ކުޑަކުދިންނަށް ކުރާ އަނިޔާއާ ގުޅިގެން ރިޕޯޓުކުރާ މައްސަލަތައް އިތުރު، އެންމެ ގިނައީ ޖިންސީ ގޯނާގެ މައްސަލަ!
25 އޯގަސްޓު 2025 | ހޯމަ 13:48ޖުލައި މަހު ކުޑަކުދިންނަށް ކުރާ އަނިޔާގެ 93 މައްސަލަ ރިޕޯޓުކުރިއިރު އޭގެ ތެރެއިން 24 މައްސަލައަކީ ޖިންސީ ގޯނާގެ މައްސަލަ
މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ތަފާސްހިސާބުތަކުން ދައްކާ ގޮތުގައި ޖުލައި މަހު ކުޑަކުދިންނަށް ކުރާ އަނިޔާގެ ގޮތުގައި 93 މައްސަލަ ރިޕޯޓުކުރިއިރު އެންމެ ގިނައިން ހުށަހެޅީ ޖިންސީ ގޯނާގެ މައްސަލަތައް
ކުޑަކުދިންނަށް ކުރާ އަނިޔާއާ ގުޅިގެން ރިޕޯޓުކުރާ މައްސަލަތައް އިތުރުވަމުން އަންނަ ކަމަށާއި މިދިޔަ ޖުލައި މަހު އެކަނި ވެސް 93 މައްސަލަ ރިޕޯޓުކޮށްފައިވާއިރު، އޭގެތެރޭގައި ގިނައީ ޖިންސީ ގޯނާގެ މައްސަލަކަމަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ތަފާސްހިސާބުތަކުން ދައްކައިފިއެވެ.
މިދިޔަ ޖުލައި މަހު ކުޑަކުދިންނަށް ކުރާ އަނިޔާގެ ގޮތުގައި 93 މައްސަލަ ރިޕޯޓުކުރިއިރު އެންމެ ގިނައިން މިނިސްޓްރީއަށް ހުށަހެޅީ ޖިންސީ ގޯނާގެ މައްސަލަތަކެވެ. އެފަދަ 24 މައްސަލައެއް ހުށަހެޅިއިރު ދެން އެންމެ ގިނައިން ރިޕޯޓުކުރީ ޖިސްމާނީ އަނިޔާގެ މައްސަލަތަކެވެ. އެފަދަ 21 މައްސަލައެއް ޖުލައި މަހު ރިޕޯޓުކުރިއެވެ. މީގެ އިތުރުން ކުޑަކުދިންނަށް އިހުމާލުވުމުގެ 17 މައްސަލައެއް ހުށަހެޅިއެވެ.
ޖުލައި މަހު އެންމެ ގިނައިން ދެން ހުށަހެޅީ ގެވެށި އަނިޔާގެ މައްސަލަތަކެވެ. އެފަދަ 57 މައްސަލަ ވަނީ ހުށަހަޅައިފައެވެ.
ކުޑަކުދިންނަށް ކުރާ އަނިޔާގެ މައްސަލަތައް މަހުން މަހަށް ރިޕޯޓުކުރާ މިންވަރު އިތުރުވަމުން އަންނަ ކަމަށް ތަފާސްހިސާބުތަކުން ދައްކާއިރު، މެއި މަހު ވެސް އެފަދަ 97 މައްސަލަ ރިޕޯޓުކުރިއެވެ.
ގެވެށި އަނިޔާގެ 57 ކޭސް ޖުލައި މަހު ޖެންޑާ މިނިސްޓްރީއަށް ހުށަހެޅިއެވެ. އޭގެ ތެރެއިން 49 މައްސަލައަކީ އަންހެނުންނަށް ގެވެށި އަނިޔާ ކޮށްގެން ހުށަހެޅި މައްސަލައެވެ. ބާކީ އަށް މައްސަލައަކީ ފިރިހެނުންނަށް ގެވެށި އަނިޔާ ކޮށްގެން ހުށަހެޅި މައްސަލައެވެ.
މިނިސްޓްރީގެ ތަފާސްހިސާބުތަކުން ދައްކާ ގޮތުގައި ޖުލައި މަހުގެ ނިޔަލަށް ދައުލަތުގެ ބެލުމުގެ ދަށުގައި 152 ކުދިން ތިއްބެވެ. އޭގެ ތެރޭގައި ހިމެނެނީ 82 ފިރިހެން ކުދިންނާއި 70 އަންހެން ކުދިންނެވެ.
ޖުލައި މަހު ހަ ކުދިން ވަނީ ދައުލަތުގެ ބެލުމުގެ ދަށަށް ނަގައިފައެވެ. އެއީ ހަތަރު އަންހެން ކުދިންނާއި ދެ ފިރިހެން ކުދިންނެވެ. އަދި އެއް ކުއްޖަކު އާއިލާއާ ގުޅުނުއިރު އެއް ކުއްޖަކު ވަނީ އެޑޮޕްޓުކޮށްފައެވެ.
ކުޑަކުދިންނަށް އެކި ބާވަތުގެ އަނިޔާތައް ކުރުމުގެ މައްސަލަތަކަކީ ދިވެހި މުޖުތަމައުގައި ޒަމާންތަކެއް ވަންދެން ހައްލު ނުލިބި އޮތް މައްސަލައެކެވެ. އޭގެތެރެއިން ވެސް ކުޑަކުދިންނަށް ޖިންސީ ގޯނާ ކުރުމުގެ މައްސަލަތައް މިނިސްޓްރީއަށް ހުށަހަޅާ މިންވަރު އިތުރުކަމަށް ހިސާބުތަކުން ދައްކައެވެ.
