މަގޫދޫ އެއާޕޯޓުގައި ފްލައިޓު ޖައްސާނެ: ދޮންބިލެތް
މަގޫދޫ ރައްޔިތުންގެ ތަރައްޤީ އަށް އެތައް މަސައްކަތް ތަކެއް ކުރަމުން އަންނަނިކޮށް ރައީސް ޞާލިޙުގެ ސަރުކާރު ބަދަލުވުން އެއީ ވަރަށް ބޮޑު ހިތާމައެއް
ފ.މަގޫދޫގައި އޮތް ޖަލްސާގައި ބިލެތްދޫ ދާއިރާގެ ކުރީގެ މެމްބަރު އަޙުމަދު ޙަލީމް (ދޮންބިލެތް) ވާހަކަ ދައްކަވަނީ
ފ.މަގޫދޫގައި ތަރައްޤީ ކުރަން ފަށާފައިވާ އެއާޕޯޓުގެ މަސައްކަތް ކުރިއަށް ގޮސް ނިމޭނެ ކަމަށާއި، އަދި މަގޫދޫ އެއާޕޯޓުގައި ފްލައިޓު ޖައްސާނެ ކަމަށް ބިލެތްދޫ ދާއިރާގެ ކުރީގެ މެމްބަރު އަޙުމަދު ޙަލީމް (ދޮންބިލެތް) ވިދާޅުވެއްޖެ އެވެ.
ޙަލީމް މިހެން ވިދާޅުވީ މަގޫދޫ ކައުންސިލް އިން ތަރައްޤީ ކޮށްފައިވާ ބިނާތައް ހުޅުވުމަށް އާދީއްތަ ދުވަހުގެ ރޭ މަގޫދޫގައި ބޭއްވި ޖަލްސާގައި ވާހަކަ ދައްކަވަމުންނެވެ.
އެ ޖަލްސާގައި ވާހަކަ ދައްކަވަމުން ކުރީގެ މެމްބަރު ޙަލީމް ވިދާޅުވީ، މިއަދު މަގޫދޫ އެއާޕޯޓުގެ މަސައްކަތް ހުއްޓިފައި އޮތް ނަމަވެސް، ކުރިއަށް އޮތް ތަނުގައި އެ މަސައްކަތް ބާރަށް ކުރިއަށް ގެންދާނެ ކަމަށެވެ. އަދި އެ މަސައްކަތް ނިންމައި، މަގޫދޫ އެއާޕޯޓުގައި ފްލައިޓު ޖައްސާނެ ކަމަށް ޙަލީމް ވިދާޅުވި އެވެ.
އިތުރަށް ވާހަކަ ދައްކަވަމުން ޙަލީމް ވިދާޅުވީ، މަގޫދޫ އެއާޕޯޓުގެ މަސައްކަތް ހުއްޓުވުމަށް ބަޔަކު މަސައްކަތް ކުރި ނަމަވެސް، އެކަން ކާމިޔާބު ނުކުރެވޭނެ ކަމަށެވެ. އަދި ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން މަގޫދޫގައި އަޅާ އެއާޕޯޓުގެ ރަންވޭ ބޮޑު ކުރަން ނިންމާފައި އޮއްވައި، މި ސަރުކާރުން އެ ރަންވޭ ކުޑަ ކުރަން ނިންމާފައިވާ ކަމަށް ޙަލީމް ފާހަގަ ކުރެއްވި އެވެ.
އެކަމަށް ފާޑު ވިދާޅުވެ ވާހަކަ ދައްކަވަމުން ޙަލީމް ވިދާޅުވީ، އެއް ސަރުކާރުން ކޮށްފައިވާ ކަންކަން އަނެއް ސަރުކާރުން ކުރިއަށް ގެންދަން ޖެހޭނެ ކަމަށެވެ. އަދި މަގޫދޫގެ ތަރައްޤީ އަށް ހުރަސް ނޭޅުމަށް ވެސް ޙަލީމް ވަނީ ރައީސް ޑޮކްޓަރު މުޙައްމަދު މުޢިއްޒުގެ ސަރުކާރަށް ގޮވާލައްވައިފަ އެވެ.
