ޔޫރަޕުގެ ލީޑަރުންނާ ބައްދަލު ކުރުމަށް ފަހު، ޕުޓިންއާ ވާހަކަ ދެއްކިން: ޓްރަމްޕް

ރަޝިޔާ އާއި ޔުކްރެއިންއާ ދެެމެދު ހިނގަމުން އަންނަ ހަނގުރާމައިގެ މައްސަަލައިގައި ޔޫރަޕުގެ ލީޑަރުންނާ އެކު ބޭއްވި ބައްދަލުވުމަށް ފަހު، ރަޝިޔާގެ ރައީސް ވުލަޑިމިއަރ ޕުޓިންއާ ވާހަކަ ދައްކާފައިވާ ކަަމށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް އެންމެ ފުރަތަމަ ވަނީ އެލަސްކާގައި ޕުޓިން އާއެކު ވަކި ބައްދަލުވުމެއް ބާއްވައިފަ އެވެ. އެ ބައްދަލުވުމުގައި ހަނގުރާމަ ނިންމުމަށް އެއްބަސްވެވޭނެ ކަމަށް ބެލެވުނު ނަމަވެސް، ބައްދަލުވުން ނިމުނީ އެ ފަދަ އެއްވެސް އެއްބަސްވުމެއް ޤާއިމު ނުކުރެވި އެވެ.

އޭގެ ފަހުން ޔުކްރެއިންގެ ރައީސް ވުލޮޑިމިއަރ ޒެލެންސްކީ ވަނީ އެމެރިކާ އަށް ވަޑައިގެން، ރިޔާސީ ގަނޑުވަރު ވައިޓް ހައުސްގައި ޓްރަމްޕްއާ ބައްދަލު ކުރައްވައިފަ އެވެ. އެ ބައްދަލުވުމުގައި ފްރާންސްގެ ރައީސް މެކްރޮންގެ އިތުރުން، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ، ޖަރުމަނުގެ ޗާންސެލަރ ފްރީދްރިޝް މެޔަަޓްޒް، އިޓަލީގެ ބޮޑު ވަޒީރު ޖޯޖިއާ މެލޯނީ، ޔޫރަޕިއަން ކޮމިޝަންގެ ރައީސް އުރުސުލާ ވޮން ޑި ލެޔެން އަދި ނޭޓޯގެ ސެކްރެޓަރީ ޖެނަރަލް މާކް ރުޓޭ ވެސް ވަނީ ބައިވެރިވެ ވަޑައިގެންފަ އެވެ.

އެ މަޝްވަރާތައް ކުރިއަށް ގެންދިޔަ ދުވަހު، މަޝްވަރާތަކުގެ ވަކި ހިސާބަކުން ޓްރަމްޕް ވަނީ ޕުޓިން އަށް ފޯނުން ގުޅުއްވައި ވާހަކަ ދައްކަވައިފަ އެވެ. ޔޫރަޕުގެ ލީޑަރުންނާ އެކު ކުރިއަށް ގެންދިޔަ ބައްދަލުވުމަށް ފަހު ޕުޓިންއާ ވާހަކަ ދައްކާފައިވޭތޯ ނޫސްވެރިޔަކު ސުވާލު ކުރުމުންް ޓްރަމްޕް ވިދާޅުވީ، ޕުޓިންއާ ވާހަކަ ދައްކަވާފައިވާ ކަމަށެވެ.

އެގޮތުން އެންމެ ފަހުން ޕުޓިން އާއެކު ކުރެވުނު މަޝްވަރާތަކާ ގުޅޭ ގޮތުން ވާހަކަ ދައްކަވަމުން ޓްރަމްޕް ވިދާޅުވީ، ޕުޓިން އާއެކު ކުރެވޭ ކޮންމެ މަޝްވަރާ އަކީ ވެސް ރަނގަޅު މަޝްވަރާތަކެއް ކަމަށެވެ. ނަމަވެސް އެންމެ ބޮޑު ހިތާމަ އަކީ، ރަޝިޔާ އިން ޔުކްރެއިން އަށް ހަމަލާތައް ދީ، ބޮން އަޅަމުން އަންނަ އައުކަން ފާހަގަ ކުރައްވައި ޓްރަމްޕް ވިދާޅުވީ، އެކަމާ އޭނާ ވަރަށް ރުޅި އަންނަ ކަމަށެވެ.

