ފިހާރަ ތަކުން ފިޔާ ހުސްވެ އާންމުންނަށް ދަތިވެއްޖެ

މާލޭ ބާޒާރުމަތީ ގިނަ ފިހާރަތަކުން ފިޔާ ހުސްވެއްޖެެވެ.

މާލޭގެ ފިހާރަތަކުން ފިޔާ ހުސްވެ، ގިނަ ބަޔަކަށް އެކަމުގެ ދަތިކަން މިވަގުތު ތަހައްމަލް ކުރަން ޖެހިފައިވާއިރު، ރާއްޖެ އެމްވީގެ ނޫސްވެރިންގެ ޓީމަކުން ވަނީ އަންގާރަ ދުވަހު، ބާޒާރުމަތީ ފިހާރަތަކަށް ޒިޔާރަތް ކޮށްފަ އެވެ.

އެގޮތުން ބާޒާރު މަތީގެ ވަރަށް ގިނަ ފިހާރަތަކަށް ވަދެ އެތަން ތަނުން ފިޔާ ލިބެން ހުރިތޯއާއި އަދި ފިޔާ ނުލިބި ދަތިވެގެން އުޅޭ ސަބަބު ވަނީ އޮޅުން ފިލުވާފަ އެވެ. ފިހާރަތަށް ބެލިބެލިމުގައި ދެ ފިހާރައަކުން ކިލޯއެއް ދެކިލޯއެއްގެ މިންވަރަށް ފިޔާ ލިބެން ހުއްޓެވެ. އެތަންތަނުން ވެސް ފިޔާ ވިއްކަނީ ކޮންމެ މީހަކަށް ވެސް ވަކި މިންވަރަކަށެވެ. އެތަންތަނުގައި ފިޔާ ކިލޯއެއްގެ އަގު އުޅެނީ 30 ރ އާއި 35 ރުފިޔާ އާ ދެމެދުގަ އެވެ.

ބާޒާރުމަތިން ފިޔާ ހުސްވެފައި ވާއިރު ގިނަ ވިޔަފާރިވެރިން ބުނީ ފިޔާ ހުރީ ލިބިފައި ކަމަށާއި ނަމަވެސް ވިއްސާރަވުމުގެ ސަބަބުން ފިޔާ އެތެރެ ނުކުރެވިގެން އުޅެނީ ކަމުގައެވެ. ނަމަވެސް މޫސުން ރަނގަޅު ނަމަ ބުދަ ދުވަހަށް ފިޔާ ލިބޭނޭ ކަމަށް ވިޔަފާރިވެރިން ބުންޏެވެ.

އަސްލު ފިޔާ ނެތް.. ދެން މިވަގުތު ފިޔާ ލިބިފަހުރި ނަމަވެސް މޫސުން ގޯސްވީމަ ފިޔާ އެތެރެ ނުކުރެވިގެން މި އުޅެނީ. މާދަން މޫސުން ރަނގަޅު ނަމަ ފިޔާ އެތެރެކުރެވޭނެ.

ފިހާރައެއްގެ މަސައްކަތް ކުރާ މީހެއް

ވިޔަފާރިވެރިން ބުނީ ބައެއް ސަޕްލަޔަރުން ގެނައި ފިޔާ މިވަގުތު މާލޭ ބަނދަރުގައި އޮތްނަމަވެސް، ނުނެރެވިގެން އުޅެނީ މޫސުން ތަން ނުދިނުމުގެ ސަބަބުންނެވެ.

ފިޔާ ހޯލްސޭލްކުރާ މުޑުވާލި ފިހާރައިން ބުނީ އެތަނުންވެސް ފިޔާ ހުސްވެފައިވާ ކަމަށާއި، ފިޔާ ލިބޭނީ މާދަމާ ކަމަށެވެ. މާލޭ ބާޒާރުން ފިޔާ ހުސްވިއިރު، ހުޅުމާލޭގެ ވެސް ބައެއް ފިހާރަތަކުން ފިޔާ ހުސްވެފައިހުރިކަން ފާހަގަކޮށްލެވެއެވެ.

މާލޭ ބާޒާރުމަތިން ފިޔާ ހުސްވެފައި ވާއިރު، މިހަފްތާ ފެށުނުއިރު ފިޔާ ކިލޯއެއްގެ އަގު ވަނީ 35 ރުފިޔާއަށް އަރައިގެން ގޮސްފައެވެ. މީގެ ކުރިން ފިޔާ ކިލޯއެއްގެ އަގު އުޅުނީ އެންމެ 9 ރުފިޔާއަށެވެ.

ބާޒާރުގެ ތަކެތީގެ އަގު އަތްނުފޯރާފަށަށް ބޮޑުވެގެން ގޮސްފައި ވާއިރު، މިއަދު ބާޒާރުން އާފަލެއްގެ އަގުވެސް އުޅެނީ 10 ރުފިޔާ އަށެވެ.