އެމްޑީޕީ "ރަން ރީނދޫ" ހަރަކާތުގައި ހުރިހާ އުމުރުފުރައަކަށް ވެސް ބައިވެރި ވެވޭނެ
އެމްޑީޕީން ހުޅުމާލޭ ސެންޓްރަލް ޕާކުގައި ބާއްވާ ރަން ރީނދޫ އިވެންޓް އޮންނާނީ ހުކުރު ދުވަހު
އެމްޑީޕީން ބުދަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން
އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ 20 ވަނަ އަހަރީ ދުވަހުގެ މުނާސަބަތުގައި ބާއްވާ 'ރަން ރީނދޫ' ދުވުމުގައި ކުޑަކުދިންގެ އިތުރުން ހުރިހާ އުމުރުފުރައަކަށް ވެސް ބައިވެރިވެވޭނޭ ކަމަށް އެ ޕާޓީން ބުނެފި އެވެ.
ބުދަ ދުވަހު އެމްޑީޕީ އޮފީހުގައި ކުރިއަށް ގެންދިއަ ނޫސްވެރިންގެ ބައްދަލު ވުމުގައި މައްޗަންގޯޅި މެދު ދާއިރާ ރައީސް އަހުމަދު ޝަޒީން ވިދާޅުވީ އެމްޑީޕީން އަންނަ ހުކުރު ދުވަހު ބާއްވާ "ރަން ރީނދޫ" އިވެންޓް ބާއްވަނީ ހުޅުމާލޭގެ ސެންޓްރަލް ޕާކު ސަރަހައްދުގައި ކަމަށެވެ.
އަދި އެ ދުވަހުގެ އެ އިވެންޓު ބޭއްވުމަށް ވަމުންދާ ތައްޔާރީތައް މިހާރުވެސް ވަމުން އަންނަ ކަމަށާއި މި އިވެންޓް ފެށޭނީ ހުކުރު ދުވަހުގެ ހަވީރު 4:30 ގައި ކަމަށް ޝަޒީން ވިދާޅުވި އެވެ. އަދި އެދުވަހު އިވެންޓުގައި ބައިވެރިވާ ފަރާތްތަކަށް އެ ސަރަހައްދަށް ވަދެވޭނީ ސެންޓްރަލް ޕާކުގެ ހުޅަނގު ފަރާތުގައި ހުންނަ ގޭޓުން ކަމަށް ވެސް އޭނާ ވިދާޅުވި އެވެ.
ޝަޒީން ވިދާޅުވީ މި އިވެންޓުގައި ބައިވެރިވާ ފަރާތްތަކަށް މޭމަތީގައި ހަރާކަތުގެ ނަން ޖަހާފައިވާ ބިބްސް ދޫކުރަން ފަށާފައިވާ ކަމަށާއި އިވެންޓްގައި ބައިވެރިވާ ބޭފުޅުންނަށް އެމްޑީޕީ ހަރުގެއިން ނަން ނޯޓު ކުރުމަށް ފަހު މިހާރު ބިބްސް ދޫކުރަމުން ގެންދާ ކަމަށެވެ. އޭނާ ވިދާޅުވީ އިވެންޓް އޮންނަ ދުވަހު ސެންޓްރަލް ޕާކު ސަރަހައްދުން ވެސް ބިސްބް ދޫކުރަމަށް ހަމަޖެހިފައިވާ ކަމަށެވެ.
ޝަޒީން ވިދާޅުވީ މި ހަރަކާތަކީ އެއްވެސް ވަނައެއް ހޮވާ ހަރަކާތެއް ނޫން ކަމަށާއި އެކަހަލަ އެއްވެސް ކަމެއް މި ހަރަކާތުގައި ރޭވިފައި ނުވާ ކަމަށެވެ.
ޝަޒީން ވިދާޅުވީ މި ހަރަކާތަކީ ކުޑަކުދިން އަދި ހުރިހާ އުމުރެއްގެ މީހުންނަށްވެސް ބައިވެރިވެވޭނެ ގޮތަށް ކުރިއަށްގެންދާ ހަރަކާތެއް ކަމަށާއި މި އިވެންޓުގައި ކުޑަކުދިންނަށް ހާއްސަ ހަރަކާތްތަކެއް ވެސް އެރޭންޖް ކުރެވިފައިވާނެ ކަމަށެވެ. އެގޮތުން އެދު ވަހު ކުޑަކުދިންނަށް ހަދިޔާ ބެހުން އޮންނާނޭ ކަމަށް އޭނާ ވިދާޅުވި އެވެ.
ހަރަކާތުގައި ވަނަ ހޮވާ ކަންކަން ނުކުރާނެ. ނަމަވެސް ކުޑަކުދިންނަށް އިނާމު ބެހުމަށް ވަނީ އެރޭންޖް ކުރެވިފަ.މައްޗަންގޯޅި މެދު ދާއިރާ ރައީސް އަހުމަދު ޝަޒީން
ރަންރީނދޫ ދުވުން އެންމެ ފުރަތަމަ އެމްޑީޕީން ބާއްވަން އުޅުނީ ޖުލައި 18، ގައި ހުޅުމާލެ ސެންޓްރަލް ޕާކު ހިމެނޭ ސަރަހައްދުގަ އެވެ. ނަމަވެސް އެތަނުގައި ދުވުން ބާއްވަން އެޗްޑީސީން ހުއްދަ ނުދިނުމުން ފަހުން އެމްޑީޕީން ނިންމީ ޖުލައި 25، ގައި މާލޭގައި އެ ދުވުން ބާއްވާށެވެ. ނަމަވެސް އެދުވަހަށް ވެސް އެ ދުވުން ބާއްވަން ސަރުކާރުން ހުއްދަ ދީފައެއް ނުވެ އެވެ.
ނަމަވެސް ސަރުކާރުން ފަހުން ވަނީ އެމްޑީޕީގެ "ރަންރީނދޫ" ދުވުން ހުޅުމާލޭގައި ބޭއްވުމަށް ހުއްދަ ދީފައި އެވެ. ސަރުކާރުން ހުއްދަ ދިނުމާ ގުޅިގެން އެ ދުވުން އަންނަ މަހު އެއް ވަނަ ދުވަހު ބާއްވަން އެމްޑީޕީ ނިންމި އެވެ.
