ސްރީ ލަންކާގެ ރައީސް ޑިސެނަޔަކަ ރާއްޖެ ވަޑައިގެންފި
މިއީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ލަންކާގެ ރައީސްކަމާ ހަވާލުވެ ވަޑައިގެންނެވި ފަހުން، ޑިސަނަޔަކަ ރާއްޖެ އަށް ކުރައްވާ ފުރަތަމަ ދަތުރުފުޅު
ސްރީ ލަންކާގެ ރައީސް ޑިސަނަޔަކަ އަދި ރައީސް ޑޮކްޓަރު މުޙައްމަދު މުޢިއްޒު
ސްރީ ލަންކާގެ ރައީސް އަނޫރާ ކުމާރާ ޑިސެނަޔަކަ ރާއްޖެ ވަޑައިގެންފި އެވެ.
ހޯމަ ދުވަހު ޑިސަނަޔަކަ ރާއްޖެ ވަޑައިގެންފައި ވަނީ، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ދައުވަތަކަށެވެ. ޑިސަނަޔަކަ ރާއްޖެ ވަޑައިގެންނެވީ ދެ ދުވަހުގެ ދަތުރުފުޅެއްގަ އެވެ.
ވެލާނާ އިންޓަނޭޝަނަލް އެއާޕޯޓުން ޑިސަނަޔަކަށް މަރުޙަބާ ވިދާޅުވީ ރައީސް މުޢިއްޒު އެވެ. އޭގެ އިތުރުގެ ދައުލަތުގެ ވަޒީރުންނާއި، ބައެއް އިސްވެރިން ވެސް ވަނީ ޑިސަނަޔަކަށް މަރުޙަބާ ދެންނެވުމަށް ވަޑައިގެންފަ އެވެ.
ސްރީ ލަންކާގެ ރައީސް ޑިސަނަޔަކަގެ މި ދަތުރުފުޅުގައި ރައީސް މުޢިއްޒުއާ ބައްދަލު ކުރައްވާނެ އެވެ. އަދި ރާއްޖެ އާއި ލަންކާއާ ދެމެދު ރަސްމީކޮށް މަޝްވަރާތައް ކުރިއަށް ގެންދަވައި، ދެ ޤައުމުގެ ދެ މެދުގައި އެއްބާރުލުން ދިނުމާ ގުޅޭ ގޮރުން ވެސް މަޝްވަރާ ކުރުން ކުރިއަށް ގެންދާނެ އެވެ.
ޑިސަނަޔަކަ ރާއްޖެ ވަޑައިގެންފައި ވަނީ، ދިވެހި ރާއްޖެ އާއި ސްރީ ލަންކާއާ ދެމެދު ސިޔާސީ ގުޅުން ޤާއިމު ކުރިތާ 60 އަހަރު ފުރުން ފާހަގަ ކުރުމުގެ މުނާސަބަތާ ދިމާކޮށެވެ. ރާއްޖެ އާއި ލަންކާއާ ދެމެދު ސިޔާސީ ގުޅުން ޤާއިމު ކޮށްފައި ވަނީ 1965 ވަނަ އަހަރުގެ ޖުލައި މަހުގެ 26 ވަނަ ދުވަހު އެވެ.
މިއީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ލަންކާގެ ރައީސްކަމާ ހަވާލުވެ ވަޑައިގެންނެވި ފަހުން، ޑިސަނަޔަކަ ރާއްޖެ އަށް ކުރައްވާ ފުރަތަމަ ދަތުރުފުޅެވެ.
