ދެކުނު ލުބުނާން އަށް އަމާޒުކޮށް އިސްރާއީލްގެ އަަސްކަރިއްޔާ އިން ދިން ހަމަލާއެއްގައި ދެ މީހަކު މަރުވެއްޖެ އެވެ.

ހޮނިހިރު ދުވަހު ލުބުނާންގެ ޞިއްޙަތާ ބެހޭ ވުޒާރާ އިން ވަނީ އެކަށް ހާމަކޮށްފަ އެވެ. އެ ހަމަލާއާ ގުޅޭ ގޮތުން އިސްރާއީލްގެ އަސްކަރިއްޔާ އިން ބުނެފައި ވަނީ، އެ ހަމަލާތައް އަމާޒުކޮށްފައި ވަނީ ހިޒްބުﷲ ޖަމާއަތުގެ ޓެރަރިސްޓުންނާ ދެކޮޅަށް ކަމަށެވެ.

ކިއާމްގެ ރަށުގައި ގެއެއްގެ ފުރާޅު މަތީގައި ހުރި ޕްލަމްބަރެއް ވަނީ އިސްރާއީލްްގެ ޑްރޯން ހަމަލާގައި މަރުވެފަ އެވެ. މީގެ އިތުރުން ޔޮހްމޮރް އަލް ޝަކީފްގައި މޮޓޯ ސައިކަލަކަށް ދިން ހަމަލާއެއްގައި އިތުރު މީހަކު ވަނީ މަރުވެފަ އެވެ. އިސްރާއީލްގެ އަސްކަރިއްޔާ އިން ބުނެފައިވާ ގޮތުގައި އެ ހަމަލާގައި މަރުވި މީހުންނަކީ ހިޒްބުﷲގެ އެލީޓް ރަދުވާން ބާރުގެ މެމްބަރުން ކަމަށެވެ. 

މިދިޔަ އަހަރުގެ ނޮވެމްބަރު މަހު ހަނގުރާމަ ހުއްޓާލަން އެކުލަވާލެވުނު އެއްބަސްވުމާ ޚިލާފަށް އިސްރާއީލް އިން އަންނަނީ ތަކުރާރުކޮށް ލުބުނާން އަށް ހަމަލާތައް ދެމުންނެވެ. އެ އެއްބަސްވުމުގެ ދަށުން ހިޒްބުﷲ ޖަމާއަތުގެ ހަނގުރާމަވެރިން ލިޓާނީ ކޯރުގރ އުތުރަށް ޖެހެން ޖެހޭނެ އެވެ.

އެއީ އިސްރާއީލްގެ ބޯޑަރުން 30 ކިލޯ މީޓަރު ދުރު ހިސާބެކެވެ. އެއްބަސްވުމުގެ ދަށުން އިސްރާއީލްގެ ސިފައިން ލުބުނާން އިން ފަހަތަށް ޖެހެން ޖެހޭއިރު، އެ ޤައުމުން ވަނީ ސްޓްރެޓެޖިކް މުހިންމުކަން ހުރި ކަމަށް ބުނެ ފަސް ސަރަހައްދެއްގައި ސިފައިން ބައިތިއްބައިފަ އެވެ.