ގަތަރުގެ ޗެމްޕިއަން ދުހާލީ އެސްސީ އަތުން ރާއްޖެ ބަލިވެއްޖެ

މިހާރު ގަތަރުގައި ކޭމްޕްކުރަމުން އަންނަ ރާއްޖޭ ގައުމީ ޓީމު ކުޅުނު ރަހްމަތްތެރިކަމުގެ މެޗުން ގަތަރުގެ ޗެމްޕިއަން އަތުން ބަލިވެއްޖެ އެވެ.

އޭޝިއަން ކަޕް ކޮލިފައިންގެ ގްރޫޕް ސްޓޭޖުގައި އޮމާންއާ ދެކޮޅަށް ކުޅޭ މެޗަށް ތައްޔާރުވަމުން އަންނަ ރާއްޖެ އަދި ދުހާލީ އެފްސީ ބައްދަލުކުރި މެޗުން ރާއްޖެ ބަލިވީ 0-1 ގެ ނަތީޖާއަކުންނެވެ.

މެޗުގައި ފެނިގެންދިޔަ ހަމައެކަނި ލަނޑު 21 ވަނަ މިނެޓުގައި ދުހާލީ އަށް ކާމިޔާބުކޮށްދިނީ ޔޫސުފް އަލް އަރަބީ އެވެ. މެޗުގައި އަލް ދުހާލީ ޓީމަށް ވަނީ ލަނޑު ޖެހުމަށް ދެވަނަ ހާފްގައި ހުސް ގިނަ ފުރުސަތުތައް ލިބިފައެވެ.

މި މެޗުގައި ރާއްޖޭ ޓީމުގެ ގިނަ ކުޅުންތެރިންނަށް ކޯޗު ފުރުސަތު ދީފައިވާއިރު، ކެޕްޓަން ބޭންޑް އަޅައިގެން މެޗަށް ނިކުތީ މާޒިޔާ ސްޕޯޓްސް އެންޑް ރެކްރިއޭޝަންގެ އަސްހަދު އަލީ (އަޑުބަރޭ) އެވެ.

މެޗަށް އަލް ދުހާލީ ޓީމު ނިކުތީ އެޓީމުގައި ހިމެނޭ ގަތަރު ގައުމީ ޓީމު ކުޅުންތެރިން ނުލައެވެ. މީގެއިތުރުން އެޓީމުގައި ހިމެނޭ ބައެއް ބިދޭސީ ކުޅުންތެރިންވެސް މި މެޗުގައި ނުކުޅެއެވެ.

ޖުމްލަ 23 ކުޅުންތެރިންނާއެކު ގައުމީ ޓީމުގެ ސްކޮޑު އެކުލަވާލާފައިވާއިރު، ސްކޮޑްގައި ނިއުރޭޑިއަންޓްގެ ނުވަ ކުޅުންތެރިޔަކު ހިމެނެއެވެ. މީގެ އިތުރުން ސްކޮޑްގައި މާޒިޔާގެ ހަ ކުޅުންތެރިއަކު ހިމެނޭއިރު، ޓީސީގެ ތިން ކުޅުންތެރިންނާއި، ގްރީން ސްޓްރީޓްގެ ދެ ކުޅުންތެރިންނާއި، ތިނަދޫގެ ދެ ކުޅުންތެރިންގެ އިތުރުން މިލަންދޫގެ ކުޅުންތެރިއަކު ވެސް ހިމެނެއެވެ.

ގައުމީ ޓީމު ގަތަރުގައި ކޭމްޕް ކުރުމަށް ފަހު އެނބުރި މާލެ ނައިސް ސީދާ ޓީމު ފުރާނީ މެޗު ކުޅުމަށް އޮމާން އަށެވެ. ރާއްޖެ އަދި އޮމާން ބައްދަލު ކުރާ މެޗު އޮންނާނީ އަންނަ މަހުގެ ފަސް ވަނަ ދުވަހެވެ. ރާއްޖެ ވަނީ އޭޝިއަން ކަޕް ކޮލިފައިންގައި ކުޅުނު ފުރަތަމަ މެޗުން ފަލަސްތީން އަތުން ބަލިވެފައެވެ. އެހެން ނަމަވެސް ރާއްޖެ ވަނީ ދެވަނަ މެޗުން ބޫޓާނާ ވާދަކޮށް މޮޅުވެފައެވެ.