މި ދަނޑިވަޅުގައި ޤައުމީ އެއްބައިވަންތަކަން އިސް ކުރެެއްވުމަށް ސީރިއާގެ ރައީސް އަޙުމަދު އަލް ޝަރާ ގޮވާލައްވައިފި އެވެ.

ޓެލެވިޝަން މެދުވެރިކޮށް އަލް ޝަރާ ދެއްވި ބަޔާނެއްގައި ވިދާޅުވެފައި ވަނީ، ޤައުމުގެ އެއްބައިވަންތަކަން ދެމެހެއްޓުމަށާއި، ޤައުމުގެ ރައްޔިތުން އެކުވެރިކަމާ އެކު ދިރިއުޅުމަށް ގޮވާލައްވާ ކަމަށެވެ.

ސުވައިދާ ސަރަހައްދުގައި ހިނގަމުން އަންނަ މަޒްހަބީ ހަމަ ނުޖެހުންތަކާ ގުޅިގެން އަލް ޝަރާ ވަނީ، ސަރުކާރުން ވަގުތުން އަދި ފުރިހަމަ ހަނގުރާމަ ހުއްޓާލުމެއް އިއުލާާން ކުރާ ކަމަށް ވިދާޅުވެފަ އެވެ. އަދި ސީރިއާގެ ސަރުކާރުން އެ ސަރަހައްދަށް ސިފައިން ފޮނުވާފައިވާ ކަމަށް އަލް ޝަރާ ވިދާޅުވެފައިވެ އެވެ. 

މީގެ އިތުރުން އަލް ޝަރާ ވިދާޅުވެފައި ވަނީ ޤައުމީ އެއްބައިވަންތަ ކަމަކީ އޭނާގެ ސަރުކާރުން އެންމެ އިސްކަން ދެމުން އަންނަ، އަދި ސަރުކާރުގެ އެންމެ އިސް އަމާޒު ކަމަަށެވެ. އަދި އެއްވެސް ފަރާތެއްގެ މެދުގައި ތަފާތު ކުރުމެއް ނެތި މެދުވެރިއެއްގެ ދައުރު އަދާ ކުރުމަކީ ސަރުކާރުގެ ޒިންމާއެއް ކަމަށް ވެސް އަލް ޝަރާ ވަނީ ވިދާޅުވެފަ އެވެ. 

އިތުރަށް ވާހަކަ ދައްކަވަމުން އަލް ޝަރާ ވިދާޅުވެފައި ވަނީ، މަދު ބައެއްގެ ފިތުނަވެރިކަން ފިޔަވައި، ސުވައިދާ ޑްރޫޒް އަދި އަރަބި މުޖުތަމައުގެ ރައްޔިތުންނަަކީ ވަރަށް މަތިވެރި އަދި މާތް ބައެއް ކަމަށެވެ. 

ސީރިއާގެ ރައީސް އަލް ޝަރާގެ މި ޚިތާބަކީ ސަރުކާރުން އެ ޤައުމުގެ އިސްތިޤުރާރާއި، އެއްބައިވަންތަކަން ދެމެހެއްޓުމަށް މަސައްކަތް ކުރާކަން ރައްޔިތުންނަށް ޔަޤީން ކޮށްދިނުމުގެ މެސެޖެއް ކަމަށް ސިޔާސީ މާހިރުން އަންނަނީ ފާހަގަ ކުރަމުންނެވެ. އަދި ހަމަ އެހެންމެ ރައްޔިތުންގެ ހަމަޖެހުމާއި އެކުވެރިކަމުގެ މަގަށް ރައްޔިތުން އަހުލުވެރިވުމުގެ މުހިންމުކަން އަންގައިދޭ ޚިތާބެއް ކަމަށް ވެސް ފާހަގަ ކޮށްފައިވެ އެވެ.

ސީރިއާގެ ސުވައިދާ ޕްރޮވިންސްގައި ބަދަވީންގެ ޤަބީލާތަކާއި، ޑްރޫޒް ފެކްޝަނާ މެދު ހިނގި ހަމަ ނުޖެހުންތަކާ ގުޅިގެން ސަރަހައްދުގައި ހަފުތާއެއްގެ މުއްދަތަކަށް ވަނީ ހަމަލާތައް ބަދަލު ކުރުމާއި، އަނިޔާވެރިކަން އިތުރުވެފަ އެވެ.