ފިނޭންސް މިނިސްޓަރު މޫސާ ޒަމީރުގެ އެޑްވައިޒަރަކަށް ކުރީގެ މިނިސްޓަރު ހަމްދޫން އަބްދުﷲ ހަމީދު އައްޔަންކުރައްވައިފި އެވެ.

ހަމްދޫން އެ މަގާމަށް އައްޔަންކުރައްވާފައިވަނީ މިނިސްޓަރު ފެންވަރުގައެވެ.

ފިނޭންސްއިން މިއަދު މައުލޫމާތު ދިން ގޮތުގައި ހަމްދޫން އައްޔަންކުރައްވާފައިވަނީ އެ މިނިސްޓްރީގެ ދަށުން ހިންގާ ނެޝަނަލް ޕްލޭނިންގެ މަސައްކަތްތަކުގެ އެޑްވައިޒަރަކަށެވެ.

ހަމްދޫން ހަމީދަކީ ކުރީގެ ރައީސް މައުމޫން އަބްދުލްގައްޔޫމާއި ރައީސް އަބްދުﷲ ޔާމީނަށް ބޮޑުބޭބެ ވިދާޅުވާ ބޭފުޅެކެވެ. ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރުކަން ކުރިން ކުރައްވާފައިވާ އަދި ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ޕްލޭނިން މިނިސްޓަރުގެ މަގާމު ވެސް ހަމްދޫން ވަނީ ފުރުއްވާފައިވާއެވެ. އަދި ރައީސް ޔާމީން ވެރިކަމުގައި ހަމްދޫން ހަމީދު ހުންނެވީ ސިންގަޕޫރަށް ކަނޑައެޅި ނޮން-ރެސިޑެންޓް ސަފީރުގެ މަގާމުގައެވެ.

އެނގިފައިވާ ގޮތުގައި ހަމްދޫން ހަމީދު، މިނިސްޓަރު ޒަމީރަށް ލަފާ ދެއްވަނީ ރައީސް މުއިއްޒު އިއުލާން ކުރައްވާފައިވާ ދިވެހިރާއްޖޭގެ 20 އަހަރުގެ ގައުމީ ތަރައްގީގެ ޕްލޭން ތަންފީޒުކުރުމަށް ކުރާ މަސައްކަތްތަކަށެވެ.

ހަމްދޫން އެ މަގާމަށް އައްޔަން ކުރިކަމަކަށް ރަސްމީކޮށް ހާމަކޮށްފައެއް ނުވެއެވެ.