2024 ވަނަ އަހަރު ނިމުނު އިރު ރާއްޖޭ ގައި 215 އޮޓޮމޭޓެޑް ޓެލަރ މެޝިން (އޭޓީއެމް) ޚިދުމަތް ލިބެމުން ދިޔަ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.

ރާއްޖޭގައި އޭޓީއެމް ޚިދުމަތްތައް ދެމުން އަންނަނީ ހަމައެކަނި ބޭންކުތަކުން ކަމަށްވާއިރު، މި ޚިދުމަތް ވަނީ ފާއިތުވި އަހަރުތަކުގައި ފާހަގަކުރެވޭ ކުރިއެރުންތަކެއް ހޯދާފައި ކަމަށް އެމްއެމްއޭ އިން ވަނީ ބުނެފައެވެ. ކުރީގެ އޭޓީއެމް ތަކުން ލިބެމުން އައީ ހަމައެކަނި ފައިސާ ނެގުމުގެ ޚިދުމަތް ކަމުގައިވީ ނަމަވެސް، މިހާރު ވަނީ 'ސެލްފް-ސަރވިސް ބޭންކިންގ' ގެ ޚިދުމަތްތައް ތަޢާރަފުކޮށްފައެވެ.

2014 ވަނަ އަހަރު ފުރަތަމަ ތަޢާރަފުކުރެވުނު މި ޚިދުމަތުގެ ތެރޭގައި ފައިސާ އާއި ޗެކު ޖަމާކުރުމާއި، ފަންޑު ޓްރާންސްފަރ ކުރުމާއި، ބިލު ދެއްކުމާއި، ކްރެޑިޓް ކާޑު ޕޭމަންޓާއި އަދި ލޯނު އަނބުރާ ދެއްކުން ހިމެނޭ ކަމަށް އެމްއެމްއޭ އިން ޝާއިއު ކުރި "ޕޭމަންޓް ބުލެޓިން" ގައި ބުނެފައިވެއެވެ. މީގެ ފަހުން ބެހެއްޓިފައިވާ އައު އޭޓީއެމް ތައްވެސް ވަނީ މި މޮޑެލްއަށް ބަދަލު ކުރެވިފައެވެ. މިކަމުގެ ސަބަބުން ގިނަ ރަށްރަށުގައި ބޭންކު ގޮފި ނެތް ނަމަވެސް އަސާސީ ބޭންކިންގ ޚިދުމަތްތައް ލިބޭގޮތްވެފައިވެއެވެ.

2020 އިން ފެށިގެން ފަސް އަހަރުގެ ތެރޭގައި ޖުމުލަ އޭޓީއެމް ތަކުގެ އަދަދު ވަނީ 31 އިންސައްތަ އިތުރުވެފައެވެ. 2024 ވަނަ އަހަރުގެ ނިޔަލަށް ޖުމުލަ 215 އޭޓީއެމް ހިދުމަތް ދެމުން ދިޔައެވެ. މިއީ ކުރީ އަހަރާ އަޅާބަލާއިރު 14 އިންސައްތައިގެ އިތުރުވުމެކެވެ. މި އޭޓީއެމްތަކުގެ ތެރެއިން 39 އިންސައްތަ ހުރީ ގްރޭޓަރ މާލެ ސަރަހައްދުގައެވެ. އަދި 61 އިންސައްތަ ހުރީ އެހެނިހެން ރަށްރަށުގައެވެ.

މީގެ އިތުރުން ޕޮއިންޓް އޮފް ސޭލް (ޕީއޯއެސް) ޓާމިނަލްތަކަށް ބަލާއިރު، 2024 ވަނަ އަހަރުގެ ނިޔަލަށް 9,800 އަށްވުރެ ގިނަ ޓާމިނަލް ހިދުމަތް ދެމުން ދިޔައެވެ. މިއީ 2023 އާ އަޅާބަލާއިރު 16 އިންސައްތައިގެ އިތުރުވުމެކެވެ. މީގެ ތެރެއިން 5,900 އަށްވުރެ ގިނަ ޓާމިނަލް ގްރޭޓަރ މާލެ ސަރަހައްދުގައި ހުރި ކަމަށް އެމްއެމްއޭ އިން ބުނެފައިވެއެވެ. އަދި އެހެން ރަށްރަށުގައި 2,300 އަށްވުރެ ގިނަ ޓާމިނަލް ހުރި އިރު ރިސޯޓުތަކުގައި 1,500 ށް ވުރެ ގިނަ ޓާމިން އެބަހުއްޓެވެ.

ޕީއޯއެސް ޓާމިނަލްތަކުގެ 92 އިންސައްތަ މިލްކު ކުރަނީ ބޭންކު ތަކުންނެވެ. އަދި 72 އިންސައްތަ ޓާމިނަލް ހިންގަނީ އެންމެ ސަރވިސް ޕްރޮވައިޑަރެއް މެދުވެރިކޮށެވެ. 2024 ގައި ދިވެހި ރުފިޔާ ނެގުމުގެ ޚިދުމަތް ދެމުން ދިޔައީ 201 ޕީއޯއެސް ޓާމިނަލުންނެވެ. މިއީ ޖުމުލަ ޓާމިނަލްތަކުގެ 2 އިންސައްތައެވެ. ޑިޖިޓަލް ޕޭމަންޓް އިތުރުވަމުން ދިއުމާއެކު، ޕީއޯއެސް ޓާމިނަލްތަކުން ފައިސާ ނެގުމުގެ ބޭނުން ދަނީ ދަށްވަމުންނެވެ.

2024 ވަނަ އަހަރުގެ ތަފާސްހިސާބުތަކުން ދައްކާ ގޮތުގައި، ރާއްޖޭގެ ކޮންމެ 100,000 ބޮޑެތި މީހުންނަށް 75 އޭޓީއެމް އަދި 3,000 ޕީއޯއެސް ޓާމިނަލް ޚިދުމަތް ދެމުން ގެންދެއެވެ. މިއީ ކުރީ އަހަރާ އަޅާބަލާއިރު ފާހަގަކުރެވޭ ކުރިއެރުމެކެވެ.