އެޗްޑީސީގެ އެމްޑީ ކަމަށް އަލީ ޒުހައިރު އައްޔަންކޮށްފި
30 ޖުލައި 2025 | ބުދަ 13:31މައުރޫފް ޖަމީލް އިސްތިއުފާ ދެއްވާފައިވަނީ ޕީސީބީން އޭނާއަށް އެންގުމުން
އަލީ ޒުހައިރު
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު ކަމަށް ރޯޑު ޑިވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓަރު ކަމުގައި ހުންނެވި އަލީ ޒުހައިރު އައްޔަން ކޮށްފިއެވެ.
އެޗްޑީސީގެ އެމްޑީ ކަމަށް ޒުހައިރު އައްޔަން ކުރެއްވީ އެމަގާމުގައި ހުންނެވި މައުރޫފް ޖަމީލު އިސްތިއުފާ ދެއްވުމުންނެވެ.
މައުލޫމާތު ލިބިފައިވާ ގޮތުގައި، މައުރޫފް ރިޓަޔަރ ކުރެއްވުމުގެ ގޮތުން މަގާމުން އިސްތިއުފާ ދެއްވާނެކަމަށް ވިދާޅުވެފައި ވަނިކޮށް ކުއްލިގޮތަކަށް އިސްތިއުފާ މިދެއްވީ އިސްތިއުފާ ދެއްވަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އޭނާއަށް އެންގުމުންނެވެ.
ޒުހައިރު އަކީ ސިފައިންގޭގައި 30 އަހަރު ހިދުމަތް ކުރެއްވާފައިވާ އަދި ސިފައިންގެ ވެލްފެއަރ ކުންފުނި ސިވެކްގެ ޗެއަރމަންކަން ކުރެއްވި ބޭފުޅެކެވެ.
މައުރޫފް ޖަމީލް އެޗްޑީސީގެ ވެރިޔަކަށް އައްޔަން ކުރެއްވީ މިދިޔަ އަހަރުގެ ޑިސެމްބަރު 22 ގަ އެވެ. މައުރޫފް އަކީ ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި ކޮންސްޓްރަކްޝަން މިނިސްޓަރުކަން ކުރެއްވި, އަދި އެޗްޑީސީ ފުރަތަމަ އުފައްދައިގެން އިސްކޮށް އުޅުއްވި ބޭފުޅެކެވެ.
މައުރޫފާ އެޗްޑީސީ ހަވާލު ކުރީ މި ސަރުކާރުގައި ފުރަތަމަ އެ މަގާމަށް ވަޒީރެއްގެ ފެންވަރުގައި އައްޔަންކުރެއްވި އިބްރާހީމް ފަޒުލް ރަޝީދުގެ މައްޗަށް ކުރެވުނު ވަރަށް ސީރިއަސް ކޮރަޕްޝަންގެ ތުހުމަތުތަކެއްގެ މައްސަލަ ބަލަން ފެށުމުން ފަޒުލް އިސްތިއުފާ ދެއްވުމާ ގުޅިގެންނެވެ.
