"ވޭކްއަޕް" ގެ ނަމުގައި ޕީއެންއެފްގެ ބޮޑު ޖަލްސާއެއް އަންނަ ބުރާސްފަތި ދުވަހުގެ ރޭ، ބޭނުމަކީ ސަރުކާރު ޖަވާބުދާރީ ކުރުވުން
މި މަހުގެ 21 ވަނަ ދުވަހުގެ ރޭ 'ވޭކްއަޕް'ގެ ނަމުގައި ޕީއެންއެފް އިން ބޮޑު ޖަލްސާއެއް އާޓިފިޝަލް ބީޗުގައި ބާއްވަން ނިންމީ ރައްޔިތުންގެ ޝުއޫރު ފާޅުކުރަން
ޕީއެންއެފް "ވޭކްއަޕް" ބޮޑު ޖަލްސާގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގެ ތެރެއިން ރައީސް ޔާމީންގެ ދަރިކަލުން ޒެއިން ވާހަދައްކަވަނީ: ވިދާޅުވީ މި ބޮޑު އެއްވުމަކީ ސިޔާސީ އެއްވުމެއް ނޫން ކަމުގައި
އަންނަ ބުރާސްފަތި ދުވަހުގެ ރޭ 'ވޭކްއަޕް'ގެ ނަމުގައި ކުރީގެ ރައީސް އަބްދުﷲ ޔާމީނުގެ ޕާޓީ ޕީއެންއެފް އިން ބޮޑު ޖަލްސާއެއް ބާއްވަން ނިންމާފައިވާއިރު، އެ ޖަލްސާ އަކީ ސިޔާސީ ބޭނުމެއްގައި ބާއްވާ ހަރަކާތެއް ނޫން ކަމަށާއި އެއީ ރައްޔިތުންގެ ޝުއޫރު ފާޅުކުރުމަށް ބާއްވާ ހަރަކާތެއް ކަމަށް އެ ޕާޓީން ބުނެފިއެވެ.
އަންނަ ބުރާސްފަތި ދުވަހުގެ ރޭ ބޮޑު ޖަލްސާއެއް ބާއްވަން ޕީއެންއެފް އިން އިއުލާނު ކުރިއިރު، އެ އެއްވުމުގެ އިތުރު މައުލޫމާތު ނޫސްވެރިންނަށް ދިނުމަށް ހޮނިހިރު ދުވަހު ވަނީ ނޫސްވެރިންގެ ބައްދަލުވުމެއް ބާއްވަފަ އެވެ.
އެއީ ބައްދަލުވުމުގައި ރައީސް ޔާމީނުގެ ދޮށީ ދަރިކަލުން ޒެއިން އަބްދުﷲ ޔާމީން ވިދާޅުވީ މިހާރު މި އޮތް ރައީސް މުއިއްޒުގެ ސަރުކާރުގެ ކަންކަން ބޮއްސުންލައި، ގިނަ މައްސަލަތަކެއް ފެންމަތިވަމުން އަންނަ ކަމަށެވެ. އަދި މިއަދު ގައުމު މިދަނީ ދުވަހަކަށްވުރެ ދުވަހެއް ފަހަތައް ކަމުގައި އޭނާ ވިދާޅުވި އެވެ.
ޒެއިން ވިދާޅުވީ ޕީއެންއެފް އިން މިމަހުގެ 21 ވާ ބުރާސްފަތި ދުވަހުގެ ރޭ ބާއްވާ ބޮޑު ޖަލްސާއަކީ ސިޔާސީ ޖަލްސާއެއް ނޫން ކަމަށާއި އެއީ ރައީސް މުއިއްޒުގެ މި ސަރުކާރު ޒިންމާދާރު ކުރުވުމަށް އަޑު އުފުލުމަށް ބާއްވާ ޖަލްސާއެއް ކަމަށެވެ.
ޒެއިން ވިދާޅުވީ މި ޖަލްސާ އަކީ އެންމެންނަށް ވެސް ބައިވެރި ވެވޭގޮތަށް ބާއްވާ ޖަލްސާއެއް ކަމަށާއި އެ ޖަލްސާގައި ސިޔާސީ ޕާޓީތަކުން ވެސް އަދި އެހެނިހެން ގޮތްގޮތުން ވެސް ބައިވެރިވާން ބޭނުން އެންމެނަށް ފުރުސަތު ހުޅުވާލެވިފައިވާ ކަމަށެވެ.
ޒެއިން ވިދާޅުވީ އެ ހަރަކާތް ބާއްވަނީ ގައުމަށް ދިމާވެފައިވާ މައްސަލަތަކާ ގުޅޭ ގޮތުން ރައްޔިތުންގެ ޝުއޫރު ފާޅުކޮށްދިނުމަށް ކަމަށެވެ. އަދި މިއީ އެއްވެސް ހާލަތެއްގައި ސިޔާސީ ޕާޓީތަކެއް އެއްވެގެން ސަރުކާރެއް ވައްޓާލަން ކުރިއަށް ގެންދާ ހަރަކާތެއް ނޫން ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވީ، މި ސަރުކާރު ޖަވާބުދާރީ ކުރުވޭނީ ރައްޔިތުންގެ ޝުއޫރު ދައްކައިގެން ކަމަށާއި މިއީ އެކަން ދެއްކުމަށް ލިބޭ ފުރުސަތު ކަމަށެވެ.
އޭގެ އިތުރަށް، ޖަލްސާއަށް ތައްޔާރުވުމަށް ހޮނިހިރު ދުވަހުން ފެށިގެން މަސައްކަތްތައް ފަށާނެ ކަމަށެވެ. އަދި އަތޮޅު ތެރެއިން ވެސް ޖަލްސާގައި ބައިވެެރިވުމަށް ގިނަ ބަޔަކު އައުމަށް ވެސް ޕީއެންއެފުން ވަނީ ގޮވާލާފައެވެ.
މި ޖަލްސާ އޮންނާނީ އަންނަ ބުރާސްފަތި ދުވަހުގެ ރޭ 08:30ގައި އާޓިފިޝަލް ބީޗުގައެވެ. މި ޖަލްސާގައި ޔާމީން ބައިވެރިވެވަޑައިގަންވައި، ވާހަކަދައްކަވަން ހަމަޖެހިފައިވާ ކަމަށް ޕީއެންއެފުން ބުނެއެވެ.
ވެރިކަމަށް ޕީއެންސީ އައިތާ ހަފުތާއެއް ނުވެ، ޔާމީން ވަނީ އެ ކޯލިޝަންގެ ލީޑަރުކަމުން އިސްތިއުފާދެއްވައި، އާ ޕާޓީއެއް އުފައްދަވައިފައެވެ. އެގޮތުން، ޔާމީން އިސްވެ ޕީއެންއެފް އުފައްދަވައި، އެ ޕާޓީ ރަޖިސްޓްރީކުރީ މިދިޔަ އަހަރުގެ މާޗް މަހުގެ 25ވަނަ ދުވަހެވެ.
ޔާމީނާއި އެމަނިކުފާނުގެ އަރިސް ބޭފުޅުން ގެންދަވަނީ އެކި ކަންކަމުގައި މި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
