އިންޑިއާއާ ދެކޮޅަށް ފިޔަވަޅު ތަކެއް އެޅުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވި ނަމަވެސް، އެ ޤައުމުން ރަޝިޔާގެ ތެޔޮ ގަތުން ހުއްޓައި ނުލާނެ ކަމަށް އެ ޤައުމުގެ ސަރުކާރުގެ އޮފިޝަލަކު ވިދާޅުވެއްޖެ އެވެ. އިންޑިއާ ސަރުކާރުގެ އޮފިޝަލުން މި ފަދަ ވާހަކަތަކެއް ދައްކަވާފައި މި ވަނީ ދާދި ފަހުން ޓްރަމްޕް ދެއްކެވި ވާހަކައަކާ ގުޅިގެންނެވެ. އެގޮތުން ހުކުރު ދުވަހު ޓްރަމްޕް ނޫސްވެރިންނާ ވާހަަކަ ދައްކަވަމުން ވިދާޅުވެފައި ވަނީ، އިންޑިއާ އިން އިތުރަށް ދެން ރަޝިޔާގެ ތެޔޮ ނުގަންނަން ނިންމާފައިވާ ކަމުގެ މައުލޫމާތު އޭނާ އަށް ލިބިވަޑައިގެންފައިވާ ކަމަަށެވެ. ނިއު ޔޯކް ޓައިމްސް އިން ރިޕޯޓު ކޮށްފައިވާ ގޮތުން އިންޑިއާ ސަރުކާރުގެ ދެ އޮފިޝަލަކު ވަނީ، އެ ޤައުމުގެ ސަރުކާރުގެ ސިޔާސަތަށް އެއްވެސް ބަދަލެއް ނާންނަ ކަމަށް ހާމަކޮށްފަ އެވެ. އަދި ތެޔޮ ކުންފުނިތަކަށް ރަޝިޔާ އިން ތެޔޮ ގަތުން މަދު ކުރުމަށް އެއްވެސް އިރުޝާދެއް ދީފައި ނުވާނެ ކަމަށް އޭގެ ތެރެއިން އެއް އޮފިޝަލަކު ވަނީ ވިދާޅުވެފަ އެވެ. އިންޑިއާ އިން ރަޝިޔާގެ ތެޔޮ އަދި އެ ޤައުމުގެ އަސްކަރީ ހަތިޔާރު ގަންނާތީ، އިންޑިއާއާ ދެކޮޅަށް ފިޔަވަޅު އަޅުއްވާނެ ކަމަށް ޓްރަމްޕް އިއުލާން ކުރެއްވީ އޭނާގެ ޓްރުތު ސޯޝަލް މީޑިއާގަ އެވެ. އެގޮތުން އިންޑިއާ އިން އެމެރިކާ އަށް އެތެރެ ކުރާ މުދަލަށް 25 އިންސައްތައިގެ ޓެރިފެއް ނަގާނެ ކަމަށް ޓްރަމްޕް ވަނީ ވިދާޅުވެފަ އެވެ. އެ ވާހަކަތައް ހާމަ ކުރެއްވި ފަހުން ޓްރަމްޕް ވިދާޅުވެފައި ވަނީ، އިންޑިއާ އިން ރަޝިޔާއާ އެެކު ކުރާ ވިޔަފާރިއާ މެދު ކަންބޮޑުވުމެއް ނެތް ކަމަށެވެ. މިދިޔަ ޖުލައި މަހުގެ ތެރޭގައި ޓްރަމްޕް ވިދާޅުވެފައި ވަނީ ރަޝިޔާ އިން ޔުކްރެއިންއާ އެކު ސުލްހަ ނުހަދާ ނަމަ، ރަޝިޔާގެ ތެޔޮ ގަންނަ ޤައުމުތަކުގެ މައްޗަށް 100 އިންސައްތަ ޓެރިފް ނަގާނެ ކަމުގެ އިންޒާރު ދެއްވާފައިވެ އެވެ. ރަޝިޔާ އަކީ އިންޑިއާ އަށް އެންމެ ގިނައިން ތެޔޮ ސަޕްލައި ކުރާ އެއް ޤައުމެވެ. އެގޮތުން އިންޑިއާގެ ޖުމުލަ ތެލުގެ 35 އިންސައްތަ ލިބެނީ ރަޝިޔާ އިންނެވެ.މިކަމާ ގުޅޭ ގޮތުން އެމެރިކާގެ ރިޔާސީ ގަނޑުވަރު ވައިޓް ހައުސްގެ އިތުރުން، އިންޑިއާގެ މިނިސްޓްރީ އޮފް އެކްސްޓާނަލް އެފެއާޒް އަދި މިނިސްޓްރީ އޮފް ޕެޓްރޯލިއަމް އެންޑް ނެޗުރަލް ގޭސް އިން މިހާތަނަށް އެއްވެސް އެއްޗެއް ބުނެފައި ނުވެ އެވެ. އިންޑިއާއާ ދެކޮޅަށް ފިޔަވަޅު ތަކެއް އަޅުއްވާނެކަން ހާމަ ކުރައްވަމުން އޭރު ޓްރަމްޕް ވިދާޅުވެފައި ވަނީ، އިންޑިއާ އަކީ އެމެރިކާގެ ގާތް ރަޙުމަތްތެރިއެއް ކަމަށެވެ. އެހެން ނަމަވެސް، ފާއިތުވެ ދިޔަ އަހަރު ތަކުގައި އިންޑިއާ އެކު ކޮށްފައި ވަނީ ވަރަށް މަދު ވިޔަފާރިއެއް ކަމަށާއި، އެހެން ދިމާވާ މައިގަނޑު ސަބަބަކީ އިންޑިއާ އިން އެމެރިކާގެ އުފެއްދުން ތަކުން ނަގާ ޓެރިފް މަތިވުން ކަމަށް ވެސް ޓްރަމްޕް ވިދާޅުވެފައިވެ އެވެ.  އިތުރަށް ޓްރަމްޕް ވިދާޅުވެފައި ވަނީ އިންޑިއާ އިން ރަޝިޔާގެ ތެލާއި، އެ ޤައުމުގެ އަސްކަރީ ހަތިޔާރު ގަތުމުގެ ސަބަބުން، ރަޝިޔާ އިން ކުރިއަށް ގެންދާ ޔުކްރެއިން ހަނގުރާމަ ކުރިއަށް ގެންދިޔުމަށް އެ ޤައުމަށް މަގު ފަހި ވަމުން އަންނަ ކަމަށެވެ. މި މައްސަލައިގެ ސަބަބުން އިންޑިއާގެ ބޮޑު ވަޒީރު ނަރެންދްރަ މޯދީ އާއި، އެމެރިކާގެ ރައީސް ޓްރަމްޕްއާ ދެމެދު ގޮތް ގާތް ގުޅުމަށް ހީނަރު ކަމެއް އަންނާނެ ކަމަށް ތަޖުރިބާ ކާރުން ބުނެ އެވެ. އެމެރިކާގެ ރައީސް ކަމުގެ ފުރަތަމަ ދައުރުގައި ޓްރަމްޕް ހުންނެވިއިރު، މޯދީ އާއި ޓްރަމްޕްގެ ގުޅުން ވަރަސް ބަދަހި ކަމަށް ބުނެފައިވެ އެވެ. ނަމަވެސް މިހާރު އެ ގުޅުމަށް ވެސް އަސަރު ކޮށްފައިވާ ކަމަށް ބުނެފައިވެ އެވެ.