ގަވާއިދާ ޚިލާފަށް ލަންކާގައި ހިންގާ ކޯސްތަކަށް ސަމާލުވުމަށް އެމްކިއުއޭއިން އިލްތިމާސްކޮށްފި
ހުއްދަ ދީފައިވާ މިންގަނޑުތަކާ ޚިލާފަށް، ހަޔަރ ޑިޕްލޮމާއިން މަތީގެ ޓަރޝަރީ ޕްރޮގްރާމްތައް އެހެން ޤައުމުތަކާ ގުޅިގެން ލަންކާގައި ހިންގާކަން ވަނީ ފާހަގަކުރެވިފަ
އެމްކިއުއޭގެ ސީއީއޯ ފިޒާނާ ރަޝީދު
ސްރީލަންކާގެ ކަމާ ބެހޭ އިދާރާތަކުން ހުއްދަ ދީފައިވާ މިންގަނޑާ ޚިލާފަށް މަތީ ތަޢުލީމުދޭ ޕްރޮގުރާމްތަކެއް ހިންގަމުންދާތީ، އެޤައުމުގައި ކިޔެވުމަށް ދިއުމުގެ ކުރިން ސަމާލުވުމަށް މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން އިލްތިމާސްކޮށްފިއެވެ.
މިކަމާ ގުޅިގެން އެމްކިއުއޭ އިން ނެރުނު ބަޔާނުގައި ފާހަގަކޮށްފައިވާ ގޮތުގައި، ސްރީލަންކާގެ ޓަރޝަރީ އެންޑް ވޮކޭޝަނަލް އެޑިއުކޭޝަން ކޮމިޝަނުން ކަނޑައަޅާފައިވާ މިންގަނޑުތަކާ ޚިލާފަށް އެޤައުމުގެ ބައެއް މަރުކަޒުތަކުން ތަޢުލީމީ ޕްރޮގްރާމްތައް ހިންގަމުންދާކަން ވަނީ ފާހަގަކުރެވިފައެވެ. މީގެ އިތުރުން، ހުއްދަ ދީފައިވާ މިންގަނޑުތަކާ ޚިލާފަށް، ހަޔަރ ޑިޕްލޮމާއިން މަތީގެ ޓަރޝަރީ ޕްރޮގްރާމްތައް އެހެން ޤައުމުތަކާ ގުޅިގެން ހިންގާކަންވެސް ވަނީ ފާހަގަކުރެވިފައެވެ.
މި މައްސަލައާ ގުޅިގެން އެމްކިއުއޭ އިން ވަނީ މިފަދަ ގަވާއިދާ ޚިލާފު ޕްރޮގްރާމްތަކުގެ ސެޓްފިކެޓްތައް މީގެ ފަހުން ޤަބޫލުނުކުރާނެކަމަށް ސާފުކޮށް ބަޔާންކޮށްފައެވެ. އަދި ލަންކާގައި ކިޔެވުމަށް ދިއުމުގެ ކުރިން އެމްކިއުއޭ އިން ދޫކުރާ "އިންޓެންޑެޑް" ލިޔުން ހޯދުމަކީ ކޮންމެހެން މުހިންމު ކަމެއްކަމަށް އެ އޮތޯރިޓީން ވަނީ އިރުޝާދު ދީފައެވެ.
ސްރީލަންކާގެ މަތީ ތަޢުލީމުގެ ނިޒާމުގައި، ޓަރޝަރީ އެންޑް ވޮކޭޝަނަލް އެޑިއުކޭޝަން ކޮމިޝަނުން ހުއްދަ ދެމުން އަންނަނީ ހަމައެކަނި ހަޔަރ ޑިޕްލޮމާ އިން ދަށުގެ ޓަރޝަރީ ޕްރޮގްރާމްތަކަށެވެ. ޑިގްރީއަށްވުރެ މަތީ ފެންވަރުގެ ޕްރޮގްރާމްތަކަށް ހުއްދަ ދިނުމުގެ އިޚްތިޞާސް ލިބިގެންވަނީ ޔުނިވަރސިޓީ ގްރާންޓްސް ކޮމިޝަނާއި، މިނިސްޓްރީ އޮފް އެޑިއުކޭޝަން އަދި ހަޔަރ އެޑިއުކޭޝަން އެންޑް ވޮކޭޝަނަލް އެޑިއުކޭޝަނަށެވެ.
އެމްކިއުއޭ އިން އިތުރަށް ސާފުކޮށްދީފައިވާ ގޮތުގައި، އެ އޮތޯރިޓީން ޤަބޫލުކުރާނީ ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑަށް ފެތޭ، އަދި އެ ފެންވަރުގެ ޕްރޮގްރާމަކަށް ވަނުމަށް ކަނޑައަޅާފައިވާ އެންޓްރީ ކްރައިޓީރިއާ ފުރިހަމަވާ ޕްރޮގްރާމްތައް އެކަންޏެވެ. އަދި މި ޕްރޮގްރާމްތަކަކީ ލަންކާގެ ކަމާބެހޭ އިދާރާތަކުން ހުއްދަ ދީފައިވާ މަތީ ތަޢުލީމުދޭ މަރުކަޒުތަކުން ހިންގާ ޕްރޮގްރާމްތަކަށް ވާންޖެހޭނެއެވެ.
ވީމާ، ދިވެހި ދަރިވަރުން ސްރީލަންކާގައި ކިޔެވުމަށް ފެށުމުގެ ކުރިން، އެ ދަރިވަރަކު ކިޔަވަން ގަސްދުކުރާ މަރުކަޒަކީ ސަނަދުތަކުގެ ފެންވަރު ބެލުމުގެ ގަވާއިދުގައި ބަޔާންކުރާ މިންގަނޑަށް ފެތޭ މަރުކަޒެއްތޯ ބެލުމަށާއި، އެ ޕްރޮގްރާމަކީ އެމްކިއުއޭ އިން ޤަބޫލުކުރާ ޕްރޮގްރާމެއްކަން ކަށަވަރުކުރުމަށް އެ އޮތޯރިޓީން ވަނީ އާންމުންނަށް އިލްތިމާސްކޮށްފައެވެ.
