ރައީސް ގޮވާލެއްވީ ފަރުދީ ޒިންމާ އަދާ ކުރެއްވުމަށް
ޤައުމީ ލޯބި އިސް ކުރެވޭނީ ވެސް، ފަރުދީ ގޮތުން އެމީހަކު މަސައްކަތް ކޮށްގެންކަން ޤަބޫލު ކުރަން ޖެހޭ ކަމަށް ރައީސް ވިދާޅުވި
މިނިވަން ދުވަހުގެ ރަސްމީ ޖަލްސާގައި ރައީސް މުޢިއްޒު އާއި އެމަނިކުފާނުގެ އަނބިކަނބަލުން ސާޖިދާގެ އިތުރުން، ނައިބު ރައީސް ޙުސެއިން މުޙައްމަދު ލަޠީފް އަދި ކުރީގެ ރައީސް ވަޙީދު
ދިވެހި ރާއްޖޭގެ މިނިވަންކަން ރައްކާތެރި ކުރުމާއި، އަންނަ އޮތް ޖީލަށް އެ މިނިވަންކަން ރައްކާތެރިކަމާ އެކު ފޯރުކޮށްދިނުމަށް ކޮންމެ މީހަކު ވެސް ފަރުދީ ގޮތުން މަސައްކަތް ކުރުމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ގޮވާލައްވައިފި އެވެ.
ރައީސް މުޢިއްޒު މިފަދައިން ގޮވާލެއްވީ ރާއްޖޭގެ 60 ވަނަ މިނިވަން ދުވަަސް ފާހަގަ ކުރުމަށް، ޒުވާނުންގެ މަރުކަޒުގައި ހޮނިހިރު ދުވަހުގެ ހެނދުނު އޮތް ޖަލްސާގައި ވާހަކަ ދައްކަވަމުންނެވެ.
އެގޮތުން ރައީސް މުޢިއްޒު ވިދާޅުވީ މިނިވަން ކަމަކީ ވަރަށް ގިނަ ބައެއްގެ މިންނެތް، އިޚުލާސްތެރި އަދި ބުރަ މަސައްކަތުން ހިމާޔަތް ކުރެވިގެން މިއަދާ ހަމަ އަށް ދިވެހި ރައްޔިތުންނަށް ލިބިފައިވާ އެއްޗެއް ކަމަށެވެ. ރައީސް ވިދާޅުވީ އެ ބޭބޭފުޅުން ކުރެއްވި ޤައުމީ މަސައްކަތް އަމާނާތްތެރިކަމާ އެކީ އަންނަ އޮތް ޖީލުތައް ފޯރުކޮށްދިނުމަކީ ފަރުދީ ޒިންމާއެއް ކަމަށެވެ.
ރައީސް ވިދާޅުވީ އެކަން ކުރާނީ ވަކި އެވެނި މީހެކޭ، ނުވަތަ މިވެނި މީހެކޭ އެއްވެސް މީހަކަށް ނުބުނެވޭނެ ކަމަށެވެ. އެގޮތުން ކޮންމެ މީހަކު ވެސް އެމީހަކު އަމިއްލަ އަށް ކުރަން ޖެހޭ ކަމެއް އޮތް ކަމަށް ދެކިގެން، އަދި އެމީހެއްގެ ޒިންމާ ފުރިހަމަ އަށް އޮތް ކަމަށް ދެކިގެން އެ މަސައްކަތް ކުރަން ޖެހޭ ކަމަށް ރައީސް ވިދާޅުވި އެވެ.
މީގެ އިތުރުން ރައީސް ވިދާޅުވީ ޤައުމީ ލޯބި އިސް ކުރަން ޖެހޭ ކަމަށެވެ. އެގޮތުން ޤައުމީ ލޯބި އިސް ކުރެވޭނީ ވެސް، ފަރުދީ ގޮތުން އެމީހަކު މަސައްކަތް ކޮށްގެންކަން ޤަބޫލު ކުރަން ޖެހޭ ކަމަށް ރައީސް ވިދާޅުވި އެވެ. އެހެންކަމުން މިނިވަން ދުވަހު މައިގަނޑު ގޮތެއްގައި ކުރަން ބޭނުންވާ އިލްތިމާސް އަކީ އެއީ ކަމަށް ރައީސް ވިދާޅުވި އެވެ.
