ރަޝިޔާ އާއި އިންޑިއާގެ ގުޅުން ވަރުގަދަ ކުރަނީ، އަހަރުގެ ފަހު ކޮޅު ޕުޓިން އިންޑިއާ އަށް

ރަޝިޔާގެ ރައީސް ވޮލަޑިމިއަރ ޕުޓިން، މިއަހަރުގެ ފަހު ކޮޅު އިންޑިއާ އަށް ވަޑައިގަންނަވާ ގޮތަށް ހަމަޖެހިފައިވާ ކަމަށް ރިޕޯޓު ކޮށްްފި އެވެ.

ދާދި ފަހުން އެމެރިކާގެ ރައީސް ޑޮނަލްޑް ޓްރަމްޕް ވަނީ، އެމެރިކާ އަށް އެތެރޭ ކުރާ އިންޑިއާގެ މުދަލުން ޓެރިފް ނެގުމަށް ނިންމައިފަ އެވެ. އެންމެ ފުރަތަމަ ޓްރަމްޕް ނިންމަވާފައި ވަނީ 25 އިންސައްތައިގެ ޓެރިފް ނެގުމަށެވެ. ނަމަވެސް، އިންޑިއާ އިން ރަޝިޔާގެ ތެޔޮ ގަތުން ހުއްޓާ ނުލާނެތީ، އިތުރު 25 އިންސައްތައިގެ ޓެރިފް އާއެކު، ޖުމުލަ 50 އިންސައްތައިގެ ޓެރިފް ނެގުމަށް ނިންމާފައިވެ އެވެ.

އެކަމާ ގުޅިގެން އިންޑިއާ އާއި ރަޝިޔާއާ ދެމެދު އޮތް ގުޅުން އިތުރަށް ވަރުގަދަ ކުރުމަށް ދެ ޤައުމުން މަޝްވަރާ ކުރަމުން އަންނަ ކަމަށް ވަނީ ބުނެފަ އެވެ. އަދި އިންޑިއާ އިން ބޭނުން ވަނީ އެމެރިކާގެ ޓެރިފްތަކާ ކުރިމަތިލައި، ރަޝިޔާއާ އެކު އޮތް ގުޅުން އިތުރަށް ވަރުގަދަ ކުރުމަށް ކަމަށް ވެސް މީޑިއާ ތަކުގައި ވަނީ ބުނެފަ އެވެ. 

އެގޮތުން ރަޝިޔާގެ ވެރި ރަށް މޮސްކޯގައި ކުރިއަށް ގެންދިޔަ ދެ ޤައުމުގެ ސަލާމަތީ މަޝްވަރާ ތަކުގައި، ރަޝިޔާ އާއި އިންޑިއާގެ އިސްތިރާޖީ ގުޅުން ހިފަހައްޓައި، އެ ގުޅުން އިތުރަށް ވަރުގަދަ ކުރުމަށް މަޝްވަރާކޮށް، އެކަމަށް ދެ ޤައުމުން ވެސް އަޒުމު ކަނޑައަޅާފައިވާ ކަމަށް ވަނީ ރިޕޯޓު ކޮށްފަ އެވެ. 

އިންޓަފެކްސް ނިއުން އެޖެންސީ އިން ރިޕޯޓު ކޮށްފައިވާ ގޮތުގައި އިންޑިއާގެ ނެޝަނަލް ސެކިއުރިޓީ އެޑްވައިޒަރު އަޖިތު ދޯލަވް ވަނީ، މިއަހަރުފެ ފަހު ކޮޅު ރަޝިޔާގެ ރައީސް ޕުޓިން އިންޑިއާ އަށް ރަސްމީ ދަތުރުފުޅެއްގައި ވަޑައިގަންނަވާނެ ކަމަށް ވިދާޅުވެފަ އެވެ. މިއަހަރުގެ ކުރީ ކޮޅު ވެސް ބައެއް މީޑިއާ ތަކުން ވަނީ މިފަދަ ރިޕޯޓުތަކެއް ކޮށްފަ އެވެ. އަޖިތު ދޯލަވް ވިދާޅުވެފައި ވަނީ، މިހާރު އިންޑިއާ އިން އިންތިޒާރު ކުރަމުން އަންނަނީ ޕުޓިންގެ ދަތުރުފުޅަށް ކަމަށެވެ. 

އަޖިރު ދޯލަވް ވަނީ، ރަޝިޔާގެ ސެކިއުރިޓީ ކައުންސިލްގެ ސެކްރެޓަރީ ސާގޭ ޝޮއިގޫއާ ބައްދަލު ކުރައްވައި، އިންޑިއާ އާއި ރަޝިޔާގެ ކަންކަޟާ ގުޅޭ ގޮތުން މުހިންމު މަޝްވަރާތަކެއް ކުރައްވައިފަ އެެެވެ. އެ ބައްދަލުވުމުގައި ވާހަކަ ދައްކަވަމުން ޝޮއިގޫ ވިދާޅުވެފައި ވަނީ، އިންސާފުވެރި އަދި ދެމެހެއްޓެނިވި ދުނިޔޭގެ ނިޒާމެއް އުފެއްދުމަށާއި، ބައިނަލްއަޤުވާމީ ޤާނޫނުގެ އިސްކަން ކަށަވަރު ކުރުމުގެ އިތުރުން، މިޒަމާނުގެ ގޮންޖެހުންތަކާ ކުތިމަތިލުމަށް އެކުގައި މަސައްކަތް ކުރުމަށް ދެ ޤައުމުން ވެސް އަޒުމު ކަނޑައަޅާ ކަމަށެވެ. 

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގެ ސަބަބުން ގިނަ ގޮން ޖެހުންތަކެއް ކުރިމަތިވެފައިވީ ނަމަވެސް، އިންޑިއާ އާއި ޗައިނާ ވެފައި ވަނީ ރަޝިޔާގެ ތެލުގެ އެންމެ ބޮޑު ވިޔަފާރި ވެރިންނަށެވެ. އެހެން ނަމަވެސް، ތެލުގެ އަގު ހެޔޮކަން ކުޑަ ވުމާ އެކު، އިންޑިއާގެ ސަރުކާރުގެ ރިފައިނަރީތަކުން ރަޝިޔާގެ ތެޔޮ ގަތުން ހުއްޓާލާފައިވާ ކަމަށް ބުނެފައިވެ އެވެ. 

ރަޝިޔާގެ ރައީސް ޕުޓިން އިންޑިއާ އަށް ކުރައްވާ ދަތުރުފުޅުގައި ދެ ޤައުމުގެ ދިފާއީ އެއްބާރުލުމުގެ އިތުރުން، ތެލުގެ ވިޔަފާރީގެ މައްސަލަތައް ހައްލު ކުރުމަށް މަޝްވަރާ ކުރުމަކީ އެކަށީގެންވާ ކަމެއް ކަމަށް ތަޖުރިބާ ކާރުން ބުނެ އެވެ.