ތައައްސުބުން އެއްކިބާވެ އިންސާފު ގާއިމްކުރުމަށް ސުޕްރީމް ކޯޓު ކުރިމަތީ ބެނާއެއް ދަމައި ވަކީލުން "ދުސްތޫރީ ފަސާނާ" އަށް!
ދުސްތޫރީ ފަސާނާއަކީ އާންމުން ހޭލުންތެރިކުރުވުމުގެ ޕްރޮގްރާމްތަކެއް
ސުޕްރީމް ކޯޓު ބޭރުގައި ވަކީލުންތައް ބެނާ ހިފައިގެން
"ތައައްސުބުން އެއްކިބާވެ އިންސާފު ގާއިމްކުރުމަށް" ގޮވާލައި ސުޕްރީމް ކޯޓު ކުރިމަތީ ބެނާއެއް ދަމައި، ރާއްޖޭގެ ގިނަ އަދަދެއްގެ ގާނޫނީ ވަކީލުން 'ދުސްތޫރީ ފަސާނާ" އަށް ތައްޔާރު ވެއްޖެ އެވެ.
ރާއްޖޭގެ އަދުލު އިންސާފުގެ ހާލަތާމެދު ކަންބޮޑުވުން ފާޅުކޮށް، ކޯޓުތަކުގައި ވަކާލާތު ކުރައްވާ 56 ވަކީލެއް ސޮއިކޮށް ބުދަ ދުވަހު ވަނީ ސުޕްރީމް ކޯޓަށް ޕެޓިޝަނެއް ހުށަހެޅުމަށް މަސައްކަތް ކޮށްފަ އެވެ. ނަމަވެސް، ސުޕްރީމް ކޯޓުން ވަނީ އެ ޕެޓިޝަން ބަލައިގަންނަން ދެކޮޅު ހަދާފަ އެވެ.
އެ ޕެޓިޝަން ސުޕްރީމް ކޯޓާ ހިއްސާ ކުރުމަށް ގިނަ އަދަދެއްގެ ވަކީލުން އެ ކޯޓަށް ވަޑައިގެންނެވި އެވެ. ޕެޓިޝަން ބަލައިނުގަތުމުން ކޯޓުން ނިކުމެވަޑައިގެން ވަކީލުންތައް ވަނީ "ތަައައްސުބުން އެއްކިބާވެ އިންސާފު ގާއިމް ކުރުމަށް" ގޮވާލައި، ސުޕްރީމް ކޯޓުގެ ބޭރުގައި ބެނާއެއް ދަމާފަ އެވެ.
ޕެޓިޝަން ހުށަހެޅުއްވުމުގައި އިސްކޮށް ހަރަކާތްތެރިވެވަޑައިގެންނެވި ގާނޫނީ ވަކީލު މަހުފޫޒް ސައީދު ވިދާޅުވީ އެ ޕެޓިޝަނުގައި ވަކީލުންތައް ކަންބޮޑުވުން ފާޅުކޮށްފައި ވާނީ ޝަރީއަތް ކުރެވެމުންދާ ގޮތާއި، ޓެރަރިޒަމުގެ ހަގީގީ މާނަ އޮޅުވާލައިގެން ދައުވާ ކުރުމާއި، މުއްދަތު ޖެހުމުގައި ހަމައެއް ލަމައެއް ނެތުމާއި، ކުރެވެމުންދާ ހުކުމްތަކާއި، ފަނޑިޔާރުންނަށް ނުހައްގުން އަދަބު ދިނުން ފަދަ ކަންތައްތަކަށް ކަމަށެވެ.
މީގެ އިތުރުން ވަކީލުންގެ ކަންކަމާ ސުޕްރީމް ކޯޓުން އަމިއްލައަށް ހަވާލުވުމާއި، އެއްވެސް ސަބަބެއް ނެތި ވަކީލުންނާ މެދު ފިޔަވަޅު އެޅުމާއި، ޖުޑިޝަލް ސަރވިސް ކޮމިޝަން(ޖޭއެސްސީ) ހިންގަމުންދާ ގޮތާއި، އަދި ޕްރޮސެކިއުޓަރ ޖެނެރަލްއާއި ބަންޑާރަ ނައިބުގެ މަސްއޫލިއްޔަތު އަދާނުކުރުން ފަދަ ކަންކަމާ މެދު ވަކީލުން ކަންބޮޑުވުން ފާޅުކޮށްފައިވާނެ ކަމަށް މަހުފޫޒް ވިދާޅުވި އެވެ.
