އަންނަ އަހަރުގެ މެއި މަހު ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕް އަނެއްކާ ވެސް ފަސްކޮށްފި އެވެ.
ބަންގްލަދޭޝްގައި ބާއްވާ ސާފް ޗެމްޕިއަންޝިޕް މިފަހަރު ފަސްކޮށްފައި ވަނީ އަންނަ އަހަރުގެ ސެޕްޓެމްބަރު މަހަށެވެ. އެގޮތުން މުބާރާތް މިހާރު ރޭވިފައި އޮތް ގޮތުން އޮންނާނީ އަންނަ އަހަރުގެ ސެޕްޓެމްބަރު މަހުގެ ހަތަރު ވަނަ ދުވަހު ފެށިގެން 13 ވަނަ ދުވަހަށެވެ.
މުބާރާތް ފަސް ކުރި ސަބަބު ހާމަކޮށްފައިނުވާއިރު، ކޮންމެ ދެ އަހަރަކުން އެއް އަހަރު ބާއްވާ މި މުބާރާތް އަސްލު ބާއްވަން ޖެހެނީ މި އަހަރެވެ. އެހެން ނަމަވެސް އިންޑިއާގެ އެދުމުގެ މަތިން މުބާރާތް އަންނަ އަހަރަށް ފަސްކުރީ ދާދި ފަހުންނެވެ. އިންޑިއާ އިން މުބާރާތް ފަސްކުރަން އެދުނީ ފީފާ 17 އަހަރުން ދަށުގެ ފުޓްބޯޅަ މުބާރާތަށް އެ ގައުމުން ވަގުތު ބޭނުން ވުމުންނެވެ.
ސާފް ޗެމްޕިއަންޝިޕް އެންމެ ފަހުން ބާއްވާފައި ވަނީ 2015 ވަނަ އަހަރެވެ. އެފަހަރު މުބާރާތް ކާމިޔާބުކުރީ ސެމީގައި ރާއްޖެ ބަލިކުރި އިންޑިއާ އެވެ. ރާއްޖެއަށް މުބާރާތުގެ ޗެމްޕިއަންކަން ހޯދުނީ 2008 ވަނަ އަހަރު އެކަނިއެވެ.
މީގެ ކުރިން މުބާރާތް ބާއްވާނެ ތަނާއި މުބާރާތް ބާއްވާނެ ތާރީހު ކަނޑައެޅުމުގައި އިންޑިއާއިން ބޮޑު ރޯލެއް އަދާކުރަމުން ގެންގޮސްފައިވެއެވެ. މުބާރާތުގެ ސްޕޮންސަރުންގެ އެދުމުގެ މަތިން މިހާރުވެސް، ކޮންމެ ދެ ފަހަރަކުން އެއް ފަހަރު މުބާރާތް ބާއްވަމުން އަންނަނީ އިންޑިއާގައެވެ. މި މުބާރާތް އެންމެ ގިނައިން ކާމިޔާބު ކޮށްފައިވާ ގައުމަކީ ވެސް އިންޑިއާއެވެ. އިންޑިއާ އިން ވަނީ މިހާތަނަށް ބޭއްވި ނުވަ މުބާރާތުގެ ތެރެއިން ހަ މުބާރާތް ކާމިޔާބު ކޮށްފައެވެ.