މި މަގޫދޫގެ ބަޔަކު ހިމެނޭހެން، ބަޔަކު މި މަގޫދޫގެ އެއާޕޯޓުގެ މަސައްކަތް ހުއްޓުވުމަށް މަސައްކަތް ކުރި ނަމަވެސް، އެކަން ކާމިޔާބު ނުވާނެ. އަޅުގަނޑުމެން އިރާދަކުރެއްވިއްޔާ މަގޫދޫގެ އެއާޕޯޓު މަސައްކަތް ނިންމައި، މި އެއާޕޯޓުގައި ފްލައިޓު ޖައްސާނެ. މަގޫދޫގެ ރައްޔިތުން އެމްޑީޕީ އާއެކު ތިއްބަވައި، މާ ގިނަ ދުވަހެއް ނުވެ އެކަން އަޅުގަނޑުމެން ހަގީގަތަކަށް ހަދައި ދޭނަން.ބިލެތްދޫ ދާއިރާގެ ކުރީގެ މެމްބަރު އަޙުމަދު ޙަލީމް (ދޮންބިލެތް)
މީގެ އިތުރުން އެ ޖަލްސާގައި ވާހަކަ ދައްކަވަމުން ޙަލީމް ވިދާޅުވީ މަގޫދޫ ރައްޔިތުންގެ ތަރައްޤީ އަށް އެތައް މަސައްކަތް ތަކެއް ކުރަމުން އަންނަނިކޮށް ރައީސް ޞާލިޙުގެ ސަރުކާރު ބަދަލުވުން އެއީ ވަރަށް ބޮޑު ހިތާމައެއް ކަމަށެވެ. އަދި އޭގެ ފަހުން ރައްޔިތުންގެ މަޖިލީހުގެ އިންތިޚާބުގެ ގޮނޑި ގެއްލުނު ކަމަށް ވެސް ޙަލީމް ފާހަގަ ކުރެއްވި އެވެ.
އެކަން ފާހަގަ ކުރައްވައި ޙަލީމް ވިދާޅުވީ ކުރިއަށް އޮތީ ތިން ވަނަ ފުރުސަތު ކަމަށާއި، މަގޫދޫގެ ރައްޔިތުން އެ ފުރުސަތު ނަގައި ނުލުމަށް އިލްތިމާސް ކުރާ ކަމަށެވެ. އެގޮތުން ލޯކަލް ކައުންސިލް އިންތިޚާބުގެ މެޖޯރިޓީ އެމްޑީޕީ އަށް ހޯދުމަކީ މުހިންމު ކަމެއް ކަަމަށާއި، މަގޫދޫ ކައުންސިލްގެ މެޖޯރިޓީ އާއެކު އެ ރަށުގެ ތަރައްޤީ އަނެއްކާ ވެސް އަލުން އިއާދަވެގެން ދާނެ ކަމަށް ޙަލީމް ފާހަގަ ކުރެއްވި އެވެ.
މަގޫދޫގެ އެއާޕޯޓާ ގުޅޭ ގޮތުން އިތުރަށް ވާހަކަ ދައްކަވަމުން ޙަލީމް ވިދާޅުވީ ރައީސް ޞާލިޙުގެ ސަރުކާރުން ނިންމާފައި އޮތީ މަގޫދޫގައި 1800 މީޓަރުގެ ރަންވޭ އެއް ޤާއިމު ކުރުމަށެވެ. ނަމަވެސް މި ސަރުކާރުން އެއާޕޯޓުގެ މަސައްކަތް މަޑު ޖައްސާލާފައިވާއިރު، ރަންވޭގެ ސައިޒު ވެސް 1200 އަށް ކުޑަ ކޮށްފައިވާ ކަމަށް ޙަލީމް ވިދާޅުވި އެވެ.
މީގެ އިތުރުން ޙަލީމް ވިދާޅުވީ އެމްޑީޕީ އިން އަބަދު ވެސް މަގޫދޫގެ ތަރައްޤީ އަށް، އަދި ރާއްޖޭގެ ތަރައްޤީ އަށް ގިނަ ގުނަ މަސައްކަތްތަކެއް ކުރާނެ ކަމަށެވެ. އަދި ދެން އުފެދޭ އެމްޑީޕީގެ ވެރިކަމެއްގައި މަގޫދޫގެ އެއާޕޯޓާއި އެ ރަށުގެ ތަރައްޤީގެ މަސައްކަތް އިތުރު ހަރުފަތަަކަށް ގެންދާނެ ކަމަށް ވެސް ޙަލީމް ވަނީ ވިދާޅުވެފަ އެވެ.