މަހުފޫޒް ވިދާޅުވީ ވަކީލުން މި ފެށި މަސައްކަތަކީ އެއްވެސް ބަޔަކަށް އެއްވެސް ކަމެއް ސާބިތު ކޮށްދޭން ފެށި މަސައްކަތެއް ނޫން ކަމަށާއި ކަންބޮޑުވުންތައް ހިއްސާކުރުމުގެ މަސައްކަތް ފެށީ އަދުލުއިންސާފުގެ ނިޒާމު ރަނގަޅުވާ ތަން ފެނުމަށް ވަކީލުން ބޭނުންވާތީ ކަމަށެވެ. އޭނާ ވިދާޅުވީ ޕެޓިޝަނުގައި 56 ވަކީލުން ސޮއިކޮށްފައިވީ ނަމަވެސް، މިކަމަށް ގިނަ އަދަދެއްގެ ވަކީލުން ތާއީދުކުރައްވާ ކަމަށާއި، އެ ވަކީލުންތައް ސޮއިކޮށްފައި ނުވަނީ ލައިސެންސް ސަސްޕެންޑް ކޮށްފާނެ ކަމުގެ ބިރު އޮތުމުން ކަމަށެވެ.
"އަޅުގަނޑުމެންގެ ފަހަތުގައި ތިބި ވަކީލުންގެ އަދަދު ވަރަށް ގިނަ، އަޅުގަނޑުމެން އިރާދަކުރެއްވިއްޔާ މި ޕެޓިޝަން ދިވެހިރާއްޖޭގެ ސުޕްރީމް ކޯޓަށް ހުށަހެޅުމުގެ މަސައްކަތް އަދިވެސް ކުރާނަން، މި ފެށުނު މޫވްމެންޓް ހުއްޓުމެއް ނެތި ކުރިއަށް ގެންދާނަން، ދިވެހިރާއްޖޭގެ ޖުޑިަޝަރީގައި މިހާރު މިހިނގާ ކަންކަން ޖެހޭނީ އިސްލާހުވާން،"
މަހުފޫޒް ވިދާޅުވީ ކަންކަން އިސްލާހު ކުރުމަށް ޝަރުއީ ދާއިރާއިން އެހީތެރިކަން ބޭނުންވާނަމަ ވަކީލުންގެ ފަރާތުން އެހީތެރިކަން ލިބިގެންދާނެ ކަމަށެވެ. "ހަގީގަތުގައި ވެސް އަޅުގަނޑުމެން އެންމެންނަށް އެބަފެނޭ ކަންކަން ރަނގަޅަށް ނޫންކަން މިދަނީ، ކަންކަން ރަނގަޅަށް ނުދަނީ އޭގެ ސަބަބުތަކެއް ހުރީމަ، އެ ސަބަބުތައް ހާމަވެ، އެ ސަބަބުތަކަށް ހައްލެއް ލިބިގެންދާން އެބަޖެހޭ، އެކަމުގައި ދިވެހިރާއްޖޭގެ ސުޕްރީމް ކޯޓަށް އެހީތެރިވެދޭން އަޅުގަނޑުމެން މިތިބީ،" މަހުފޫޒް ވިދާޅުވި އެވެ.
މަހުފޫޒް ވިދާޅުވީ ކެރިގެން ކަންތައްތަކާ ކުރިމަތިލާން ވަކީލުން ނިކުތުމަށް ކުރަންޖެހޭ ކަންތައްތަކެއް އެބަހުރި ކަމަށާއި އެކަންތައްތައް ވެސް ކުރަމުންދާނެ ކަމަށެވެ.
ޕެޓިޝަނުގައި ސޮއިކުރި 55 ވަކީލުން އިސްނަންގަވައިގެން "ދުސްތޫރީ ފަސާނާގެ" ނަމުގައި ރައްޔިތުން ހޭލުންތެރިކުރުވުމުގެ ޕްރޮގްރާމް ތަކެއް ފެށުމަށް ވަނީ ނިންމާފަ އެވެ. ގާނޫނީ ވަކީލު ހުސްނުއް ސުއޫދު ވިދާޅުވީ ދުސްތޫރީ ފަސާނާގެ ފުރަތަމަ ހަރަކާތް ވަރަށް އަވަހަށް ބާއްވާނެ ކަމަށެވެ. ސުއޫދު ވިދާޅުވީ ކަންކަން އިސްލާހު ވަންދެން ދުސްތޫރީ ފަސާނާގެ ހަރަކާތްތައް ކުރިއަށް ގެންދާނެ ކަމަށެވެ.
