ރައީސް ޑރ. މުހައްމަދު މުއިއްޒު ބ. ކެންދޫއަށް ވަޑައިގެން ރަސްމީކޮށް ހިދުމަތް ފެއްޓެވި ފެނާ ނަރުދަމާ ނިޒާމު ހުރީ ގެތަކަށް ނުގުޅާ ކަމަށާއި، އެކަން އެގޮތަށް ނުކުރެއްވުމަށް ކައުންސިލުން އެމަނިކުފާނުގެ އަރިހުގައި ތަކުރާރުކޮށް އެދެމުންދިޔަ ކަމަށް ކެންދޫ ކައުންސިލްގެ ރައީސް އިބްރާހީމް ޢަބްދުއްރަޙުމާން ވިދާޅުވެއްޖެ އެވެ.

މިދިޔަ ސަރުކާރުން ކެންދޫގައި ތަރައްގީކޮށްފައިވާ ފެނާ ނަރުދަމާ ނިޒާމްގެ ހިދުމަތް ރަސްމީކޮށް ފައްޓަވައި ދެއްވީ ރައީސް މުއިއްޒު ބ. އަތޮޅަށް ކުރައްވަމުންގެންދާ ދަތުރުފުޅުގެ ތެރެއިން ހޯމަ ދުވަހު އެރަށަށް ވަޑައިގެންނެވެ. ކެންދޫ ފެނާ ނަރުދަމާ ނިޒާމުގެ ހަވާލުކުރީ 15 ނޮވެމްބަރު 2020 ގައި އެމްޑަބްލިއުއެސްސީއާއެވެ. މަސައްކަތް ފެށީ އޭގެ ފަހުން ފުރިހަމަކުރަންޖެހޭ ހުރިހާ ކަންކަމެއް ފުރިހަމަ ކުރުމަށްފަހު ކޮވިޑުގެ ތެރޭގައި 15 ޑިސެމްބަރު 2020 ގައެވެ. ކެންދޫ ފެނާ ނަރުދަމާ އަކީ އޮފިޑް ފަންޑުގެ ދަށުން ކުރިއަށް ގެންދިޔަ މަޝްރޫއެކެވެ. ބ. ކެންދޫގެ ފެނާ ނަރުދަމާގެ މަޝްރޫއުގެ އަގަކީ 56.24 މިލިއަން ރުފިޔާއެވެ.

ރައީސް ބ. އަތޮޅަށް ދަތުރުފުޅު ކުރެއްވުމުގެ ކުރިން ބ އަތޮޅުން ރިބަންކަނޑާލެވޭނެ ތަންތަން ހޯދަން މިނިސްޓްރީތަކުން ކައުންސިލްތަކަށް ގުޅާފައިވެއެވެ. އެގޮތުން ކެންދޫގައި ތަރައްގީކުރި ފެނާ ނަރުދަމާ ނިޒާމުގެ މަސައްކަތް ނިމި ރަސްމީކޮށް ހިދުމަތް ފެށުމަށް ރައީސްގެ ދަތުރުފުޅުގައި ހިމަނާފައި އޮތެވެ.

މިކަމާއި ގުޅިގެން ރާއްޖެއެމްވީއާއި ވާހަކަ ދައްކަވަމުން ކެންދޫ ކައުންސިލްގެ ރައީސް އިބްރާހީމް ޢަބްދުއްރަޙުމާން ވިދާޅުވީ ފެނާ ނަރުދަމާ ނިޒާމް އިފްތިތާހު ނުކުރުމަށް ތަކުރާރުކޮށް އެދިވަޑައިގަންނަވަމުން ދިޔަ ކަމަށާއި، ހިދުމަތް ނުލިބޭ ކަމެއް އިފްތިތާހުކުރުމުން ރައްޔިތުންގެ ބަދުބަސް ލިބޭނެކަމަށް ތަކުރާރުކޮށް ބުނަމުން ދިޔަ ކަމަށެވެ. ނަމަވެސް ކައުންސިލްގެ ބަހެއް އެހުމެއް ނެތި އިފްތިތާހުކޮށްފައި ރައީސް ވަޑައިގެންނެވީ ކަމަށެވެ.

