ކަރަންޓު ކެނޑިގެން މަޖިލީހުގެ މަސައްކަތްތައް މެދުކެނޑި ގަޑި އިރަކަށް ވުރެ ގިނަ އިރު!
18 އޯގަސްޓު 2025 | ހޯމަ 06:18ރައްޔިތުންގެ މަޖިލީހުގެ އިދާރާއިން ކަރަންޓު ކެނޑުމުގެ ސަބަބުން މަޖިލީހުގެ ޖަލްސާ މެދުކަނޑާލީ 09:30 ހާއިރު
މަޖިލީހުގެ ކަރަންޓު ކެނޑުނު ވަގުތު ނަގާފައިވާ ފޮޓޯ އެއް - 18.08.2025
ރައްޔިތުންގެ މަޖިލީހުގެ އިދާރާއިން ކަރަންޓު ކެނޑުމުގެ ސަބަބުން މަޖިލީހުގެ ޖަލްސާ މެދުކަނޑާލުމަށް ފަހު، މައްސަލަ ހައްލުކޮށް އަލުން ޖަލްސާ ފަށައިފިއެވެ.
އެންމެ ފުރަތަމަ މަޖިލީހުގެ މަސައްކަތްތައް މެދުކަނޑާލީ 09:30 ވަނިކޮށެވެ. އަދި 09:45ގައި މަޖިލީހުގެ މަސައްކަތްތައް އަލުން ފަށާނެ ކަމަށް އޭރު އިއުލާންކުރެއްވިއެވެ. ނަމަވެސް ޖަލްސާ މެދުކަނޑާލިތާ ގަޑި އިރަކަށް ވުރެ ގިނަ އިރު ވީ އިރު ވެސް އަލުން މަސައްކަތްތައް ފަށާފަ އެއް ނުވެއެވެ.
މަޖިލީހުން ކަރަންޓު ކެނޑުނު އިރު ހުރާ ދާއިރާގެ މެންބަރު އަނާރާ ނައީމް ގެންދެވީ ވާހަކަދައްކަވަމުންނެވެ. ކަރަންޓް ކެނޑުމުން އިރުކޮޅެއް ވަންދެން ކަރަންޓު ލިބޭތޯބެލުމަށް ޖަލްސާ މެދުކަނޑާ ނުލާ ވަނީ މަޑުކޮށްފައެވެ. ރާއްޖެޓީވީ އަށް މައުލޫމާތު ދިން މެމްބަރަކު ވަނީ 10:00ގައި ވެސް ޖަލްސާ އަލުން ފެށުމަށް މަސައްކަތް ކުރިކަން ހާމަކޮށްފައެވެ. ނަމަވެސް މައްސަލަ ހައްލުކޮށްގެން ޖަލްސާ އަލުން ފެށޭވަރުވީ 11:00 އަށެވެ.
ކަރަންޓް ކެނޑުމުގެ ސަބަބަު މަޖިލީހުގެ އިދާރާއިން ވެސް އަދި ރިޔާސަތުން ވެސް ހާމަކޮށްފަ އެއް ނުވެއެވެ. ފަހަކަށް އައިސް މާލެ އާއި ހުޅުމާލެއިން ކަރަންޓު ކެނޑުން ވަނީ އާންމުވެފަ އެވެ. މި މައްސަލަ ހައްލު ނުވުމުގެ ސަބަބުން އާއްމުންގެ ފާޑުކިޔުން ކަމާއި ގުޅުން ހުރި އިދާރާތަކަށް ވަނީ ވަރަށް ބޮޑަށް އަމާޒުވެފައެވެ.
