މި ސަރުކާރަށް ބިންގާ އެޅުން ފިޔަވައި އެއްވެސް ކަމެއް ނުކުރެވޭ: މެންބަރު އައްބާސް
ކުރީ ސަރުކާރުގައި ފަށާފައިވާ މަޝްރޫއުތައް ވެސް ކުރިއަށް ނުގެންދެވޭ
ފަލަސުރުހީ ޕްރޮގްރާމްގައި ވެލިދޫ ދާއިރާގެ މެންބަރު މުހައްމަދު އައްބާސް ވާހަކަދައްކަވަނީ
ރައީސް ޑރ.މުހައްމަދު މުއިއްޒުގެ ސަރުކާރަށް ބިންގާ އެޅުން ފިޔަވައި އެއްވެސް ކަމެއް ނުކުރެވޭ ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު އައްބާސް ވިދާޅުވީ ރައީސް މުއިއްޒުގެ ރިޔާސީ އިންތިޚާބުގެ ވައުދުތަކުގެ ތެރޭގައި ނ.އަތޮޅުގެ ތަރައްގީއަށް ވަރަށް ގިނަ ވައުދުތައް ވެވަޑައިގެންނެވި ކަމަށެވެ. މެނިފެސްޓޯ އެކުލަވާލައި، ވެލިދޫ، ޅޮހި އަދި ފޮއްދޫއަށް ކޮށްދެއްވާނެ ކަންކަން ހިމެނުއްވި ކަމަށް މެންބަރު އައްބާސް ވިދާޅުވިއެވެ.
ނަމަވެސް މިސަރުކާރަށް ދެ އަހަރުވާން ކައިރިވަމުންދާއިރު، އެއްވެސް ކަމެއް ކުރެވިފައިނުވާ ކަމަށާއި، ކުރީ ސަރުކާރުގައި ފަށާފައިވާ މަޝްރޫއުތައް ވެސް ކުރިއަށް ނުގެންދެވޭ ކަމަށް މެންބަރު އައްބާސް ވިދާޅުވިއެވެ. އަދި ވިދާޅުވީ މުޅި އަތޮޅަށް ބަލާއިރު ވެސް ތަރައްގީގެ އެއްވެސް ކަމެއް ނުހިނގާ ކަމަށެވެ.
ވެލިދޫ، ޅޮހި އަދި ފޮއްދޫގެ ތަރައްގީގެ މަޝްރޫއުތަކާ ގުޅިގެން ރައީސް މުއިއްޒަށް ވަކިވަކިން މެސެޖް ކުރެއްވިކަން ފާހަގަކުރައްވައި މެންބަރު އައްބާސް ވިދާޅުވީ އެއްވެސް ކަމަކަށް އެމަނިކުފާނު އިޖާބަ ދެއްވާފައިނުވާ ކަމަށެވެ. ރައްޔިތުންނަށް ހެޔޮ އެދިގެން ރައްޔިތުންގެ ލާބަޔާ މަންފާއަށް އެއްވެސް ކަމެއް މިސަރުކާރުން ނުކުރާ ކަމަށް މެންބަރު އައްބާސް ވިދާޅުވިއެވެ. އަދި ވިދާޅުވީ މިސަރުކާރަށް ކުރެވޭހާ ވެސް ކަމަކީ ބިންގާ އެޅުން ކަމަށެވެ.
މިހާރު ތެދުތެދަށް ދަންނަވާ ކަމަށްވަންޏާ ރައީސުލްޖުމްހޫރިއްޔާގެ ރިޔާސީ ވައުދެއް އަދި އޭގެ އިތުރުން މެނިފެސްޓޯގައި އިތުރަށް ލިޔެފައި އެބަހުރި ވެލިދޫއަށް ކޮށްދޭނެ ކަންތައްތައް. ޅޮސްއަށް ކޮށްދޭނެ ކަންތައްތައް. ފޮއްދޫއަށް ކޮށްދެއްވާނެ ކަންކަން. އެއިން އެއްވެސް ކަމެއްގައި ރައީސުލްޖުމްހޫރިއްޔާގެ ރިޔާސީ ދައުރަށް ދެއަހަރު ވަމުންދާއިރު އަދި ކޮށްދެއްވާފައި ނެތް އެއްކަމެއް ވެސް. އަދި މުޅި އަތޮޅަށް ބަލާލާއިރު ވެސް އަތޮޅުގައި ނެތް އެއްވެސް ކަމެއް ކޮށްދެއްވާފައި. އެންމެ ކުޑަ މިނުން ނިމިދިޔަ ސަރުކާރުން ހިންގާފައި ހުރި ތަރައްގީގެ މަޝްރޫއުތަކުގެ ނުނިމިހުރި 5 ޕަސެންޓް ނޫނީ 15 ޕަސެންޓުގެ މަސައްކަތުގެ ތެރެއިން އެއްވެސް މިންވަރެއް މިއަދާ ހިސާބަށް ހާސިލް ކުރެވިފައިނުވޭ. ދެން ވިދާޅުވަނީ މިއީ ރައީސުލްޖުމްހޫރިއްޔާގެ ރިޔާސީ ވައުދުތަކުގެ ތެރޭގައި ހިމެނޭ މިސާލަކަށް ވެލިދޫ ހޮސްޕިޓަލް. އެއީ ވެލިދޫ ރައްޔިތުންނަށް އެންމެ މުހިންމު ކަންތައް. ދެން ޅޮހީގެ ރައްޔިތުންނަށް އެންމެ މުހިންމު ކަމަކީ ޅޮހީގައި 15 ޕަސެންޓް މަސައްކަތް ނިމިފައި އޮތް ނަރުދަމާ. ފޮއްދޫ ރައްޔިތުންނަށް އެންމެ މުހިންމީ ފޮއްދޫގައި ރައްޔިތުންނަށް ދުވަހަކު ވެސް ލަފާފުރާނެ ބަނދަރެއް ނެތް މައްސަލަ.ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުހައްމަދު އައްބާސް
ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް، ބައެއް މަޝްރޫއުތައް ފައްޓަވައިދެއްވުމަށް ރައީސް މުއިއްޒު ހަތަރު ދުވަހުގެ ދަތުރުފުޅެއްގައި މިމަހުގެ 21 ވަނަ ދުވަހު ނ.އަތޮޅަށް ވަޑައިގެންނެވިއެވެ. އަދި އެ އަތޮޅު ފޮއްދުއަށް ވަޑައިގެން ރައީސް މުއިއްޒު ވިދާޅުވީ އެ ދާއިރާގެ މެންބަރު އައްބާސްގެ އެއްބާރުލުމެއް ނުލިބޭ ތަނުގައި، ކަންކަން ކުރުމަށް ހުރަސް އަޅަމުންދާ ކަމަށެވެ.
މިކަމަށް ރައްދުދެއްވައި މެންބަރު އައްބާސް ވިދާޅުވީ ސިޔާސީ މައިދާނުގައި މިހާތަނަށް ހޭދަކުރި 18 އަހަރު އޭނާގެ ހަށިގަނޑުގައި ނާޅާ ވޭން މިއަދު އަޅަމުން ދާ ކަމަށެވެ. އަދި މިހާތަނަށް ބުނި ކޮންމެ ބަހެއް އަދި ކުރި ކޮންމެ ކަމެއް ކުރީ ދާއިރާގެ ރައްޔިތުންގެ ހައްގުގައި ކަމަށެވެ.