ޕުޓިން އާއެކު ކުރިއަށް ގެންދިޔަ ބައްދަލުވުމަށް ފަހު ޓްރަމްޕް ވިދާޅުވެފައި ވަނީ، ޔުކްރެއިންގެ ރައީސް ޒެލެންސްކީ ހިމެނޭހެން، ތިން ރައީސުންގެ ބައްދަލުވުމަކަށް ޕުޓިން އެއްބަސްވެފައިވާ ކަމަށެވެ. ނަމަވެސް ރަޝިޔާ އިން ބުނެފައި ވަނީ މިހާތަނަށް އެ ފަދަ ބައްދަލުވުމަކަށް އެއްބަސްވެފައި ނެތް ކަމަށާއި، އެ ފަދަ ކަމެއްގެ ޕްލޭނެއް ވެސް ނެތް ކަމަށެވެ.

ޒެލެންސްކީއާ އެކު ބައްދަލު ކުރުމަށް ޕުޓިން ޤަބޫލު ނުވާ ސަަބަބެއް ރަސްމީކޮށް ހާމަކޮށްފައި ނުވެ އެވެ. ނަމަވެސް ޓްރަމްޕްއާ އެ ސުވާލު އަމާޒު ކުރުމުން ޓްރަމްޕް ވިދާޅުވެފައި ވަނީ، ޒެލެންސްކީއާ ބައްދަލު ކުރުމަށް ޕުޓިން ދެކޮޅު ހަދަނީ ޒެލެންސްކީ ދެކެ ނުރުހޭތީ ކަމަށެވެ.

އިތުރަށް ވާހަކަ ދައްކަވަމުން ޓްރަމްޕް ވިދާޅުވީ ރަޝިޔާ-ޔުކްރެއިން ހަނގުރާމަ ނިންމުމަށް ކުރަމުން އަންނަ މަސައްކަތުގައި އަދިވެސް އޭނާ އަށް އުންމީދު އޮތް ކަމަށެވެ. އަދި ވަރަށް އަވަސް މުސްތަޤުބަލެއްގައި ހަނގުރާމަ ނިންމާލެވޭނެ ކަމަށް "ހީކުރައްވާ" ކަމަށް ޓްރަމްޕް ވިދާޅުވެފައިވެ އެވެ.

އެމެރިކާގެ ރިޔާސީ ދެ ވަނަ ދައުރަަކަށް ޓްރަމްޕް ވަޑައިގެންނެވިއިރު، މި ހަނގުރާމަ ނިންމުމުގެ ވާހަކަ އޭނާ ވަރަށް ބޮޑަށް ދެއްކެވި އެވެ. އެގޮތުން ރިޔާސީ އިންތިޚާބުގެ ކެމްޕެއިންގެ ތެރޭގައި ޓްރަމްޕް ވިދާޅުވެފައި އޮތީ، އެއް ދުވަހުގެ ތެރޭގައި ހަނގުރާމަ އޭނާ އަށް ނިންމޭނެ އެވެ.

ނަމަވެސް މިހާތަަނަށް އައިއިރު، ހަނގުރާމަ ނިންމުމަށް ޓްރަމްޕް ކުރައްވާ މަސައްކަތް ކާމިޔާބުވެފައި ނުވެ އެވެ. މި ފަހުން ޕުޓިންއާ ބައްދަލު ކުރެއްވުމުގެ ކުރިން ޓްރަމްޕް ވަނީ ވަރަށް ބޮޑަށް ޕުޓިން އަށް ވެސް ފާޑު ވެސް ވިދާޅުވެފަ އެވެ. އަދި ޕުޓިން ދެކެ ނުރުހުންވެފައި ހުންނެވި ކަމަަށް ވެސް ވިދާޅުވި އެވެ.

އޭގެ ފަހުން އެލަސްކާގައި ބޭއްވި ބައްދަލުވުމަށް ފަހު ޕުޓިން އަށް ވަރަށް ބޮޑަށް ތައުރީފު ކުރައްވައި ޓްރަމްޕް ވިދާޅުވެފައި ވަނީ، ޕުޓިން އަކީ ވަރަށް ސްމާޓް ބޭފުޅެއް ކަމަށެވެ. އަދި އެ ބައްދަލުވުމަށް ފަހު ޓްރަމްޕް ގެންދަވަނީ ޕުޓިންއާ އެކު ގާތް ގުޅުމެއް އޮންނަ މޭރުމުން ވާހަކަ ދައްކަވަމުންނެވެ.