ރިޓަޔާ ކުރައްވާ މުއުތަސިމްއަށް ދޭން މަޝްވަރާކުރި ބޮޑު އެލަވަންސްތައް ނުދޭން ނިންމައިފި
މިއަދަކީ އުއްތަމަ ފަނޑިޔާރު މުއުތަސިމް އަދުނާން އެ މަގާމު ފުރުއްވާ ފަހު ދުވަހެވެ. އެ މަނިކުފާނު ރިޓަޔާ ކުރައްވާތީ ރިޓަޔާމަންޓް އެލަވަންސް ޕެކޭޖު ބޮޑު ކުރުމަށް ޖޭއެސްސީން މަޖިލީހުގެ ލަފަޔަކަށް އެދިފައިފައިވަނީ މިދިޔަ ޖޫން މަހު އެވެ.
އުއްތަމަ ފަނޑިޔާރު، އަހުމަދު މުއުތަސިމް އަދުނާން
ދިވެހިރާއްޖޭގެ އުއްތަމަފަނޑިޔާރު މުއުތަސިމް އަދުނާނަން ބޮޑު އެލަވަންސެއް ދޭން މަޝްވަރާކުރި ނަމަވެސް، އެ އެލަވެންސްތައް ނުދޭގޮތައް ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
މިއަދަކީ އުއްތަމަ ފަނޑިޔާރު މުއުތަސިމް އަދުނާން އެ މަގާމު ފުރުއްވާ ފަހު ދުވަހެވެ. އެ މަނިކުފާނު ރިޓަޔާ ކުރައްވާތީ ރިޓަޔާމަންޓް އެލަވަންސް ޕެކޭޖު ބޮޑު ކުރުމަށް ޖޭއެސްސީން މަޖިލީހުގެ ލަފަޔަކަށް އެދިފައިފައިވަނީ މިދިޔަ ޖޫން މަހު އެވެ.
އަދި އުއްތަމަ ފަނޑިޔާރުގެ މަގާމުގައި ހުންނަވާ ބޭފުޅަކު ރިޓަޔާ ކުރައްވައިފި ނަމަ، އެ ބޭފުޅަކަށް ބޮޑު އެލަވަންސެއް ދިނުމަށް ޖުޑީޝަލް ސާވިސް ކޮމިޝަން (ޖޭއެސްސީ)ން ރައްޔިތުންގެ މަޖިލީހުގައި އެދިފައިވާތީ، އެކަމުގައި އަމަލު ކުރަން ޖެހޭނީ ނެޝަނަލް ޕޭ ކޮމިޝަނުން ނިންމާ ގޮތަށް ކަމަށް މަޖިލީހުގެ ކަމާއި ގުޅުން ހުރި ކޮމިޓީން މީގެ ކުރިން ވަނީ ނިންމާފައެވެ.
އެކޮމެޓީން ނިންމާފައިވަނީ ފަނޑިޔާރުންގެ ގާނޫނުގެ ދަށުން ޖޭއެސްސީއަށް ލިބިފައިވާ ބާރާއި އެކު، ފަނޑިޔާރުން ރިޓަޔާވުމުން ދޭން ޖެހޭ އިނާޔަތް ކަނޑައެޅުމުގެ ބާރު ލިިބިފައި ވީ ނަމަވެސް، އެ އިނާޔަތް ދޭންވާނީ ދައުލަތުގެ މުސާރައިގެ ސިޔާސަތުގެ ގާނޫނުގެ ދަށުން ނެޝަނަލް ޕޭ ކޮމިޝަނުން ކަނޑައަޅާ ގޮތެއްގެ މަތިން ކަމަށެވެ.
ޖޭއެސްސީން އޭރު މަޖިލީހުގެ ރައީސްއަށް ފޮނުވާފައިވާ ސިޓީން އެނގޭ ގޮތުގައި މުއުތަސިމް ރިޓަޔާކުރެއްވުމުން ގަނޑުކޮށް ލިބިލައްވާނީ 185،100 ރުފިޔާއެވެ. އެކަމަކު، ޖޭއެސްސީން ހުށަހެޅި އިސްލާހުތަކާ އެކު އެ އަދަދު 493،600 ރުފިޔާއަށް ބޮޑުވާނެއެވެ. އަދި، މިހާރު މަހަކު އެ މަނިކުފާނަށް ލިބެން އޮތް 47،182.50 ރުފިޔާ 70،000 ރުފިޔާއަށް ބޮޑުވާނެއެވެ. ޖޭއެސްސީގެ މި ސިޓީއާއެކު އާންމުންގެ ފާޑުކިޔުންވަނީ އަމާޒު ވެފައެވެ.
ޖޭއެސްސީން މިއަދު ހާމަ ކުރިގޮތުގައި އުއްތަމަފަނޑިޔާރު މުއުތަސިމްއަށް ވެސް ލިބިވަޑައިގަންނަވާނީ އެހެން ފަނޑިޔާރުން ވެސް ރިޓަޔާ ކުރެއްވުމުން މިހާރު އެ ލިބޭ އެލަވަންސްތައް ކަމަށެވެ.
މުއުތަސިމް ރިޓަޔާ ކުރައްވަން ނިންމެވީ، ދާދި އަވަހަށް ރިޓަޔާ ކުރައްވާނެކަމުގެ އިޝާރާތެއް މިދިޔަ ފެބްރުއަރީ މަހު ދެއްވާފައި އޮއްވަ އެވެ. އުއްތަމަ ފަނޑިޔާރު ރިޓަޔާ ކުރައްވަން ނިންމެވީ ސުޕްރީމް ކޯޓުގެ ދެ ފަނޑިޔާރުން ވަކި ކުރުމުގެ މަސައްކަތް ސަރުކާރުން ކުރަމުން ދަނިކޮށެވެ. އެއީ ފަނޑިޔާރު މަހާޒް އަލީ ޒާހިރާއި ފަނޑިޔާރު އަޒްމިރާލްދާ ޒާހިރެވެ. އެ ދެ ފަނޑިޔާރުން މިހާރު ވަނީ ވަކިކޮށްފަ އެވެ.
އެ ދެ ފަނޑިޔާރުން މަގާމުން ވަކި ކުރަން ނިންމީ، ދިފާއުގައި ހުށަހެޅި ހެކިން ބަލައިނުގަތުމަށް ނިންމުމަށްފަހު އެވެ. އަދި މައްސަލަ ނިންމިއިރު، އެ ދެ ފަނޑިޔާރުންނާ ދެކޮޅަށް އެއްވެސް ހެއްކެއް ވެސް ލިބިފައެއްނުވެ އެވެ
