"މިހާރު އޮތްގޮތަށް ފިކުރީ މުދާ ރައްކާތެރިކުރާ އޮފީހެއް ޤާއިމް ކުރުމަކީ އައު ފެނަކަ އޮފީހެއް އުފެއްދުން ކަހަލަ ކަމެއް"
15 ޖުލައި 2025 | އަންގާރަ 09:22ބިލްގެ ފުރަތަމަ ކިއުން އިއްވާފަ ވަނީ ވެސް ހޯމަ ދުވަހު
ވައިކަރަދޫ ދާއިރާގެ މެންބަރު ޒިޔާދު
މިހާރު އޮތްގޮތަށް ފިކުރީ މުދާ ރައްކާތެރިކުރާ އޮފީހެއް ޤާއިމް ކުރުމަކީ އައު ފެނަކަ އޮފީހެއް އުފެއްދުން ކަހަލަ ކަމެއް ކަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ހޯމަ ދުވަހު މަޖިލީހަށް ހުށަހަޅާފައިވާ "މޯލްޑިވްސް އިންޓެލެކްޗުއަލް ޕްރޮޕަޓީ އޮފީހުގެ ބިލް" އަށް ބަހުސްކުރައްވަމުންނެވެ.
އެ ބިލު މިހާރު އޮތްގޮތުން ފިކުރީ މުދާ ރާއްކާތެރިކޮށްދިން ނަމަވެސް ފިކުރީ މުދާ ރައްކާތެރިކުރެވޭތަން ނުފެންނަ ކަމަށް ޒިޔާދު ވަނީ ވިދާޅުވެފައެވެ. ޒިޔާދު ވިދާޅުވީ އެ ބިލު އޮތް ގޮތުން އޮފީހެއް ޤާއިމް ކުރެވުނަސް އެތަނުގެ މަސައްކަތް ރަނގަޅަށް ކުރެވިދާނެ ކަމާއި މެދު ސުވާލު އުފެދޭ ކަމަށެވެ.
ސަރުކާރުތަކުގެ ނުފޫޒުން އެއްކިބާވާ ގޮތަކަށް އެ މުއައްސަސާ އޮތުން ވަރަށް މުހިންމު ކަމަށް އޭނާ ވިދާޅުވިއެވެ. މިހާރު ބިލު އޮތް ގޮތުން އެ އޮފީހަށް ރެޖިސްޓަރަކު އައްޔަން ކުރަނީ ވެސް ވަޒީރުކަމަށް ވުމާއި އެކު އެ ވުޒާރާ އޮންނާނީ ވަޒީރުގެ ފުރިހަމަ ކޮންޓްރޯލްގެ ދަށުގައި ކަމަށް އޭނާ ވަނީ ވިދާޅުވެފައެވެ.
"ވަޒީރުގެ އަތްދަށުގައި ހުރިހާ ކަމެއް ހުރިހާ ކޮންޓްރޯލެއް މި އޮންނަނީ 15 ވަނަ މާއްދާ ބުނާ ގޮތުން މުވައްޒަފުން ވެސް ހޯދަނީ މިނިސްޓްރީން. މި ބިލު މިހާ މުހިންމު ވެގެން އުޅޭ އިރު އަޅުގަނޑު ހިތަށް އަރަނީ މިނިވަން މުއައްސަސާ އެއް އޮތުން މާ ރަނގަޅެއް ނޫންތޯއޭ. މިނިސްޓްރީ ތެރެއިން މިކަން ނުކުރެވޭތޯ؟" ޒިޔާދު ވިދާޅުވިއެވެ.
ބިލުގެ ބޭނުމަކީ ފިކުރީ މުދާ ރައްކާތެރިކަން ހޯދާ ދިނުން ކަމަށް ވާނަމަ މިނިވަން މުއައްސަސާ އެއްގެ ގޮތުގައި އެތަން އޮތުން މާ މުހިންމު ކަމަށް ޒިޔާދު ވަނީ ވިދާޅުވެފައެވެ. އެ ބިލް ހޯމަ ދުވަހު މަޖިލީހަށް ހުށަހަޅުއްވާފައިވަނީ ކުޑަހުވަދޫ ދާއިރާގެ ޕީއެންސީ މެންބަރު ހުސައިން ހަމީދެވެ. ބިލްގެ ފުރަތަމަ ކިއުން އިއްވާފައި ވަނީ ވެސް ހޯމަ ދުވަހުއެވެ.