އަޅުގަނޑު ދަންނަވަން ބޭނުންވާ ވާހަކަ އަކީ އަޅުގަނޑުމެން އެންމެންގެ ވެސް ފަރުދީ ޒިންމާއެކޭ މި ދެންނެވި ހުރިހާ ބޭފުޅުން ކުރެއްވި ޤައުމީ ބުރަ މަސައްކަތް، އަމާނާތްތެރިކަމާ އެކީގައި އަންނަ އޮތް ޖީލުތަކަށް ފޯރުކޮށްދިނުމަކީ. އެކަން ކުރާނީ ވަކި އެވެނި މީހެކޭ، މިވެނި މީހެކޭ އަޅުގަނޑުމެން އެކަކަށް ވެސް ނުދެންނެވޭނެ. ތިމަންނަ ކުރަން ޖެހޭ ކަމެއް މީގައި އެބަ އޮތޭ. ތިމަންނަގެ ޒިންމާ ފުރިހަމަ އަށް އެބަ އޮތޭ. މި ޤައުމުގެ މިނިވަންކަން ރައްކާތެރި ކުރުމުގަޔާއި، އަންނަ އޮތް ޖީލުތަކަށް ފޯރުކޮށްދިނުމުގައި ތިމަންނަ މަސައްކަތް ކޮށްފިއްޔާ އެކަންޏޭ އެކަން ވާނީ. މިއީ އަޅުގަނޑުމެން ކޮންމެ މީހަކު ވެސް އެއްވެސް ޝައްކެއް ނެތި މިއަދު ޔަގީންކަމާ އެކު ޤަބޫލު ކުރަން ޖެހޭ ހަގީގަތަކީ. އެ ނޫން އެއްވެސް ގޮތަކަށް އަޅުގަނޑުމެން ޤައުމުގެ މިނިވަންކަން ހިމާޔާތްކޮށް، ރައްކާތެރިކޮށް އަންނަން އޮތް ޖީލުތަކަށް ފޯރުނުކޮށްދެވޭނެ.ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު
މީގެ އިތުރުން ރައީސް މުޢިއްޒު ވިދާޅުވެފައި ވަނީ ރައްޔިތުން ސަރުކާރުތައް އިންތިޚާބު ކުރާ ކަމަށާއި، އެކި ދުވަސްވަރި އެކި ސަރުކާރުތަކުން އަދި އެކި ވެރިން މަސައްކަތް ކުރައްވާނެ ކަމަށެވެ. އެހެން ނަމަވެސް، ފަރުދީ ޒިންމާ އަދާ ކުރަން ޖެހޭ ކަމަށް ރައީސް ވިދާޅުވި އެވެ.
ރައީސް ވިދާޅުވީ އެމަނިކުފާނުގެ މައިގަނޑު ސިޔާސަތަކީ ދިވެހިން އިސް ކުރުން ކަމަށެވެ. ދިވެހިންގެ ކަންކަމުގައި އެހެން މީހުންގެ އެހީތެރިކަން ހޯދި ނަމަވެސް، މައިގަނޑު މަސައްކަތް ކުރާނީ ދިވެހިން ކަމަށް ރައީސް ވިދާޅުވި އެވެ. އަދި ދިވެހި ރާއްޖޭގެ އިމުގެ ތެރޭގައި ކުރަން ޖެހޭ ކަންކަން ދިވެހިންގެ އަތުން ކުރުން ކަމަށް ވެސް ރައީސް ވިދާޅުވި އެވެ.
އިތުރަށް ރައީސް ވިދާޅުވީ ދިވެހިންނަށް ފައިދާވާ ކަންކަމުގައި އެހެން ހުރިހާ ޤައުމުތަކާ އެކު ވެސް ރަޙުމަތްތެރި ގާތް ގުޅުން ބާއްވާނެ ކަމަށް ރައީސް ވިދާޅުވި އެވެ. އެހެންކަމުން، އެކަން ވެސް ކުރިއަށް ގެންދެވޭނީ ކޮންމެ މީހަކު ވެސް އެމީހެއްގެ ޒިންމާ އަދާކޮށްގެން ކަމަށް ރައީސް މުޢިއްޒު ވަނީ ވިދާޅުވެފަ އެވެ.
