ސަރުކާރުގެ ވައްކަމާއި ކޮރަޕްޝަންގެ ވާހަކަ ދައްކާތީ ދީން ހަތިޔާރަކަށް ހަަދައި މީޑިއާތަކުގައި ތަޅު އަޅުވާ ބިލު މަޖިލީހަށް ހުށަހަޅައިފި

ރައީސް ޑރ. މުހައްމަދު މުއިއްޒުގެ ސަރުކާރުގެ ވައްކަމާއި ކޮރަޕްޝަންގެ ވާހަކަ ދައްކާތީއާއި ފޮރުވައިގެން ކުރާ ކަންކަން މީޑިއާތަކުން ހާމަކުރަމުންދާތީ ދީން ހަތިޔާރަކަށް ހަަދައި މީޑިއާތަކުގައި ތަޅު އަޅުވާ ބިލު ރައްޔިތުންގެ މަޖިލީހަށް ހުށަހަޅައިފިއެވެ.

މި ބިލު މަޖިލީހަށް ހުށަހަޅާފައިވަނީ ސަރުކާރު އަޑީގައި އޮވެގެން ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރުއެވެ. ބިލު ހުށަހަޅުއްވަމުން މީޑިއާތައް ރެގިއުލޭޓްކުރަންޖެހޭނެ ކަމަށާއި، ދޮގު ހެދުމަކީ ދީނުގައި ގޯސްކަމެއް ކަމަށް ވިދާޅުވެ ބިލުގައި އޮތް ކަންބޮޑުވާ އެއްވެސްކަމެއްގެ ވާހަކަ މެންބަރު ނުދައްކަވާ ދީން ހަތިޔާރަކަށް ހައްދަވާ ބިލު ހުށަހެޅުއްވިއެވެ. މި ބިލުގައި ބްރޯޑްކާސްޓަރުންނާއި ރާއްޖޭގައި ނޫސް މަޖައްލާތައް ހިންގުމުގައި އަމަލުކުރަން ޖެހޭ ހަރުކަށި އުސޫލުތަކެއް ކަނޑައަޅާފައިވެއެވެ.

މި ގާނޫނުގެ ދަށުން އަލަށް އުފައްދާ މޯލްޑިވްސް މީޑީއާ އެންޑް ބްރޯޑްކާސްޓިންގ ކޮމިޝަން އަށް ބޮޑެތި ބާރުތައްކެއް ލިބިދީފައިވާ އިރު، ބިލުގައިވާ ގޮތުން މީޑިއާގައި މަސައްކަތް ކުރާ ފަރާތެއް ނުވަތަ ނޫސްވެރިން ސުލޫކީ މިންގަނޑާ ޚިލާފުވެއްޖެ ނަމަ ފިޔަވަޅު އެޅޭނެއެވެ. ކޮމިޝަނުން ރަނގަޅު ކުރުމަށް އަންގާ ކަމެއް އިސްލާހު ނުކޮށްފިނަމަ 5،000ރ އާއި 25،000ރ އާ ދެމެދުގެ އަދަދަކުން ޖުރިމަނާ ކުރެވިދާނެ ކަމަށް ބުނެފައިވެއެވެ.

ކޮމިޝަނަށް ލިބިދީފައިވާ ބާރުގެ ދަށުން އެޅިދާނެ ކަމަށް ގާނޫނު ގައި ބުނާ ފިޔަވަޅު ތަކުގެ ތެރޭގައި ބްރޯޑްކާސްޓަރުންނަށް ކަމެއް ރަނގަޅު ކުރަން އެންގުމާއި، އިންޒާރު ދިނުމާއި، ކުށުގެ އިސްލާހު އާންމު ކުރުމާއި، ކުށެއް ތަކުރާރު ވިޔަ ނުދިނުމަށް ކަންކަން ކުރަން އެންގުމާއި، ވޭތުވެ ދިޔަ އަހަރު އެފަރާތައް ލިބުނު އާމްދަނީގެ 10 އިން ސައްތަ އަށް ވުރެ ބޮޑު ނޫން އަދަދަކުން ޖުރިމަނާ ކުރުމާއި، ޕްރޮގްރާމް ޝެޑިއުލް އިން ބައެއް ވަގުތީ ގޮތުން މެދުކަނޑާލަން އެންގުމާއި، ކޮންޓެންޓް ބްރޯޑްކާސްޓް ކުރުން ހުއްޓުވުމަށް އެންގުމާއި، ކޯޓަށް ހުށަހަޅައިގެން ލައިސަންސް ބާތިލު ކުރުން ހިމެނެއެވެ.

