ޗެލްސީ އަށް ކުޅެމުން އަންނަ ސްޕެއިންގެ ޑިފެންޑަރު މާކް ކުކުރޭލާގެ އެއްބަސްވުން އައު ކުރުމަށް، އެ ކުލަބުން މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 27 އަހަރުގެ ކުޅުންތެރިޔާ ޗެލްސީ އަށް ބަދަލުވީ 2022 ވަނަ އަހަރު އެވެ. ބްރައިޓަން ދޫކޮށްލުމަށް ފަހު، ކުކުރޭލާ ޗެލްސީ އަށް ބަދަލުވީ ހަ އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2028 ވަނަ އަހަރު އެވެ.

ކުކުރޭލާގެ އެއްބަސްވުމުގައި ބާކީ ތިން އަހަރު އޮތް ނަމަވެސް، ޗެލްސީ އިން އަންނަނީ އޭނާގެ އެއްބަސްވުން އައު ކުރުމުގެ މަސައްކަތް ކުރަމުން ކަމަށް މީޑިއާ ރިޕޯޓުތައް ބުނެ އެވެ. އެގޮތުން ޗެލްސީ އިން އަންނަނީ، އެކަމާ ގުޅުން ހުރި މަޝްވަރާތައް ކުރިއަށް ގެންދަމުން ކަމަށް ރިޕޯޓު ތަކުގައި ބުނެފައިވެ އެވެ.

އެގޮތުން ޗެލްސީ އިން ބޭނުން ވަނީ ދިގު މުއްދަތަކަށް ކުކުރޭލާ އެ ކުލަބުގައި ބަހައްޓަން ކަމަށާއި، އެހެންވެ އައު އެއްބަސްވުމެއް ހުށަހެޅުމަށް އެ ކުލަބުން ބޭނުންވާ ކަަމަށް ވަނީ ބުނެފަ އެވެ. ޗެލްސީ އިން ކުކުރޭލާގެ އެއްބަސްވުން އައު ކުރުމުގެ މަސައްކަތް ކުރަމުން އަންނަނީ، އޭނާ ހޯދުމަށް ބައެއް އެހެން ކުލަބު ތަކުން ޝައުޤުވެރިކަން ގެންގުޅެމުން ގެންދާތީ ކަމަށް ވެސް ރިޕޯޓު ތަކުގައި ވަނީ ބުނެފަ އެވެ.

ބައެއް މީޑިއާ ތަކުގައި ބުނެފައިވާ ގޮތުން، ސައުދީ ޕްރޯ ލީގުގެ އަލް ނަޞްރު އިން ކުކުރޭލާ ހޯދުމުގެ ޝައުޤުވެރިކަން ގެން ގުޅުނެވެ. ނަމަވެސް، އެކަމާ ގުޅިގެން އެ ކުލަބުން ރަސްމީ ސިފައެއްގައި އެއްވެސް މަސައްކަތެއް ކުރިކަން ޔަގީން ނުކުރެވޭ ކަމަށް ވަނީ ބުނެފަ އެވެ.

ކުކުރޭލާ ވަނީ މިހާތަނަށް އޭނާ ޗެލްސީގައި ހޭދަ ކުރި ހަތަރު ސީޒަންގެ ތެރޭގައި، އެ ކުލަބަށް ކުޅެދިން 113 މެޗުގައި އަށް ލަނޑު ޖަހައިފަ އެވެ. ޗެލްސީ އާއެކު އޭނާ ވަނީ ޔުއެފާ ކޮންފަރެންސް ލީގުގެ އިތުރުން، ފީފާ ކުލަބު ވޯލްޑް ކަޕް ވެސް ކާމިޔާބު ކޮށްފަ އެވެ.

ޗެލްސީގައި ތިބި ކުޅުންތެރިންގެ ތެރެއިން އެ ޓީމުގެ ކޯޗު އެންޒޯ މަރެސްކާ އެންމެ އިސްކަން ދެމުން އަންނަ ކުޅުންތެރިންގެ ތެރޭގައި ކުކުރޭލާ ހިމެނެ އެވެ. މީޑިއާ ރިޕޯޓުތައް ބުނާ ގޮތުގައި، ކުކުރޭލާ އަކީ މަރެސްކާގެ ޕްލޭންގައި ހިމެނޭ މުހިންމު ކުޅުންތެރިޔަކަށްވާއިރު، އޭނާ ޗެލްސީ ދޫކޮށްލަން މަރެސްކާ ބޭނުމެއްް ނުވާނެ އެވެ.

މީޑިއާ ތަކުގައި ބުނެފައިވާ ގޮތުން ޗެލްސީ އިން މިހާރު އަންނަނީ އައު އެއްބަސްވުމުގެ މަޝްވަރާތައް ކުކުރޭލާ އާއެކު ކުރިއަށް ގެންދަމުންނެވެ. އެގޮތުން އެ މަޝްވަރާތަކުގައި ޗެލްސީ އާއި ކުކުރެލާއާ ދެމެދު އެއްބަސްވުމަކަށް އައުމުގެ ފުރުސަތު ބޮޑު ކަމަށް ވެސް ބުނެފައިވެ އެވެ.