ވެރިކަން ކުރާ ޕީއެންސީގައި އާންމު މީހަކަށް އިންސާފުވެރި ގޮތެއް ނެތްކަމަށް ބުނެ ޕީއެންސީގެ އިސް ސަފުގައި މަސައްކަތް ކުރި ޝަނީޒް އެ ޕާޓީން ވަކިވެއްޖެއެވެ.

ޝަނީޒް ހާޝިމް އަކީ ޕީއެންސީގެ އިސް ސަފުގައި މަސައްކަތް ކުރެއްވި އަދި ޕީއެންސީގެ ޓިކެޓުގައި ހުޅުމާލެ ދެކުނު ދާއިރާއަށް މަޖިލިސް އިންތިހާބުގައި ވާދަކުރެއްވި ކެންޑިޑޭޓެކެވެ.

އޭނާގެ އެކްސް އެކައުންޓުގައި މި މަހުގެ 5 ވަނަ ދުވަހުން ފެށިގެން ވަނީ ހިތްހަމަނުޖެހުމުގެ ޕޯސްޓްތަކެއް ޖަހާފައެވެ. އެގޮތުން ކުރިއަށް އޮތް ދުވަސްތަކުގައި އުއްމީދުކުރި ގޮތް އަންނާނެ ކަމަށާއި، އެއާއެކު އެއްވެސް ރިގްރެޓެއް ނެތި ކުރިއަށްދެވޭނެ ކަމަށެވެ. މީގެ އިތުރުން ވެލާނާ އެއަރޕޯޓުގެ އައު ޓާމިނަލްގެ ބަހުސް ކުރެވެމުން ދަނިކޮށް މި މަހުގެ 8 ވަނަ ދުވަހު ކުރި ޕޯސްޓެއްގައި ބުނެފައިވަނި ސަރުކާރަކުން ޕްރޮޖެކްޓެއް ފަށާފާނެ ކަމަށާއި، އެހެހެން ސަރުކާރަކުން އެކަން ނިންމަފާނެ ކަމަށެވެ. އެއީ އާންމުކަމެއް ކަމަށާއި، އެއްވެސް ބަޔަކަށް ކްރެޑިޓެއްދީ އަދި ހޯދަން ނުޖެހޭ ކަމަށެވެ. އަދި ސަރުކާރު އަންނަނީ ރައްޔިތުންނަށް ހިދުމަތް ކުރުމަށް ކަމަށެވެ.

އަދި އެފަހުން އާދީއްތަ ދުވަހުގެރޭ އެކްސްގައި ކުރި ޕޯސްޓެއްގައި ޝަނީޒް ވިދާޅުވީ މިއަދު އޭނާ ޕީއެންސީއާ ދުރަށް ދާން ނިންމީ، އެ ޕާޓީއަކީ އާންމު މީހަކަށް އިންސާފުވެރި ޖާގައެއް އުފައްދާ ޕާޓީއެއް ކަމަށް ގަބޫލު ނުކުރެވޭތީ ކަމަށެެވެ. އަދި އޭނާ ގަބޫލުކުރާ ހަމަތަކާއި އުސޫލުތަކާއި ޚިލާފަށް، ވެރިކަމުގައި ތިބި މީހުން ހިތްހަމަޖައްސައިދޭން ނުދާނެ ކަމަށެވެ.

ޕީއެންސީއިން ވަކިވެވަޑައިގަތީ ސަރުކާރާއި އަދި ސަރުކާރުގެ އިސްވެރިންނާއި މެދު އޮތް ހިތްހަމަނުޖެހުމެއްގެ ތެރެއިން ކަމަށްވިޔަސް ސީދާ ކޮން ސަބަބަކާއި ހުރެކަމެއް އޭނާ ވިދާޅުވެފައި ނުވެއެވެ.