މީގެ އިތުރުން ނޫސް މަޖައްލާ އަކުން ސުލޫކީ މިންގަނޑާ ޚިލާފުވާ ނަމަ 5000ރ އާއި 100،000ރ އާ ދެމެދުގެ އަދަދަކުން ޖުރިމަނާ ކުރެވިދާނެ އެވެ.

ބްރޯޑްކާސްޓަރުންނާއި މީޑީއާ ގައި މަސައްކަތް ކުރާ ފަރާތްތައް އަދި ނޫސްވެރިން މަސައްކަތް ކުރަން ވާނީ "ގާނޫނުގެ ވެރިކަން ދެމެހެއްޓުމުގެ އަސާސް ތައް ކުރިއަރުވުން،" ކަމަށް ސުލޫކީ މިންގަނޑު އެކުލާވާލުމުގެ ހަމަ ތަކުގެ ތެރޭގައި ހިމަނަން ޖެހޭނެ ކަމަށް ބިލުގައި ހިމެނިފައިވެއެވެ.

އަމިއްލަ ނަމުގައި ދައުވާ ކުރުމާއި ދައުވާ ލިބިގަތުމުގެ ބާރު ލިބޭ ގޮތައް، އަމިއްލަ ނަމުގައި މުއާމަލާތް ކުރުމުގެ ހައިސިއްޔަތު ލިބިފައިވާ އަދި ވަކި ސިއްކަ އެއް އޮންނަ މިނިވަން ޝަޚްސެއް ކަމަށް ބުނެފައިވާ ކޮމިޝަނަށް ލިބިދޭ އެހެން ބާރުތަކުގެ ތެރޭގައި ކޮމިޝަނަށް ހެކިންގެ ގޮތުގައި މީހުން ހާޒިރު ކުރުމުގެ ބާރާއި، ބަލަމުންދާ މައްސަލަ އަކާ ގުޅުން ހުރި ފަރާތްތައް ކޮމިޝަނަށް ހާޒިރު ކުރުމާއި، ބަޔާން ނެގުމާއި، ގުޅުން ހުރި ލިޔުންތައް ހޯދުމާއި، ބެލުމާއި، ބޭނުން ވެއްޖެނަމަ އެ ލިޔުންތައް ކޮމިޝަނަށް ގެނައުމާއި، ލިޔުމުން މައުލޫމާތު ދިނުމަށް އެންގުމާއި، ހެކި ހޯދުން ހިމެނެއެވެ.

ދޮގު ޚަބަރު ފަތުރާ ވަސީލަތްތައް ހުއްޓުވުމަށްޓަކައި އަޅަން ޖެހޭ ފިޔަވަޅުތައް އެޅުމަށް ކަމާބެހޭ ފަރާތްތަކަށާއި އަދި ޚިދުމަތް ފޯރުކޮށްދޭ ފަރާތްތަކަށް އެންގުން ކޮމިޝަންގެ މައްޗަށް ލާޒިމު ކޮށްފައި ވުމުގެ އިތުރުން ދޮގު ޚަބަރުގެ ޒަރީއާ އިން ރައްޔިތުންގެ ހިތްތަކަށް ބިރުވެރިކަމާއި ނަފްރަތު އުފައްދާ ގައުމުގެ އާންމު މަސްލަހަތު ނަގާލުމަށް މަސައްކަތް ކުރާ ކަމަށް ފާހަގަ ކުރެވިއްޖެ ނަމަ އެމީހަކު ނުވަތަ ބަޔަކާ މެދު ފިޔަވަޅު އެޅުމަށް ކަމާ ބެހޭ ފަރާތްތަކަށް އެންގުމަކީ ވެސް ކޮމިޝަނުން ކުރަން ޖެހޭނެ ކަމެއް ކަމަށް ބިލުގައި ވެއެވެ.

މީހެއްގެ ނުވަތަ ބައެއްގެ ހުރުމަތް ކެނޑިދާނެ ފަދަ ނުވަތަ އިއްޒަތާއި ގަދަރަށް އުނިކަމެއް އަތުވެދާނެ ފަދަ ނުވަތަ ކޮންމެވެސް ސިފައެއްގައި ނިކަމެތި ކަމެއް ލިބިދާނެ ބަސްތަކާއި މުޖްތަމައުގައި ބޭނުން ކުރުމަށް އެކަށީގެން ނުވާ ބަސްތަކާއި އިޝާރާތްތަކާއި ހަރަކާތާއި އަމަލުތައް ހިމެނޭ އެއްވެސް އެއްޗެއް ނުދެއްކުމާއި ޝާއިއު ނުކުރުން ވެސް ހިމަނާފައިވެއެވެ.

