ފުލުހުންގެ ނޫސްބަޔާން: އެސް.ސީ ފުލުހުންނަށް އެ މުއްދަތުގައި ބޮޑުކުރި މުސާރަ ދީފައިވާކަމަކަށް ބުނެ ނުދެވުނު
ފުލުހުންގެ އެސްސީ މުވައްޒަފުންނަށް މާރިޗު 2024 އިން ޑިސެމްބަރާ ހަމައަށް މުސާރައިގެ 85 އިންސައްތަ އަށްވާ ފައިސާ ލިބިފައެއް ނުވޭ
ދިވެހި ފުލުހުން
ފުލުހުންގެ ޚިދުމަތުގައި މަސައްކަތް ކުރާ ސްޕެޝަލް ކޮންސްޓެބުލަރީ ކޮންސްޓަބަލްސް އަށް އާންމު ފުލުހުންނަށް ދޭ މުސާރައިގެ 85 އިންސައްތަ އަށްވާ އަދަދު 2024 ވަނަ އަހަރުގެ މާރޗު މަހުން ފެށިގެން، އެ އެއަހަރުގެ ޑިސެމްބަރު މަހާ ހިސާބަށް އެ މުވައްޒަފުންނަށް ދީފައިވާ ކަމަކަށް ބުނެ ނުދެވުނެވެ.
29 ޖޫން ގައި "ބޮޑު ކުރި މުސާރަ ފުލުހުންނަށް ހަމަ އަށް ނުލިބޭ މައްސަލަ ފެންމަތިވެއްޖެ" މި ނަމުގައި ރާއްޖެ އެމްވީ އިން ޝާއިއު ކޮށްފައިވާ ޚަބަރާއި ގުޅިގެން ފުލުހުން ނެރުނު ނޫސް ބަޔާނުގައި އެ ޚަބަރު ދޮގުކޮށް ބުނީ، 2024 ވަނަ އަހަރުގެ އޭޕްރިލް މަހުން ފެށިގެން ސަރުކާރުން ކަނޑައެޅުއްވި ގޮތައް ބޮޑުކުރެވުނު މުސާރަ "ފުލުހުންނަށް" ދަނީ އެއްވެސް އުނިއިތުރެއްނެތި ދެމުން ކަމަށެވެ.
އެހެންނަމަވެސް ރާއްޖެ އެމްވީން ޝާއިއު ކުރި ޚަބަރުގައި ބުނެފައިވާނީ، "ފުލުހުންނަށް ދޭ މުސާރައިގެ 85 އިންސައްތަ ސްޕެޝަލް ކޮންސްޓެބުލަރީ (އެސް.ސީ)އަށް ދޭން ފަށާފައިވަނީ 2024 ވަނަ އަހަރުގެ ޑިސެމްބަރު މަހުން ފެށިގެން ކަމަށާއި ފުލުހުންގެ މުސާރަ މިދިޔަ އަހަރުގެ މާޗު މަހު ބޮޑު ކޮށްފައި ވާއިރު ސްޕެޝަލް ކޮންސްޓެބުލަރީ ފުލުހުންނަށް އެ މުއްދަތުން ފެށިގެން ޑިސެމްބަރު މަހާ ހަމައަށް އެ ފައިސާ ދީފައި ނުވާ ކަމަށެވެ.
ސްޕެޝަލް ކޮންސްޓެބުލަރީގެ ގަވައިދު ބުނާގޮތުން، "ސްޕެޝަލް ކޮންސްޓެބުލަރީގެ މުވައްޒަފުންގެ މުސާރައަކީ، އެ މުވައްޒަފަކު ހުރި ރޭންކާއި އެއްދަރަޖައިގެ ޕޮލިސް ރޭންކަށް ކަނޑައެޅިފައިވާ އަސާސި މުސާރައިގެ 85% (އައްޑިހަ ފަހެއް އިންސައްތަ) އަށްވާ އަދަދެވެ."
ފުލުހުންގެ މުސާރަ އަށް އައި ބަދަލާއެކު ސްޕެޝަލް ކޮންސްޓެބުލަރީ ކޮންސްޓަބަލްގެ މުސާރަ އަށް އިތުރު ވަނީ 3،689 ރ. (ތިންހާސް ހަސްތޭކަ އައްޑިހަ ނުވަ ރުފިޔާ) އެވެ. އަދި އެ 9 މަހުގެ މުސާރައަށް އެ އަދަދު އިތުރުވެފައި ނުވާތީ ކަންބޮޑުވުން ފާޅުކުރި ނަމަވެސް މިއަދާ ހަމައަށް ވެސް އެ މުއްދަތުގައި ލިބެން ޖެހޭ ފައިސާ ލިބިފައެއް ނުވެއެވެ. ސްޕެޝަލް ކޮންސްޓެބުލަރީ ކޮންސްޓަބަލްގައި ޚިދުމަތް ކުރާ ގާތްގަނޑަކަށް 177 މުވައްޒަފުންނަށް އެ މުވައްޒަފުންގެ މުސާރަ އަށް މީގެ ކުރިން ނުދީވާ 9 މަހަށްވާ ފައިސާގެ ގޮތުގައި ކޮންމެ މުވައްޒަފަކަށް ޖުމުލަ 33،201 ރ. ( ތިރީސް ތިންހާސް ދުއިސައްތަ އެއް ރުފިޔާ) ލިބެން ޖެހެއެވެ.
ފުލުހުން ނެރުނު ނޫސްބަޔާނާއި ގުޅިގެން "ހުރިހާ އެމްވީ" އިން ޝައިއުކުރި ޚަބަރުގައި ބުނިގޮތުގައި، އެ ނޫހަށް މައުލޫމާތު ދެމުން ފުލުހުންގެ ސީނިއަރ ބޭފުޅަކު ވިދާޅުވީ، ފުލުހުންގެ ޔުނީފޯމުގައި މަސައްކަތް ކުރާ އެސްސީ މުވައްޒަފުންނަށް ނިިމިދިއަ އަހަރުގެ މާރޗު މަހު ބޮޑުކުރި މުސާރައިން ދޭން ޖެހޭ އެއްވެސް ފައިސާއެއް ނުހުންނާނޭ ކަމަށް ބުނެ ފުލުހުންގެ އިދާރާއިން ނެރެފައިވާ ބަޔާނަކީ ދޮގު ބަޔާނެއް ކަމަށެވެ. އަދި އެ ނުވަ މަހުގެ ފައިސާ އަދިވެސް ނުލިބޭ ކަމަށް އޭނާ ވިދާޅުވި ކަމަށް އެ ނޫހުގައި ރިޕޯޓު ކޮށްފައިވެ އެވެ.
ރާއްޖެ އެމްވީ އަށް އެނގިފައިވާ ގޮތުގައި ސްޕެޝަލް ކޮންސްޓެބުލަރީ ކޮންސްޓަބަލްއަށް ދޭންޖެހޭ 85 އިންސައްތަ އަށްވާ ފައިސާ ނުދީ އެ ގަވައިދު އުވާލަން މިސަރުކާރުން ވަނީ މަޝްވަރާ ކޮށްފަ އެވެ. އެހެން ނަމަވެސް އަދި އެކަން ފާސްނުވާކަން ވަނީ އެނގިފަ އެވެ.
