހުންގެ ސާމްޕަލް ނެގުމުގެ ބާރުވެސް ލިބިދެ އެވެ.

ގާނޫނުގައި ފާހަގަކޮށްލެވޭ އެހެން ކަންތައްތަކުގެ ތެރޭގައި، ގޭންގު ކުށްތަކުގެ ތުހުމަތުގައި ހައްޔަރުކުރެވޭ މީހުންގެ މައްޗަށް ކުށް ސާބިތު ނުވިނަމަވެސް އެމީހުންގެ މުދާ ދައުލަތަށް ނެގުމުގެ ބާރު ހިމެނެއެވެ. އަދި މިފަދަ ކުށެއްގައި ހައްޔަރުކުރެވޭ މީހަކަށް 48 ގަޑިއިރުގެ މުއްދަތަށް ގާނޫނީ ވަކީލަކާ ބައްދަލުކުރުމުގެ ހައްގު ހިފެހެއްޓުމުގެ ބާރުވެސް ގާނޫނުން ލިބިދެ އެވެ.

މި ގާނޫނު މެއި 25 ގައި ތަސްދީގުކުރެއްވުމަށްފަހު ރައީސް މުހައްމަދު މުއިއްޒު ވިދާޅުވެފައިވަނީ، މި ގާނޫނާއެކު ގޭންގު ކުށްތައް ހުއްޓުވުމަށް ސަރުކާރުން ކުރާ މަސައްކަތް ކާމިޔާބުވާނެ ކަމަށެވެ. ސަރުކާރުގެ ފަރާތުން މައްޗަންގޮޅި ދެކުނު ދާއިރާގެ މެންބަރު މުސްތަފާ ހުސައިން ހުށަހެޅުއްވި މި ބިލު، ޖުޑީޝަރީ ކޮމިޓީން ދިރާސާކޮށް، ގެނައި އިސްލާހުތަކާއެކު މެއި 15 ގައި މަޖިލީހުން ފާސްކޮށްފައިވަނީ 55 މެންބަރުންގެ ވޯޓުންނެވެ.