ހޮނިހިރު ދުވަހުގެ ފަތިހު ތެހުރާނާއި އެހެން ސަރަހައްދުތަކަށް އިޒްރޭލުން ދިން ހަމަލާގައި ގެއްލުން ވެފައިވަނީ ހަމައެކަނި ރާޑާ ސިސްޓަމްތަކަށް ކަމަށާއި، އަދި މިވަގުތު އީރާނުން އިސްކަންދެނީ ޣައްޒާއާއި ލުބުނާނުގައި ހިނގަމުންދާ ހަނގުރާމަ ހުއްޓުވުމަށް ކަމަށް އިރާނުގެ އަސްކަރިއްޔާ އިން ބުނެފިއެވެ.
"ޤައުމުގެ ވައިގެ ދިފާއީ ނިޒާމުގެ ސަބަބުން، މި ހަމަލާތަކުން ލިބިފައިވަނީ މަދު ގެއްލުންތަކެއް، ގެއްލުން ލިބުނީ މަދު އަދަދެއްގެ ރާޑާ ސިސްޓަމްތަކަކަށް." އީރާނުގެ ސަރުކާރުގެ ޓީވީ މެދުވެރިކޮށް ގެނެސްދިން ބަޔާނެއްގައި ހަތިޔާރު އެޅި ބާރުތަކުގެ ޖެނެރަލް ސްޓާފް ބުނެފައިވެއެވެ.
ގިނަ އަދަދެއްގެ މިސައިލްތައް ހުއްޓުވުނު ކަމަށާއި، އަދި ދުޝްމަނުންގެ މަތިންދާބޯޓުތައް ޤައުމުގެ ވައިގެ ސަރަހައްދަށް ވަނުމަށް ހުރަސް އެޅުނު ކަމަށް ބަޔާނުގައި ބުނެފައިވެއެވެ.
އީރާނުން ބުނީ އިޒްރޭލުގެ މަތިންދާބޯޓުތަކަށް އުފުލުނީ ވަރަށް ލުއި ވޯ ހެޑް ތަކެއް ހަރުކޮށްފައިވާ މިސައިލްތަކެއް ކަމަށާއި، ދުރު ރާސްތާ މި މިސައިލުތަކުން ހަމަލާ ދިނީ އެމެރިކާގެ ކޮންޓްރޯލުގެ ދަށުގައިވާ އިރާގުގެ ވައިގެ ސަރަހައްދުގެ ތެރެއިން ކަމަށެވެ.
ޖެނެރަލް ސްޓާފް ގެ ބަޔާނުގައި އީރާނުން މި ހަމަލާގެ ބަދަލު ވަގުތުން ހިފާނެ ކަމުގެ އެއްވެސް އިންޒާރެއް ދީފައެއް ނުވެއެވެ.
"އެކަށީގެންވާ ވަގުތެއްގައި ހަމަލާ އަށް ރައްދު ދިނުމުގެ ޤާނޫނީ ޙައްޤު ދެމެހެއްޓުމާއެކު، އިރާނުން މިހާރު އިސްކަންދެނީ ޣައްޒާއާއި ލުބުނާނުގައި ހިނގަމުންދާ ހަނގުރާމަ ހުއްޓުމަކަށް ގެނެސް ދެމެހެއްޓެނިވި ސުލްހަ ޤާއިމުކުރުމަށް" ކަމަށް އީރާނުގެ ބަޔާނުގައި ވެއެވެ.
