ރާއްޖެ އަށް ޒިޔާރަތްކުރާ ސްރީލަންކާގެ ރައްޔިތުންނަށް 90 ދުވަހުގެ ހިލޭ އޮން-އެރައިވަލް ޓޫރިސްޓް ވިސާ ދޭ ގޮތައް ހަމަޖައްސައިފިއެވެ.

ލަންކާގެ ރައީސް އަނުރާ ކުމާރާ ޑިސަނަޔަކެ ދިވެހިރާއްޖެ އަށް ކުރައްވާ ރަސްމީ ދަތުރުފުޅާ ގުޅިގެން، ދިވެހި ސަރުކާރުން ވަނީ ފަތުރުވެރިންގެ ގޮތުގައި ދިވެހިރާއްޖެ އަށް ޒިޔާރަތްކުރާ ސްރީލަންކާގެ ރައްޔިތުންނަށް 90 ދުވަހުގެ ހިލޭ އޮން-އެރައިވަލް ޓޫރިސްޓް ވިސާ ދޭނެކަމަށް އިޢުލާނު ކޮށްފައެވެ.

މި ވިސާ ދޫކުރަން ފަށާނީ 29 ޖުލައި 2025 އިން ފެށިގެންނެވެ.

މި ވިސާ ހޯދާ ފަރާތްތަކުގެ އަތުގައި ސައްޙަ ޕާސްޕޯޓު އޮތުމާއެކު ދިވެހިރާއްޖޭގައި ހޭދަކުރާ މުއްދަތުގައި އެމީހުންގެ ޚަރަދުތައް ހަމަޖެއްސުމަށް އެކަށީގެންވާ މާލީ ތަނަވަސްކަން ހުރިކަން ސާބިތުކޮށްދޭން ޖެހޭނެއެވެ.

މި ފުރުޞަތު ތަނަވަސްވީ ސްރީލަންކާ އާއި ދިވެހިރާއްޖެ އާ ދެމެދު ވިސާ ފަސޭހަކުރުމާ ގުޅޭގޮތުން ވެފައިވާ އެއްބަސްވުމުގެ ދަށުންނެވެ.

ދިވެހި ސަރުކާރުން ބުނެފައި ވަނީ މި ފިޔަވަޅަކީ ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާ ކުރުމަށް ކުރެވޭ މަސައްކަތުގެ ތެރެއިން އެޅޭ ފިޔަވަޅެއް ކަމަށާއި، އަދި ސްރީލަންކާ އާއެކު އޮތް ގުޅުމަށް ދިވެހިރާއްޖެ އިން ދޭ އަހައްމިއްޔަތު ހާމަކޮށްދޭ ކަމެއް ކަމަށެވެ.