އިސްރާއީލާއި އީރާނާ ދެމެދު ކުރިއަށް ދިޔަ ހަނގުރާމައުގެ ސަބަބުން، ގެއްލުން ލިބުނު ވައިގެ ދިފާއީ ވަސީލަތްތައް އަލުން ޤާއިމު ކޮށްފައިވާ ކަމަށް އީރާން އިން ބުނެފި އެވެ. 

އިސްރާއީލް އިން އިސްވެ އީރާންގެ ނިއުކްލިއާ މަރުކަޒުތަކަށް ދިން ހަމަލާގެ ސަބަބުން، އޭގެ ރައްދުގައި އީރާން އިން ވެސް ވަނީ އިސްރާއީލަށް ހަމަލާތަކެއް ދީފަ އެވެ. ދެ ޤައުމުގެ ދެ މެދުގައި ބަދަލު ކުރަން ފެށުނު ހަމަލާތަކުގެ ސަބަބުން، 12 ދުވަހުގެ މުއްދަތަކަށް ވަނީ ހަނގުރާމަ ކުރިއަށް ގޮސްފަ އެވެ. އެ ހަނގުރާމައިގެ ތެރެއަށް ވަކި ހިސާބަކުން އެމެރިކާ އިން ވަދެފައިވާއިރު، އެމެރިކާ އިން ވެސް ވަނީ އީރާންގެ ނިއުކްލިއާ މަރުކަޒުތަކަށް ހަމަލާ ދީފަ އެވެ. 

އީރާންގެ ޑިފާ ޕްރެސް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އީރާން އިން މިހާރު ވަނީ ހަނގުރާމައިގެ ސަބަބުން ގެއްލުން ލިބުނު ވައިގެ ދިފާއީ ވަސީލަތްތައް އަލުން ޤާއިމު ކޮށްފަ އެވެ. 

އީރާންގެ އަސްކަރިއްޔާގެ އޮޕަރޭޝަންސްގެ ޑެޕިއުޓީ، މަޙުމޫދު މުސަވީ ވިދާޅުވެފައިވާ ގޮތުގައި ޖޫން މަހު ހިނގި ހަނގުރާމައިގައި އިސްރާއީލްގެ ވައިގެ ބާރުން އީރާންގެ އެއާ ސްޕޭސް އަށް ވަދެ، އެ ޤައުމުގެ ވައިގެ ދިފާއީ ނިޒާމަށް ވަނީ ބޮޑެތި ގެއްލުންތަކެއް ދީފަ އެވެ. އޭރު އީރާން އިން ވެސް ދިތައީ ޑްރޯން އަދި މިސައިލްތަކުން އިސްރާއީލަށް ހަމަލާ ދެމުންނެވެ. 

މޫސަވީ ވިދާޅުވީ އިސްރާއީލްގެ ހަމަލާތަކުގެ ސަބަބުން އީރާންގެ ވައިގެ ދިފާއީ ވަސީލަތްތަކަށް ގެއްލުން ލިބުނު ކަމަށެވެ. އަދި އެކަމަކީ ފޮރުވެން ނެތް ކަމެއް ކަމަށް ވެސް އޭނާ ފާހަގަ ކުރެއްވި އެވެ. އެހެން ނަމަވެސް، އީރާން އިން ވަސީލަތްތައް ބޭނުން ކޮށްގެން، ކުރިން ރައްކާ ކޮށްފައި ހުރި ނިޒާމުތަކުގެ އެހީގައި އެ ތަންތަން އަލުން ޤާއިމު ކޮށްފައިވާ ކަމަށް މޫސަވީ ވިދާޅުވި އެވެ. 

އިސްރާއީލްގެ ހަނގުރާމައިގެ ކުރިން، އީރާންގައި އެ ޤައުމުން އުފައްދާފައިވާ ބަވާރު 373 ދުރު ރޭންޖުގެ އެއާ ޑިފެންސް ސިސްޓަމާއި، ރަޝިޔާ އިން ގަނެފައިވާ އެސް 300 ގެ އެއަރ ޑިފެންސް ސިސްޓަމް ހުއްޓެވެ. ޑިފާ ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، ފާއިތުވި ހަފުތާ ތަކުގެ ތެރޭފައި އީރާނަށް ބޭރުގެ އެއްވެސް ޤައުމެއްގެ އެއަރ ޑިފެންސް ސިސްޓަމް އިމްޕޯޓު ކޮށްފައި ނެތެވެ.