އުއްތަމަ ފަނޑިޔާރު އަހުމަދު މުއުތަސިމް އަދުނާން މަގާމުން ރިޓަޔާ ކުރެއްވުމާއި ގުޅިގެން އެ މަގާމަށް ކުރިމަތިލުމުގެ ފުރުސަތު ޖުޑީޝަލް ސާވިސް ކޮމިޝަން (ޖޭއެސްސީ) އިން ހުޅުވާލައިފި އެވެ.

އެކޮމިޝަނުން ކުރި އިއުލާނެއްގައި ބުނީ، ދިވެހިރާއްޖެގެ ޤާނޫނުއަސާސީގެ 148 ވަނަ މާއްދާގެ (ހ) ގެ ދަށުން ރައީސުލްޖުމްހޫރިއްޔާއަށް މަޝްވަރާ ދިނުމަށްޓަކައި، އުއްތަމަފަނޑިޔާރު ކަމުގެ މަގާމަށް ކުރިމަތިލައްވަން އެދިލައްވާ ފަރާތްތަކުން އެކަމަށް އެދި ހުށަހެޅުއްވުމުގެ ފުރުސަތު ހުޅޫވާލައިފައިވާ ކަމަށެވެ.

އެއިއުލާނުގައި ވާ ގޮތުން އެ މަގާމަށް ކުރިމަތިލުމުގެ ސުންގަޑިއަކީ ޖުލައި 29، ގެ މެންދުރު 12:00 އެވެ. އެ މަގާމަށް ކުރިމަތިލާން ޖެހެނީ ޖޭއެސްސީގެ ފަހިރެސް ޕޯޓަލް މެދުވެރިކޮށެވެ.

ފަނޑިޔާރުންގެ ކިބައިގައި އާންމުކޮށް ހުންނަންޖެހޭ ޖެހޭ ޝަރުތުތައް ފުރިހަމަވުމުގެ އިތުރުން އުއްތަމަ ފަނޑިޔާރުކަމަށް ކުރިމަތިލެވެނީ އުމުރުން 30 އަހަރު ވެފައިވާ މީހުންނަށެވެ. އަދި އިސްލާމީ ޝަރީޢާ ނުވަތަ ޤާނޫނާއި އިސްލާމީ ޝަރީޢާގެ ރޮނގުން ފުރަތަމަ ޑިގްރީ ހާސިލް ކޮށްފައިވުމާއި ފަނޑިޔާރުކަމުގައި ނުވަތަ ގާނޫނީ ވަކީލުކަން ކުރުމުގައި މަދުވެގެން 7 އަހަރު ދުވަހުގެ ތަޖުރިބާ ލިބިފައިވުން ހިމެނެއެވެ.

އުއްތަމަ ފަނޑީޔާރުކަމުގެ މަގާމަށް ކުރިމަތި ލުމުގެ ފުރުސަތު ހުޅުވާލާފައިވަނީ އެމަގާމުގައި ހުންނެވި އަލްއުސްތާޛް އަޙުމަދު މުއުތަސިމް އަދުނާން ރިޓަޔާ ކުރެއްވުމާއިއެކުއެވެ. އަދި އުއްތަމަ ފަނޑިޔާރުގެ މަސްއޫލިއްޔަތު ފަނޑިޔާރު އަލްއުސްތާޛް ޢަބްދުﷲ ޙަމީދުއާ ވަނީ ހަވާލު ކުރައްވައިފައެވެ.

ސުޕްރީމް ކޯޓުން ނެރެފައިވާ ދެންނެވުމެއްގައި ބުނެފައި ވަނީ، 2025 ޖުލައި 21 ވަނަ ދުވަހުން ފެށިގެން މުއުތަސިމް އުއްތަމަ ފަނޑިޔާރު ކަމުގެ މަގާމުން ޝަރަފުވެރިކަމާ އެކު ރިޓަޔާވުމާ ގުޅިގެން، ސުޕްރީމް ކޯޓުގެ ހިންގުން ފަނޑިޔާރު ޙަމީދުއާ ހަވާލު ކޮށްފައިވާ ކަމަށެވެ.