ވެލާނާ އިންޓަރނޭޝަނަލް އެއަރޕޯޓްގެ ސަލާމަތީ ކަންކަން ވަރުގަދަކޮށް ހަތިޔާރާ އެކު ސިފައިން ހަރަކާތްތެރިވާ ސަބަބު ބުނެދޭން ޖެހޭނެ ކަމަށް އިދިކޮޅު ކޯލިޝަނުން ބުނެފި އެވެ.
އިދިކޮޅު ކޯލިޝަނުގެ ފަރާތުން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު ވިދާޅުވީ އެއާޕޯޓުގައި ހަތިޔާރާއެކު ސިފައިން ހަރަކާތްތެރިވާން ފެށި ކޮންމެވެސް ސަބަބެއް އޮންނަން ވާނެ ކަމަށެވެ. އަދި އެއީ ކިހާވަރެއްގެ ނުރައްކަލެއްގެ މައުލޫމާތު ލިބިގެން ގެނައި ބަދަލެއްކަން ވެސް ހާމަ ކުރެވެން ޖެހޭނެ ކަމަށް އޭނާ ވިދާޅުވި އެވެ.
" އެއީ މީޑިޔާތަކުގައި އާންމު ރައްޔިތުންނަށް ހާމަކޮށްދެވެން ނެތް މައުލޫމާތެއް ކަމަށްވާނަމަ ރައްޔިތުންގެ މަޖިލީހުގައި އެބަހުރި އުސޫލުތައް ކަނޑައެޅިގައި، ކޮމެޓީތައް އެކުލަވާލެވިފައި. އެ ކޮމެޓީތަކަށް ވަޑައިގެން އެބަ ޖެހޭ އެ މައުލޫމާތުތައް ސަރުކާރުން ހިއްސާ ކުރައްވަން،" އަމީތު ވިދާޅުވި އެވެ.
އެއާޕޯޓުގައި ސިފައިން ހަރަކާތްތެރިވާން ފެށީ ރާއްޖެއަށް ޓެރަރިސްޓް ހަމަލާއެއް ދީފާނެ ކަމުގެ އެއްވެސް މައުލޫމާތެއް ލިބިގެން ނޫން ކަމަށް ޑިފެންސް މިނިސްޓަރު ވިދާޅުވެފައިވަނިކޮށް ޖާނުންފިދާވުމުގެ ހަމަލާއެއް ދޭން އުޅުނު ކަމުގެ ތުހްމަތުގައި މީހަކު ހައްޔަރުކުރި ވާހަކަ މީޑިޔާތަކުން އިވުމުން ވެސް ކަންބޮޑުވުންތައް އެބަހުރި ކަމަށް އޭނާ ވިދާޅުވި އެވެ.
ހަތިޔާރާއެކު ސިފައިން އެއާޕޯޓުގައި ހަރަކާތްތެރިވާން ފެށުމުން އާންމު ދިވެހި ރައްޔިތުންނާއި ބޭރުން އަންނަ ފަތުވެރިންގެ ހިތުގައި ސުވާލުތައް އުފެދޭ ކަމަށް އޭނާ ވިދާޅުވި އެވެ.
" އެއް ދުވަހު ޒިޔާރަތްކުރާ ފަތުރުވެރިއަކަށް އަނެއް ދުވަހު ހަތިޔާރާއެކު ހުރި ސިފައިންގެ މީހަކު މަރުހަބާ ކިޔާ ކަމަށްވާނަމަ އެއީ ވަރަށް ބޮޑު ކަންބޮޑު ވުމަކަށް އެކަން ވެގެންދާނެ. އަދި ހާއްސަކޮން އަޅުގަނޑުމެނަށް ކަންބޮޑުވުމަކަށް ވެގެން މިދަނީ އެއީ ރާއްޖޭގެ ފަތުރުވެރިކަމުގެ ދޮރާއްޓަށް ވުމުގެ އިތުރަށް އަޅުގަނޑުމެންގެ ސަލާމަތާ ވަރަށް ބޮޑަށް ގުޅުންހުރި ތަނެއް އެއީ،" އޭނާ ވިދާޅުވި އެވެ.
