ކުނަހަންދޫ މުދާ އުފުލާ ދޯންޏެއްގައި ރޯވެ ދޯނީ ގެގަނޑުތެރޭގައި ހުރި އެއްވެސް އެއްޗެއް ސަލާމަތް ނުކުރެވުނު

ލ. ކުނަހަންދޫ ބަނދަރުގައި އޮތް މުދާ އުފުލާ ދޯންޏެއްގައި އަލިފާނުގެ ހާދިސާއެއް ހިނގައިފިއެވެ.

ބުދަ ދުވަހުގެ ހެނދުނު 11 ޖަހާކަންހާއިރުގައި ހިނގި މިހާދިސާގައި އަލިފާން ރޯވެފައިވަނީ 115 ފޫޓުގެ ދިގުމިނުގެ މުދާ އުފުލާ ދޯންޏެއްގައި އެވެ. އަލީފާން ރޯވީ އެ ދޯނީގައި ހިޔާކޮށްފައި ހުރި ގެގަނޑުގައެވެ.

Advertisement

އެ ދޯނީގައި ރޯވި މި އަލިފާން ގަނޑު ސިފައިންނާއި ފުލުހުންގެ އެހީތެރިކަމާއި އެކު ވަނީ ނިއްވާލާފައެވެ. އެހެން ނަމަވެސް އަލިފާން ރޯވި އެ ދޯނީގެ ގެނގަނޑު ވަނީ އެއްކޮށް އަނދާފައެވެ.

ކުނަހަންދޫ ކައުންސިލްގެ ރައީސް އިބްރާހީމް ޝަކީބު "ރާއްޖެ އެމްވީ"އަށް ވިދާޅުވީ އަލިފާން ރޯވެފައިވަނީ ދޯނީގެ ގެނގަނޑުގައި ކަމަށެވެ. އަދި އަލިފާން ހިފަން ދިމާވި ސަބަބު އަދިވެސް ނޭގޭ ކަމަށް އޭނާ ވިދާޅުވިއެވެ.

ޝަކީބް ވިދާޅުވީ ދޯނީގައި އަލިފާން ހިފާފައި ވަނީ އޭގެ ފަޅުވެރިންނާއި ކައްޕިވެސް ދޯނީގައި ނެތްވަގުތެއްގައި ކަމަށެވެ.

ޝަކީބް ވިދާޅުވީ މަންޒަރު ދުއް މީހުންނަށް އެންމެ ފުރަތަމަ އަލިފާން ރޯވެފައި ހުއްޓާ ފެނުނީ ދޯނީގައި ހިޔާކޮށްފައި ހުރި ގެގަނޑުގެ މަތިން ކަމަށެވެ. އަދި ރޯވުމުގެ ކުރިން އެތަނުން ބާރު އަޑެއް އިވިފައިވާ ކަމަށް ދޯނީގައި މަސައްކަތް ކުރާ ބިދޭސީ ފަޅުވެރިއަކަށް އިވުނު ކަމަށް ވާހަކަ ދެކެވޭ ކަމަށް އޭނާ ވިދާޅުވިއެވެ. ނަމަވެސް އެ އަޑު އިވިފައި ވަނީ ކޯންޗަކުން ކަން ނޭގޭ ކަމަށް ވިދާޅުވިއެވެ.

ޝަކީބް ވިދާޅުވީ ދޯނީގެ ކައްޕީގެ ފޯން ޗާޖަށް ޖަހާފައި އޮތީ އެ ރޯވި ގެގަނޑުގެ މަތީގައި ކަމަށެވެ. އެހެން ކަމުން އިވުނު އެ އަޑަކީ، ކައްޕީގެ މޯބައިލް ފޯނު ގޮވި އަޑުކަމަށް ވެސް ބައެއް މީހުން ބުނެފައި ވާކަމަށެވެ. އަދި މި ހާދިސާ ހިނގަން މެދުވެރިވި ސަބަބަކީ އެއީކަމުގައި ވުން އެކަށީގެންވާ ކަމަށް ވެސް ބައެއް ފަރާތްތަކުން ދެކޭ ކަމަށް އޭނާ ވިދާޅުވިއެވެ. ނަމަވެސް އެކަން ޔަގީންކޮށް ބުނަން ނޭގޭ ކަމަށް ޝަކީބު ވިދާޅުވިއެވެ.

ރާއްޖެ އެމްވީއަށް މައުލޫމާތު ލިބުނުގޮތުން އެ ރޯވި ގެގަނޑުގައި ހުރި ހުރިހާ އެއްޗެއް ވެސް ވަނީ ބޭނުންނުކުރެވޭ ވަރަށް އަނދާފައެވެ.

އެ ދޯނީގައި މަސައްކަތް ކުރާ ބައެއް ބިދޭސީންގެ މުސާރައަށް ލިބުނު ފައިސާ ތަކާއި އެމީހުންގެ ބައެއް މީހުންގެ މޯބައިލް ފޯނާއި އެހެނިހެން ބައެއް ބޭނުންތެރި ސާމާނު ވެސް ހުރީ އެ ރޯވި ގެގަނޑުގެ ތެރޭގައި ކަމަށާއި އޭގެން އެއްވެސް އެއްޗެއް ސަލާމަތް ވެފައި ނުވާކަމަށް ވަނީ މައުލޫމާތު ލިބިފައެވެ.