ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން، ފަލަސްޠީނުގެ ރައީސް މަޙުމޫދު އައްބާސްއާ ވާހަކަ ދައްކަވައި، މަޝްވަރާ ކުރައްވައިފި އެވެ.

ފޯނު މެދުވެރިކޮށް ކުރެއްވި މި މަޝްވަރާގައި ވަނީ ގިނަ ކަންތައްތަކާ ގުޅޭ ގޮތުން މަޝްވަރާ ކުރައްވައިފަ އެވެ. އެގޮތުން ފަލަސްޠީނުގެ ދައުލަތަށް ބައިނަލްއަޤުވާމީ އެއްްބާރުލުން ހޯދުމާ ގުޅޭ ގޮތުން ވަނީ މަޝްވަރާ ކުރައްވައިފަ އެވެ.

އެ މަޝްވަރާ ތަކުގައި އައްބާސް ވަނީ، ބައިނަލްއަޤުވާމީ ގޮތުން ފަލަަސްޠީނަށް އެއްބާރުލުން ހޯދުމަށް ސައުދީ އަރަބިއްޔާ އިން ކުރަމުން އަންނަ މަސަކަތް ފާހަގަ ކުރައްވައި އެ މުޙައްމަދު ބިން ސަލްމާން އަދި ސައުދީ ސަރުކާރަށް ވެސް ޝުކުރު އަދާ ކުރައްވައިފަ އެވެ.

ސައުދީގެ ޕްރެސް އެޖެންސީ އިން ބުނެފައިވާ ގޮތުގައި ފަލަސްޠީނުގެ ރައީސް އައްބާސް ވަނީ، ގިނަ ޤައުމު ތަކަކުން ފަލަސްޠީނުގެ މިނިވަން ދައުލަތް ބަލައި ގަތުމަށް މަގު ފަހި ކޮށްދިނުމުގައި ސައުދީ އަރަބިއްޔާ އިން ކޮށްފައިވާ އަގު ހުރި މަސައްކަތް ފާހަގަ ކުރައްވައިފަ އެވެ. އަަދި އެއީ ވަރަށް ޝަރަފުވެރި މަސައްކަތެއް ކަމަށް އައްބާސް ވަނީ ވިދާޅުވެފަ އެވެ. 

މީގެ އިތުރުން ދާދި ފަހުން އެމެރިކާގެ ނިއު ޔޯކުގައި ހުންނަ އދ ގެ މައި މަރުކަޒުގައި ކުރިއަށް ގެންދިޔަ، ފަލަސްޠީނުގެ މައްސަލައިގެ ދެ ދައުލަތުގެ ސަމިޓުގައި ފަލަސްޠީނުގެ މައްސަލަ އަށް ޙައްލު ހޯދުމަށް ސަައުދީ އިން ކުރި މަސައްކަތަށް ވެސް އައްބާސް ޝުކުރު އަދާ ކުރެއްވި އެވެ.

ސައުދީ އާއި ފްރާންސް ގުޅިގެން ބޭއްވި ދެ ދުވަހުގެ އެ ސަމިޓުގައި ވަނީ ފަލަސްޠީނުގެ މިނިވަން ދައުލަތް ބަލައި ގަނެ، ދެ ދައުލަތުގެ ޙައްލު ހޯދުމާ ގުޅޭ ގޮތުން ޤައުމު ތަކުގެ އިސްވެރިންގެ މެދުގައި މަޝްވަރާ ކޮށްފަ އެވެ. އަދި އެކަމުގައި އިސްލާމީ ޤައުމުތަކުން އެއްބައިވާން ޖެހޭ ކަމަށް ވެސް، ސަމިޓުގައި ބައިވެރިވި ޤައުމުތަކުން ވަނީ ފާހަގަ ކޮށްފަ އެވެ. 

މީގެ އިތުރުން ފަލަސްޠީނުގެ ރައީސް އައްބާސް، އަދި ސައުދީގެ ވަލީ އަހުދު މުޙައްމަދު ބިން ސަލްމާންގެ މަޝްވަރާ ތަކުގައި ވަނީ އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އާއި، ޣައްޒާގެ މިހާރުގެ ޙާލަތާ ގުޅޭ ގޮތުން ވެސް މަޝްވަރާ ކުރައްވައިފަ އެވެ.

އެ މަޝްވަރާ ތަކުގައި މުޙައްމަދު ބިން ސަލްމާން ވަނީ ފަލަސްޠީނުގެ ރައްޔިތުންނާ ދެކޮޅަށް ހިިންގާ އަނިޔާވެރި އަމަލުތަކާއި، ރައްޔިތުން ފުރަގަސްދޭން މަޖުބޫރު ކުރުމަށް އިސްރާއީލް އިން ކުރަމުން އަންނަ ކަންކަން ކުށްވެރި ކުރައްވައިފަ އެވެ. އަދި އިސްރާއީލްގެ ހަނގުރާމައިގެ ނުރައްކާތެރި ނަތީޖާތައް ހުއްޓުވުމަށާއި، އާންމު ރައްޔިތުން ހިމާޔަތް ކުރުމަށް ބައިނަލްއަޤުވާމީ މުޖުތަމަ އަށް ގޮވާލައްވާ ކަމަށް ވެސް ވިދާޅުވެފައިވެ އެވެ.

ފަލަސްޠީނުގެ ރައީސް އައްބާސް އާއި ސައުދީގެ ވަލީ އަހުދު މުޙައްމަދު ބިން ސަލްމާން މަޝްވަރާ ކުރައްވާފައިވާއިރު، މި ދަނޑިވަޅަކީ ގިނަ ޤައުމު ތަކަކުން ފަލަސްޠީނުގެ މިނިވަން ދައުލަތް ބަލައި ގަންނަން ނިންމާފައިވާކަން އިއުލާން ކޮށްފައިވާ ދަނޑިވަޅެކެވެ.

އަންނަ ސެޕްޓެމްބަރު މަހު އޮންނަ އދ ގެ ޖެނަރަލް އެސެމްބްލީގެ ކުރިން ފްރާންސް، އިނގިރޭސިވިލާތް، ކެނެޑާ، މޯލްޓާ، އޮސްޓްރޭލިއާ ފަދަ ޤައުމު ތަކުން ވަނީ ފަލަސްޠީނުގެ މިނިވަން ދައުލަތް ބަލައި ގަންނަން ނިންމައިފަ އެވެ.