އިންޑިއާގެ ބޮޑުވަޒީރު ނަރެންދުރަ މޯދީ ފުރަމާނަ ދަތުރުފުޅަށް ފަހު އެނބުރި ގައުމަށް އެެ ވަޑައިގަތީ ރާއްޖޭގެ ރައީސުލް ޖުމްހޫރިއްޔާ ޑރ. މުހައްމަދު މުއިއްޒު ކުޑަކަކޫ ޖައްސުވާފައި ކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވެއްޖެއެވެ.

އަބްދުﷲ ވަހީދު އެފަދައިން ވިދާޅުވީ ބުރާސްފަތި ދުވަހުގެ ރޭ އިދިކޮޅު ޕާޓީ އެމްޑީޕީން ބޭއްވި ހަރުގެ ޖަލްސާގައި ވާހަކަ ދައްކަވަމުންނެވެ.

ވަހީދު ވިދާޅުވީ މީގެ ކުރިން އެމްޑީޕީން ސަރުކާރެއް ޖަވާބުދާރީ ކުރުވަން މަސައްކަތް ނުކުރާ ވަރަށް މި ވޭތުވެ ދިއަ ދެ އަހަރު ދުވަހުގެ ތެރޭގައި މި ސަރުކާރު ޖަވާބުދާރީ ކުރުވަން މަސައްކަތް ކުރައްވަމުން ގެންދަވާ ކަމަށެވެ. އެގޮތުން އެމްޑީޕީ ހަރުގޭގައި އެކި ނަންނަމުގައި ކުރިއަށް ގެންދާ ހަރަކާތްތަކަކީ ވެސް މި ސަރުކާރު ޖަވާބުދާރީ ކުރުވުމަށް އެމްޑީޕީން ކުރަމުންގެންދާ މަސައްކަތް ކަމަށް އޭނާ ވިދާޅުވި އެވެ.

ވަހީދު ވިދާޅުވީ އެމްޑީޕީ ފަހަތަކަށް ވެސް ނުޖެއްސޭނޭ ކަމަށާއި އެމްޑީޕީ ދެމިއޮންނާނީ ސަރުކާރު ޖަވާބުދާރީ ކުރުވުމުގައި ކެރިގެން ކަމަށެވެ. އަދި އިރާދަކުރެއްވިއްޔާ ދެން މި ގައުމުގައި އޮންނާނީ އެމްޑީޕީ ވެރިކަމެއް ކަމުގައި ވެސް އޭނާ ވިދާޅުވި އެވެ.

ވަހީދު ވިދާޅުވީ މިއަދު މިއޮތް ސަރުކާރު އިތުރަށް ދަމަހައްޓަން ބޭނުންވާ އެއްވެސް ރައްޔިތަކު މިހާރު މި ގައުމުގައި ނެތް ކަމަށާއި އެއީ މިއަދު ގިނަ ބަޔަކު ބޭނުންވާ ގޮތް ކަމަށެވެ. އަދި އޭގެ ސަބަބެއްކަމުގައި ވަނީ ރައީސް މުއިއްޒުގެ މި ސަރުކާރު އައީ މި ގައުމުގައި ތިބި އިންޑިއާ ސިފައިން މި ގައުމުން ބާލާނެ ކަމަށް ވައުދުވެގެން ކަމަށްވީ ނަމަވެސް އެ ވައުދު ފުއްދާފައި ނުވުން ކަމަށެވެ. އަދި އޭގެ ބަދަލުގައި ވެރިކަމަށް އައުމަށް ފަހު ކުރެއްވި ކަމަކީ އިންޑިއާ ސިފައިންގެ ޔުނިޔޯމް ބަދަލުކުރެއްވީ ކަމުަގައި ވަހީދު ވިދާޅުވި އެވެ.

ވަހީދު ވިދާޅުވީ އިންޑިއާ ސިފައިން ބޭލުމުގެ ވައުދު ވެސް ނުފުއްދުނު އިރު، އިންޑާއާއި އެކުގައި ހަދާފައި ހުރި އެއްބަސްވުންތައް ވެސް ހާމަނުކޮށް ސިއްރުކޮށްފައިވާ ކަމަށާއި އަދި އޭގެ އިތުރުން އިތުރު އެއްބަސްވުންތައް ވެސް މަތިމައްޗަށް ހަދަމުން އަންނަ ކަމަށެވެ.

މީގެ އިތުރުން ދެން ފެނިގެން މި ދިއައީ ރާއްޖޭގެ 60 ވަނަ މިނިވަން ދުވަހު، އިންޑިއާގެ ބޮޑުވަޒީރު ވަޑައިގެން މި ގައުމުގެ ރައީސުލްލްޖުމްހޫރިއްޔާ ޑރ. މުހައްމަދު މުއިއްޒު، ރާއްޖޭގެ ފަސްގަނޑުގައި ކުޑަކަކޫ ޖެއްސުވި މަންޒަރު ކަމުގައި ވަހީދު ވިދާޅުވިއެވެ.

ވަހީދު އިތުރަށް ވިދާޅުވީ މިއަދު ދިވެހިންނަށް މި ގައުމު ލިބެން ނެތް ކަމަށާއި މިހާރު މި އޮތް ވެރިކަން ބަދަލުނުކޮށް މި ގައުމު ސަލާމަތް ނުކުރެވޭނޭ ކަމަށެވެ.