ކައުންސިލްގެ ރައީސް ވިދާޅުވީ ހިދުމަތް ރަސްމީކޮށް ދިނުން ކަމަށްވާނީ ގޭގެއަށްވެސް އެ ހިދުމަތް ލިބެން ފެށުމުން ކަމަށެވެ. ނަމަވެސް ފެނާ ނަރުދަމާ ނިޒާމް އަޅާފައި އޮތް ނަމަވެސް އެއްވެސް ގެއަކަށް ކަނެކްޝަން ދީފައި ނުވާ ކަމަށާއި، އިފްތިތާހުކުރެވިގެންދިޔައީ ފުރިހަމަ ނުވެ އޮތް ނިޒާމެއް ކަމަށެވެ.

ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ފެށި ފެނުގެ ނިޒާމް ޤާއިމް ކުރުމުގެ މަސައްކަތުގެ ދަށުން ކެންދޫގައި 5.26 ކިލޯ މީޓަރގެ ދިގު ފެން ހޮޅީގެ މައި ނެޓްވޯރކް ޤާއިމް ކުރުމާއި، އާރ.އޯ ފެސިލިޓީ ބިލްޑިންގ އިމާރާތް ކުރުމާއި، ފެން އުފެއްދުމަށްޓަކައި 2 އާރ.އޯ ޕްލާންޓް އަދި ފެން ރައްކާކުރުމަށްޓަކައި 3 ތާންގީ ބެހެއްޓިފައިވެއެވެ. މީގެ އިތުރުން، ގޭގޭގައި ފެންމީޓަރ ބަހައްޓައި، ފެނުގެ ކަނެކްޝަން ގުޅައިދީ، ގެތަކަށް ރައްކާތެރި ބޯފެން ފޯރުކޮށްދިނުންވެސް މި ޕްރޮޖެކްޓުގެ ބައެއްގެ ގޮތުގައި އޮތީ ހިމަނާފައެވެ.

އަދި ނަރުދަމާ ނިޒާމުގެ މަސައްކަތުގެ ދަށުން ކެންދޫގައި 4.88 ކިލޯ މީޓަރުގެ ދިގު ނަރުދަމާ މައި ނެޓްވޯކެއް ޤާއިމްކުރުމާއި، 556 މީޓަރގެ ޕަންޕިން ލައިން އެޅުމާއި، 2 ޕަންޕިންގ ސްޓޭޝަނާއި އަދި 1 ސީ އައުޓް ފޯލް ޤާއިމްކުރުން ހިމެނެއެވެ. އަދި ގޭގޭގައި ޖަންކްޝަން ބަހައްޓައި، ނަރުދަމާ ކަނެކްޝަން ގުޅައިދީ މި ގެތަކަށް ނަރުދަމާގެ ޚިދުމަތް ފޯރުކޮށްދިނުން ހިމެނިފައި އޮތެވެ. މީގެ އިތުރުން މިމަޝްރޫޢުގެ ދަށުން ފެނާއި ނަރުދަމާ ނިޒާމް ހިންގާ ބެލެހެއްޓުމަށް ބޭނުންވާ ޖަނެރޭޓަރ ސެޓާއި ވެހިކަލް އަދި ފެން ތަޙުލީލު ކުރުމަށް ބޭނުންވާ ސާމާނު ފޯރުކޮށްދިނުމަށް ވެސް ޕްރޮޖެކްޓުގެ ތެރޭގައި ހިމަނާފައި އޮތެވެ.

ރައީސްގެ މި ދަތުރުފުޅުގައި ކެންދޫގައި ބިން ހިއްކުމާއި، ބަނދަރު އަޕްގްރޭޑްކުރުމާއި، ގޮނޑުދޮށް ހިމާޔަތްކުރުމުގެ މަޝްރޫޢުގެ އިތުރުން، އެރަށުގެ ފެނާއި ނަރުދަމާގެ ޚިދުމަތް ރަސްމީކޮށް އިފްތިތާޙްކޮށްދެއްވިއެވެ.