އިންޑިއާއިން ރާއްޖެއަށް ޓްރެކްޓަރުތަކެއް ހަދިޔާކޮށްފި
އިންޑިއާ-މޯލްޑިވްސް ޑިފެންސް ޕާޓްނާޝިޕްގެ ދަށުން ލިބުނު މި އުޅަނދުތައް ބޭނުންކުރާނީ ދިވެހިރާއްޖޭގެ ގައުމީ ދިފާއީ ބާރުގެ ބޭނުންތަކަށް
އިންޑީއާއިން ރާއްޖެއަށް ޓްރެކްޓަރުތަކެއް ހަދިޔާކުރުން
އިންޑިއާ ސަރުކާރުން ދިވެހިރާއްޖެއަށް ޓްރެކްޓަރުތަކެއް ހަދިޔާކޮށްފިއެވެ.
މަސީ ފާގަސަން (އެޗްޕީ 35) މޮޑެލްގެ 8 ޓްރެކްޓަރު ހަދިޔާކޮށްފައިވަނި، އިންޑިއާގެ ބޮޑުވަޒީރު ނަރެންދުރަ މޯދީ މިހާރު ދިވެހިރާއްޖެއަށް ކުރައްވަމުން ގެންދަވާ ދަތުރުފުޅުގައި، މިއަދު ރައީސް އޮފީހުގައި ބޭއްވި ރަސްމިއްޔާތުގަ އެވެ. މި ޓްރެކްޓަރާއެކު އެހެނިހެން 64 ވެހިކަލްވެސް ވަނީ ހަދިޔާކޮށްފައިވެއެވެ.
މި ރަސްމިއްޔާތުގައި ފާހަގަކުރި ގޮތުގައި، މިއީ އިންޑިއާ-މޯލްޑިވްސް ޑިފެންސް ޕާޓްނާޝިޕްގެ ދަށުން އިންޑިއާ ސަރުކާރުން ދީފައިވާ ހިލޭ އެހީއެކެވެ. އެހެންކަމުން މި ވެހިކަލްތައް ބޭނުންކުރާނީ ދިވެހިރާއްޖޭގެ ގައުމީ ދިފާއީ ބާރުގެ ބޭނުންތަކަށެވެ. އަދި މި ވެހިކަލްތަކުގެ ސަބަބުން ގައުމީ ދިފާއީ ބާރުގެ ގާބިލުކަން އިތުރުވެގެންދާނެއެވެ.
އިންޑިއާއަކީ އަބަދުވެސް އެކިގޮތްގޮތުން ރާއްޖެއަށް އެހީތެރިކަން ފޯރުކޮށްދެމުން އަންނަ ގައުމެކެވެ. އަދި ހާއްސަކޮށް އަސްކަރީ ދާއިރާއިން މީގެ ކުރިން ވެސް ވަނީ ބޮޑެތި އެހީތައް ފޯރުކޮށްދީފައެވެ.
އެހެންނަމަވެސް، ކުރީ ސަރުކާރުގެ ދުވަސްވަރު، މިހާރުގެ ރައީސް ހިމެނޭހެން، އޭރުގެ އިދިކޮޅޮ ފަރާތްތަކުން ދެގައުމުގެ ދެމެދުގައި އޮންނަ ރަހްމަތްތެރި ގުޅުމާ ބެހޭގޮތުން ދޮގު ވާހަކަތައް ފަތުރައި، ޒާތީގޮތުން އިންޑިއާގެ ވެރިންނާ ދިމާކޮށް، ފުރައްސާރަ ކޮށްފައިވެއެވެ.
މި ރަސްމިއްޔާތުގައި، ކުރީގެ ރައީސް އިބްރާހިމް މުހައްމަދު ސޯލިހުގެ ގެދޮރުވެރިޔާ މަޝްރޫއުގެ ދަށުން އިމާރާތް ކުރި 4000 ޔުނިޓު ދިވެހި ސަރުކާރާ ހަވާލުކުރުމުގެ އިތުރުން، އައްޑޫ މަގުހެދުމުގެ މަޝްރޫއު އާއި ބައެއް ރަށްރަށުގައި ހިންގި އުމްރާނީ ތަރައްގީގެ ގިނަ މަޝްރޫއުތަކެއް ބޮޑުވަޒީރު މޯދީ މިއަދު އިފުތިތާހުކޮށް ދެއްވި އެވެ.
