ނިއުޕޯރޓްގެ ކުއްޔާއި ޖޫރިމަނާގެ ފައިސާ ދައްކަން ކޮށްފައި އޮތް ހުކުމް ދައުލަތުން އެދިގެން ބާތިލުކޮށްފި

ބްރިޖް ވިއު ޕްލެޓްފޯމް ސަރަހައްދުގައި ހުންނަ ނިއުޕޯޓު ރެސްޓޯރަންޓު ހިންގި ސްޓްރާޑާ ކުންފުނިން ދައުލަތަށް ދައްކަންޖެހޭ ފައިސާ ނުދެއްކުމާ ގުޅިގެން ސިވިލް ކޯޓުން އިސްނަގައިގެން ކުރިއަށް ގެންދިޔަ ހުކުމް ތަންފީޒު ކުރުމުގެ މައްސަލަ ބަންޑާރަ ނައިބުގެ އޮފީހުން އެދިގެން ބާތިލުކޮށްފި އެވެ.

ސަރުކާރުން އެ ތަން އަތުލުމާ ހަމައަށް ނުދައްކާ އޮތް ކުލީގެ ފައިސާއަށްވާ 1.1 މިލިއަން ރުފިޔާ ދެއްކުމަށް ސްޓްރާޑާ ކުންފުނީގެ މައްޗަށް ސިވިލް ކޯޓުން ހުކުމްކުރީ 2019 ވަނަ އަހަރުގެ ސެޕްޓެމްބަރު މަހު އެވެ. މި ހުކުމަށް ހައިކޯޓުން ވެސް ވަނީ ތާއީދުކޮށްފަ އެވެ.

ބަންޑާރަ ނައިބުގެ އޮފީހުން މިހާރު ވަނީ ސިވިލް ކޯޓުގެ ހުކުމް ދައުލަތުން މުރާޖަޢާ ކުރަން ބޭނުންވާތީ، ހުކުމް ތަންފީޒު ކުރުމުގެ މައްސަލަ ބާތިލު ކުރުމަށް އެދިފަ އެވެ. އެ އެދުމުގެ މަތިން ކޯޓުން ވަނީ މައްސަލަ ބާތިލުކޮށްފަ އެވެ.

ނިއުޕޯޓް ހިންގާ ސްޓްރާޑާ ޕްރައިވެޓް ލިމިޓެޑަށް ޕްލެޓްފޯމް ސަރަހައްދު ދޫކުރެވުނީ ކުރީގެ ރައީސް އަބްދުﷲ ޔާމީނުގެ ވެރިކަމުގަ އެވެ. ނަމަވެސް ތިން މަސް ވަންދެން ކުލި ނުދެއްކުމުން އެއްބަސްވުން ވަނީ ބާތިލުކުރެވިފަ އެވެ.

މި މައްސަލަ ސްޓްރާޑާއިން ސުޕްރީމް ކޯޓުގައި އިސްތިއުނާފް ކުރުމުން، އެ ކޯޓުން ކުރި ހުކުމުގައި ފާހަގަކޮށްފައިވަނީ އެއްބަސްވުމާ އެއްގޮތަށް ކުލި ދައްކާފައި ނުވާކަން ކުންފުނީގެ އަމިއްލަ ބަހުން ވެސް ސާބިތުވާ ކަމަށެވެ. އަދި އެއްބަސްވުން ބާތިލުކުރުމުގެ ކުރިން ސްޓްރާޑާއަށް ދޫކުރި ބިމުން ބައެއް ދައުލަތަށް ނެގުމާ ގުޅިގެން ބަދަލު ހޯދުމަށް އެ ކުންފުނިން އެދުނު ނަމަވެސް، އެފަދަ ބަދަލެއް ނަގައިދެވޭނެ ޤާނޫނީ ހަމައެއް ނެތް ކަމަށް ވެސް ހުކުމުގައި ބަޔާންކޮށްފައިވެއެވެ.

ތިން ފަނޑިޔާރުންގެ އިއްތިފާގުން ކުރެވުނު ސުޕްރީމް ކޯޓުގެ ހުކުމުގައި ވަނީ ހައިކޯޓުގެ ނިންމުމަށް ބަދަލު ގެންނަންޖެހޭ އެއްވެސް ސަބަބެއް ނެތް ކަމަށް ކަނޑައަޅާފައެވެ.

މިތަން ނިއު ޕޯޓް ހިންގާ ސްޓްރާޑާ ކުންފުންޏަށް ދޫކޮށްފައިވަނީ ކުރީގެ ރައީސް އަބްދުﷲ ޔާމީންގެ ސަރުކާރުގައި 2016 ވަނަ އަހަރު ހައުސިންގ މިނިސްޓަރު ކަމުގައި ރައީސް ޑރ. މުހައްމަދު މުއިއްޒު ހުންނަވައިގެންނެވެ. ގާތްގަނޑަކަށް 10،000 އަކަފޫޓުގެ ބިމެއް ސްޓާރާޑާ ޕްރައިވެޓް ލިމިޓެޑަށް ކުއްޔަށް ދިނީ ޕްލެޓްފޯމާއި ރެސްޓޯރަންޓާއި ކުޑަކުދިން ކުޅޭނެ ސަރަހަދެއްގެ އިތުރުން ޕާކިން ޒޯން ހަދާގޮތަށެވެ.

އޭގެފަހުން 2019 ވަނަ އަހަރު ސަރުކާރުން އެއްބަސްވުން ބާތިލްކޮށް އެތަން އަތުލިއެވެ. އަދި ނުދައްކާ ހުރި ކުލީގެ ގޮތުގައި 1.1 މިލިއަން ރުފިޔާ ހޯދުމަށާއި އެތަން ހުސްކުރުމުގެ އަމުރަކަށް ދައުލަތުން ކޯޓަށް ހުށަހެޅުމުން އެ ފައިސާ ދެއްކުމަށާއި އެތަން ހުސްކުރަން ސިވިލް ކޯޓުން އަމުރުކުރިއެވެ. އެ މައްސަލަ ސްޓްރާޑާއިން އިސްތިއުނާފް ކުރުމުން 2021 ވަނަ އަހަރު ހައި ކޯޓުން ވެސް އެ ހުކުމަށް ތާއީދުކުރިއެވެ.

ތަނުގެ ކުލީގެ ގޮތުގައި އެއްލައްކައަށް ވުރެ ގިނަ ރުފިޔާ ދައްކަމުން އައި ނިއުޕޯޓް ވިއު ކުއްޔަށް ދިނީ 8 އަހަރަށެވެ.