ސްރީ ލަންކާގައި ބާއްވަން މަސައްކަތް ކުރި ފުޓުބޯޅަ މުބާރާތުގައި ބައިވެރި ވަނީ ދިވެހި ރާއްޖެ އިން އެކަނި ކަމަށް ވާތީ، މުބާރާތުގެ ބަދަލުގައި ލަންކާ އާއި ރާއްޖެއާ ދެމެދު ރަޙުމަތްތެރި ކަމުގެ މެޗުތަކެއް ކުޅުމަށް ނިންމައިފި އެވެ.

ލަންކާގައި ބާއްވަން މަސައްކަތް ކުރި މުބާރާތަކީ، މިއަހަރު އެ ޤައުމުގައި ބާއްްވަން ހަމަޖައްސާފައި އޮތް ސާފް ޗެމްޕިއަންޝިޕް ފުޓުބޯޅަ މުބާރާތް ފަސް ކުރަން ޖެހުމުން އޭގެ ބަދަލުގައި ބާއްވާ މުބާރާތެކެވެ. މިއަހަރުގެ ޖޫން މަހު ލަންކާގައި ސާފް ޗެމްޕިއަންޝިޕް ބާއްވަން ތާވަލު ކޮށްފައި އޮތް ނަމަވެސް، ފަހުން ވަނީ އަންނަ އަހަރަށް މުބާރާތް ފަސްކޮށްފަ އެވެ.

އެއާއެކު ލަންކާގެ ފުޓުބޯޅަ ފެޑެރޭޝަން އިން ވަނީ ސުޕަ ކަޕް ފޯ ނޭޝަން ފުޓްބޯލް ޗެމްޕިއަންޝިޕްގެ ނަމުގައި މުބާރާތެއް ބާއްވަން ނިންމައިފަ އެވެ. އެ މުބާރާތުގެ ދައުވަތު ލަންކާ އިން ވަނީ ހަތަރު ޤައުމަކަށް ފޮނުވައިފަ އެވެ. އެއީ ރާއްޖޭގެ އިތުރުން، އިންޑިއާ، ބޫޓާން އަދި ޕާކިސްތާން އަށެވެ. ލަންކާގެ ދައުވަތު ރާާއްޖެ އިން ޤަބޫލު ކުރިއިރު، އިންޑިއާ އާއި، ބޫޓާން އަދި ޕާކިސްތާން ދައުވަތު ޤަބޫލު ކޮށްފައި ނުވާ ކަމަށް ލަންކާގެ މީޑިއާ ތަކުގައި ވަނީ ބުނެފަ އެވެ.

ލަންކާގެ ފުޓުބޯޅަ ފެޑެރޭޝަން އިން ރާވާފައި އޮތީ ސުޕަ ކަޕް ފޯ ނޭޝަން ފުޓްބޯލް ޗެމްޕިއަންޝިޕް އަންނަ ސެޕްޓެމްބަރު މަހުގެ އެއް ވަނަ ދުވަހުން، ނުވަ ވަނަ ދުވަހުގެ ނިޔަލަށް ކުރިއަށް ގެންދާށެވެ. ނަމަވެސް، މުބާރާތުގައި އެކަށީގެންވާ މިންވަރަށް ޓީމުތަކުން ބައިވެރި ނުވުމުގެ ސަބަބުން ލަންކާ އަށް މުބާރާތް ކުރިއަށް ގެންދެވޭ ގޮތް ނުވީ އެވެ.

ނަމަވެސް، ހަމައެކަނި ރާއްޖެ އިން މުބާރާތުގެ ދައުވަތު ޤަބޫލު ކުރުމުން ލަންކާ އިން މިހާރު ވިސްނަމުން ދަނީ ލަންކާ އާއި ރާއްޖެއާ ދެމެދު ރަޙުމަތްތެރި ކަމުގެ މެޗުތަކެއް ކުޅުމަށެވެ. އެގޮތުން އ ދުވަސް ވަރު ރާއްޖެއާ ދެކޮޅަށް ލަންކާ އިން ދެ މެޗެއް ކުޅުމަށް ނިންމާފައިވާ ކަމަށް ރިޕޯޓު ކޮށްފައިވެ އެވެ.

ލަންކާގެ ފުޓުބޯޅަ ފެޑެރޭޝަންގެ ރައީސް ޖޭސްވާރު އުމަރުއާ ހަވާލާދީ އެ ޤައުމުގެ މީޑިއާ ތަކުގައި ބުނެފައި ވަނީ، ރާއްޖެއާ ދެކޮޅަށް ކުޅޭ އެ ދެ މެޗުން ލަންކާ އަށް ގިނަ ގުނަ ފައިދާ ތަކެއް ކުރާނެ ކަމަށެވެ. އަދި އެ މެޗު ތަކުގެ ސަބަބުން، އޮކްޓޫބަރު ލަންކާ އިން ކުޅެން އޮތް އޭއެފްސީ އޭޝިއަން ކަޕް ކޮލިފިކޭޝަންގެ މެޗުތަކަށް ޓީމަށް ރަނގަޅު ކުރިއެރުން ތަކެއް ލިބޭނެ ކަމަށް އުންމީދު ކުރާ ކަމަށް، ޖޭސްވާރު އުމަރުއާ ހަވާލާދީ މީޑިއާގައި ބުނެފައިވެ އެވެ.

ރާއްޖެ އިން އެންމެ ފަހުން ލަންކާއާ ދެކޮޅަށް ކުޅުނީ 2022 ވަނަ އަހަރުގެ ޖަނަވަރީ މަހު އެވެ. އެއީ އޭއެފްސީ އޭޝިއަން ކަޕް ކޮލިފިކޭޝަންގައި ކުޅުނު މެޗެވެ. އެ މެޗުގައި ރާއްޖެ އިން ވަނީ ލަންކާގެ މައްޗަށް ކުރި ހޯދައިފަ އެވެ. ރާއްޖެ އާއި ލަންކާ އިން ވަނީ ޖުމުލަ 22 ފަހަރު ބައްދަލު ކޮށްފަ އެވެ. އޭގެ ތެރެއިން ނުވަ މެޗުން ރާއްޖެ ވަނީ މޮޅުވެފަ އެވެ. ތިން މެޗުން ލަންކާ މޮޅުވީއިރު، ދިހަ މެޗު ވަނީ އެއްވަރުވެފަ އެވެ.