ހަގީގީ އަދި ޚިޔާލީ ކޮންޓެންޓް ވަކި ކޮށް ދޭން ޖެހޭނެ ކަމަށާއި މީހެއްގެ އަމިއްލަ މައުލޫމާތު ހޯދަން ވާނީ މުޖްތަމައުގެ މަސްލަހަތެއް އެކަމުގައި ހިމެނޭ ކަމަކަށް ވާނަމަ ކަމަށް ބުނެފައި ވެއެވެ. އަދި މައުލޫމާތު ހޯދުމާއި ލިބިގަތުމުގައި އަދި ބޭނުން ކުރުމުގައި އެފަރާތުގެ އަމިއްލަ މިނިވަންކަމުގެ ދާއިރާ އަށް ނުހައްގުން ވަދެގެން ނުވާނެ ކަމަށް ބުނެފައިވެއެވެ. އަދި އެފަރާތުގެ އަމިއްލަ އަބުރަށާއި ގަދަރަށް އަބަދުމެ އިހުތިރާމް ކުރަން ވާނެ ކަމަށް ބުނެފައިވެއެވެ.

ހުށަހަޅާފައިވާ ބިލު ގާނޫނަކަށް ވުމުން މޯލްޑިވްސް މީޑިއާ ކައުންސިލުގެ މެމްބަރުންނާއި ބްރޯޑްކާސްޓިންގ ކޮމިޝަންގެ މެމްބަރުންގެ މަގާމުތައް ނިމުމަކަށް އަންނާނެ ކަމަށް ބުނެފައިވެއެވެ.

އަލަށް އުފެދޭ ކޮމިޝަން ހިންގުމާ ހަވާލު ވަން ދެން ސިވިލް ސާވިސް ކޮމިޝަނުން އެކުލަވާލާ ފަސް މެމްބަރުންގެ ވަގުތީ ކޮމިޓީ އަކުން ކަމަށާއި އެމީހުން ޑިރެކްޓަރ ޖެނެރަލުންނަށް ވުރެ މަތީ މަގާމުތަކުގެ މީހުންނަށް ވާން ޖެހޭނެ ކަމަށް ބުނެފައިވެއެވެ.

އަލަށް އުފެދޭ ކޮމިޝަންގައި ތިބޭނީ 7 މެމްބަރުން ކަމަށާއި އެއީ މަޖިލިހުގެ ރުހުން ލިބިގެން ރައީސުލް ޖުމްހޫރިއްޔާ އައްޔަން ކުރާ 3 މެމްބަރުންނާއި މީޑިއާ ތަކުން އިންތިޚާބު ކުރާ 4 މެމްބަރުންނެވެ. މީޑިއާ ތަކުން އިންތިޚާބު ކުރާ މެމްބަރުންގެ އިންތިޚާބު ބާއްވާނީ އިލެކްޝަންސް ކޮމިޝަނުން ގާނޫނަށް އަމަލު ކުރަން ފަށާތާ 30 ދުވަހުގެ ތެރޭގައި ކަމަށް ބުނެފައިވެއެވެ. އިންތިޚާބުގައި ވޯޓު ލެވޭނީ ރަޖިސްޓަރީ ކޮށްފައިވާތާ 5 އަހަރު ވެފައިވާ ބްރޯޑްކާސްޓަރުންނާއި މީޑިއާތަކުގައި މަސައްކަތް ކުރާ ނޫސްވެރިން ކަމަށް ބުނެފައިވެއެވެ.

ކޮމިޝަންގެ ނައިބު ރައީސް އިންތިޚާބު ކުރާނީ ކޮމިޝަންގެ މެމްބަރުންގެ މެދުގައި ނަގާ ސިއްރު ވޯޓަކުން ކަމަށް ބުނެފައިވާއިރު، ކޮމިޝަންގެ ރައީސް އަކީ ރައީސުލް ޖުމްހޫރިއްޔާ ރައްޔިތުންގެ މަޖިލިހަށް ހުށަހަޅައިގެން ފާސް ކުރާ ނަމެކެވެ.

ގާނޫނަށް އަމަލު ކުރަން ފެށުމާއެކު އެއްވެސް ވަސީލަތެއް މެދުވެރިކޮށް ދިވެހިރާއްޖޭގައި އެއްވެސް ނޫހެއް ނުވަތަ މަޖައްލާއެއް ޝާއިއު ކުރަން ވާނީ ކޮމިޝަންގައި ރަޖިސްޓަރީ ކޮށްގެން ކަމަށް ބުނެފައިވެއެވެ.