އެމްއެމްޕީއާރުސީ ކުންފުނީގެ ނަން މިހާރުވެސް ބޭނުން ކުރަމުން އަންނަ ވިސިޓް މޯލްޑިވްސްގެ ނަމަށް ރަސްމީކޮށް ބަދަލުކޮށްފި
13 ޖުލައި 2025 | އާދީއްތަ 19:30ވިސިޓް މޯލްޑިވްސް ރަސްމީކޮށް އުފެއްދީ މާޗް 4، 2010 ގައި އެމްޑީޕީގެ ސަރުކާރުގައި ކުރީގެ ރައީސް މުހައްމަދު ނަޝީދު
އެމްއެމްޕީއާރުސީ ކުންފުނީގެ ނަން ވިސިޓް މޯލްޑިވްސް އަށް ވަނީ ބަދަލުކޮށްފައި
މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން ލިމިޓެޑް (އެމްއެމްޕީއާރުސީ) ގެ ނަން މިހާރުވެސް ބޭނުން ކުރަމުން އަންނަ ވިސިޓް މޯލްޑިވްސްގެ ނަމަށް ރަސްމީކޮށް ބަދަލުކޮށްފިއެވެ.
ރާއްޖޭގެ ފަތުރުވެރިކަން އިސްތިހާރުކޮށް ކުރިއަރުވަން އުފައްދާފައިވާ ކުންފުނީގެ ބްރޭންޑްގެ ގޮތުގައި ބޭނުން ކުރަމުން އައި ވިސިޓް މޯލްޑިވްސް އަކީ ފަތުރުވެރިކަން އިސްތިހާރުކުރުމަށް ބޭނުންކުރަމުން އައި ބްރޭންޑު އަދި ނަމެވެ. ވިސިޓް މޯލްޑިވްސް ރަސްމީކޮށް އުފެއްދީ މާޗް 4، 2010 ގައި އެމްޑީޕީގެ ސަރުކާރުގައި ކުރީގެ ރައީސް މުހައްމަދު ނަޝީދެވެ.
ރައީސް އޮފީހުން ބުނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، "މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން ލިމިޓެޑް" ގެ ނަން "ވިޒިޓް މޯލްޑިވްސް ކޯޕަރޭޝަން ލިމިޓެޑް" އަށް މިއަދު ބަދަލުކުރައްވާފައިވާ ކަމަށެވެ. މި ބަދަލު ގެންނަވައި އެކަން އިޢުލާންކުރައްވާފައިވަނީ، ނަންބަރު 2025/19، ޤަރާރުންނެވެ.
މި ކުންފުންޏަކީ، ދިވެހިރާއްޖޭގެ ފަތުރުވެރިކަމުގެ ސިނާޢަތް ކުރިއަރުވައި ސިންދަފާތުކުރުމަށްޓަކައި އިސްތިރާޖީ ގޮތެއްގައި ސަރުކާރުގެ ފަރާތުން ކުރަމުންއަންނަ މަސައްކަތްތަކުގެ ތެރެއިން، ދިވެހިރާއްޖެ ފަތުރުވެރިކަމުގެ މަންޒިލެއްގެ ގޮތުގައި ދުނިޔޭގައި އިޝްތިހާރުކޮށް ޕްރޮމޯޓުކުރުމަށާއި، މަތީ ފެންވަރުގައި ދުނިޔޭގައި ފާހަގަކުރެވޭ ފަދަ ފަތުރުވެރިކަމުގެ މަންޒިލެއްގެ ގޮތުގައި ދިވެހިރާއްޖެ ދެމެހެއްޓުމަށް ކުރަންޖެހޭ މާކެޓިން، ޕްރޮމޯޝަން އަދި އިޝްތިހާރުކުރުމުގެ އެންމެހައި މަސައްކަތް، ސީދާގޮތުންނާއި އިސްތިރާޖީގޮތުން، ދެމެހެއްޓެނިވި ގޮތެއްގައި މެދުކެނޑުމެއް ނެތި ކުރުމަށް އެކުލަވާލާފައިވާ ކުންފުންޏެކެވެ.
