ކުރިއަށް އޮތް ރިޔާސީ އިންތިހާބުގެ ކުރިން ރައީސް ޔާމީން ޖަލަށް ލާނެ ކަމަށް ޕީއެންސީ ޕީޖީ ލީޑަރު ފަލާހް ވިދާޅުވި: އައްބާސް
23 އޯގަސްޓު 2025 | ހޮނިހިރު 14:27ޕީއެންސީގެ ގިނަ ލީޑަރުން ދަނީ ޔާމީނަށް ފާޑުކިޔައި ރައްދު ދިނުމުގެ ގޮތުން ވާހަކަ ދައްކަވަމުން
މެންބަރު މުޙައްމަދު އައްބާސް، ޕީއެންސީ ޕީޖީ ލީޑަރު އިބްރާހިމް ފަލާހް އަދި ކުރީގެ ރައީސް ޔާމީން
ކުރިއަށް އޮތް ރިޔާސީ އިންތިހާބުގެ ކުރިން ކުރީގެ ރައީސް ޔާމީން ޖަލައް ލާނެ ކަމަށް ޕީއެންސީ ޕީޖީ ލީޑަރު އިބްރާހިމް ފަލާހް ތަކުރާރުކޮށް ވިދާޅުވަމުން ގެންދަވާ ކަމަށް ރައްޔިތުން މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.
އައްބާސް އެކްސް ގައި ކުރެއްވި ޕޯސްޓެއްގައި ވިދާޅުވީ، ކުރިއަށް އޮތް ރިޔާސީ އިންތިހާބުގައި ރައީސް ޔާމީން އަށް ވާދަ ނުކުރެވޭނެ ކަމަށާއި ރައީސް ޔާމީން ޖަލައް ލާނެ ކަމަށް ސަރުކާރު ހިންގާ ޕާޓި ޕީއެންސީގެ ޕީޖީ ލީޑަރުގެ އިތުރުން އެޕާޓީގެ މެންބަރުން ވެސް ބުނަމުން ދާކަމަށެވެ.
އަދި އެވާހަކަތައް އެކި ދުވަސް މަތިން ރައްޔިތުންގެ މަޖިލީސް ކުޑަ ދަށުގައި ދެއްކީ އައްބާސް ކުރިމަތީގައި ކަމަށާއި އެއީ ޝަރުއީ ނިޒާމަށް ސަރުކާރުގެ ނުފޫޒު ފޯރުވުމަށް މަސައްކަތް ކުރަމުންދާވަރު ހާމަވާ ކަމެއް ކަމަށްވެސް އައްބާސް ވިދާޅުވި އެވެ.
މިދިޔަ ބުރާސްފަތި ދުވަހު ޔާމީންގެ ޕީޕަލްސް ނެޝަނަލް ކޮންގްރެސް އިން ބޭއްވި ޖަލްސާއަށްފަހު، ފަލާހު ހިމެނޭ ގޮތަށް ޕީއެންސީގެ ގިނަ ލީޑަރުން ދަނީ ޔާމީނަށް ފާޑުކިޔައި ރައްދު ދިނުމުގެ ގޮތުން ވާހަކަ ދައްކަވަމުންނެވެ.
މީގެ އިތުރުން އައްބާސް ވިދާޅުވީ، ލާމަރުކަޒީ ޤާނޫނަށް ބޮޑެތި ބަދަލުތަށް ގެނެސް އިދާރީ ދާއިރާތައް ލާމަރުކަޒީ ނިޒާމުން ހިންގުމުގެ ރިވެތި ސިފަތަށް ގެއްލުވާލާ އަތޮޅު ތަކުގެ ކައުންސިލް އިދާރާ ތަކަކީ ސަރުކާރުގެ ސިޔާސީ ޖަގަހަތަށް ކަމުގައި ހަދައި ރަށުކައުންސިލް އިދާރާ ތަކުގެ ކޮންޓުރޯލް ސަރުކާރުން ނަގައި ދައުލަތުގެ ހުރިހާ ބާރުތަކެއް މުށުތެރެއަށް ލުމައް ފަހު ވެރިކަމުގެ ދައުރު ދަންމާލުމުގެ މަކަރުވެރި ހީލަތްތެރި ރޭވުންތަކެށް ރާވަމުންދާ ކަމީ ރައްޔިތުން ވިސްނާ ފިކުރު ހިންގަންޖެހޭ ކަމެއް ކަމަށްވެސް އައްބާސް ވިދާޅުވި އެވެ.
އައްބާސް އެކްސްގައި ކުރެއްވި އިތުރު ޕޯސްޓެއްގައި ވިދާޅުވީ، މިހާރު މިސަރުކާރުން ރައްޔިތުންނަށް އޮޅުވާލުމަށް ހަދަމުންދަނީ ބޮޑެތި ދޮގުތަށް ކަމަަށާއި ސަރުކާރުން ރައްޔިތުންނަށް ދޮގު ހެދުމަށް ބޮޑަށް ބޭނުންކުރަމުންދަނީ ރައްޔިތުން އިންތިހާބު ކުރައްވާފައިވާ ޕީއެންސީ އަށް ނިސްބަތްވާ މެންބަރުން ލައްވާ ކަމަށެވެ. އެގޮތުން ވަރަށް ބޮޑަށް ޕްލޭންކުރެވިގެން ޕީއެންސީ ޕީޖީ ލީޑަރު ފަލާހް މެދުވެރިކޮށް މެންބަރުނަށް މަޖުބޫރުކޮށްގެން ސަރުކާރުން ފަންޑުކޮށްގެން ކޮންޓުރޯލު ކުރަމުންދާ ޓީވީ ޗެނަލް ތަކަށް މެންބަރުން އަރުވައިގެން ތަފާތު ދޮގުތަށް ހަދަމުންދާ ކަމަށް އައްބާސް ފާހަގަ ކުރެއްވި އެވެ.
